Manipud Managbasatayo
Asamblea Dagiti Saksi Pagyamanan iti kapadasan a napauluan iti “Maysa nga Aldaw a Namagbalbaliw iti Biagna.” (Marso 22, 1995) Ti kapadasan ti maysa nga agtutubo a babai nga inawis ni ikitna a dumar-ay iti maysa-aldaw nga espesial nga asamblea dagiti Saksi ni Jehova ti nangipalagip kaniak iti umasping a napagtengko. Iti damo a gundaway, dinar-ayak ti asamblea idi kalgaw ti 1985, kalpasan nga inawisnak ni manongko. Ti kinabara ti dagus a nangsukat iti kinaawan panagtalekko idi damo; nariknak a kasla addaak iti tengnga ti maysa a dakkel a pamilia. Inkeddengko nga itultuloy ti makipagadal iti Biblia, ket ita maysaakon a regular payunir, amin-tiempo a managebanghelio.
E. F., Italia
Utang Pagyamanan iti artikuloyo a “Pagimbagan Kadi ti Umutang?” (Hunio 8, 1995) Agtawenak laeng iti 13, ngem saan a nasayaat ti panangusarko iti kuartak. Patiek a dakkelto ti maitulong daytoy nga artikulo kaniak.
C. A., Estados Unidos
Panangtagabo Kas maysa nga Africano-Americano a babai, apresiarek unay ti Hunio 8, 1995 a serye dagiti artikulo a “Ti Kawar ken Lulua ti Pannakatagabo.” Ti retrato iti akkub ti nangpaarubos iti luluak. Naabbukay ti riknak iti turedyo a nangilawlawag kadagitoy a nakababain a historiko a kinapudno. Naiparang ti artikulo iti kasta unay a kinamannakipagrikna ken makaisuro unay.
B. M., Estados Unidos
Dimteng iti umiso a tiempo ti artikulo tangay pagsasaritaanmi idi ti tema iti klasemi a history. Inusarko ti artikulo a mangkompleto iti sumagmamano a mapili a homework, ket nakagun-odak iti nangato a grado. Maasianak met unay kadagiti tagabo.
M. C., Alemania
Pakasaritaan ti Biag Makaparegta unay nga artikulo “Ti Naballigi a Panangsapulko iti Panggep ti Biag” (Mayo 22, 1995). Timmulong kaniak ti salaysay ni Harold Dies a mangikeddeng no sumrekak wenno saan iti amin-tiempo a ministerio. Naaddaanak met iti gundaway nga agpasiar iti Bethel, ti sangalubongan a headquarter dagiti Saksi ni Jehova idiay Brooklyn, New York, ket naibuyogak unay. Determinadoak a sumrek iti amin-tiempo a ministerio itan!
A. C., Estados Unidos
Panangpakawan ken Pananglipat Pagyamanan iti ekselente nga artikulo a “Ti Panangmatmat ti Biblia: Panangpakawan ken Pananglipat—Kasano a Posible?” (Hunio 8, 1995) Kanayon idi a pampanunotek no mangikalikagum ti Biblia iti banag nga imposible kadagiti imperpekto a tattao. Ngem ita maawatakon no ania ti kaipapanan ti panangpakawan ken pananglipat. Nakatulong ti artikulo iti panamatik a saan a makapadagsen dagiti bilin ti Dios.
C. I. C., Nigeria
Masapul nga agsuratak kadakayo ken ipakaammok nga apresiarek unay ti artikulo. Idi ubingak, seksual nga inabusodak ti dua nga ulitegko. Kalpasanna, naabuso ken namaltratoak kas maysa nga asawa a babai. Idi nagbalinakon a Kristiano, inkagumaak nga ipakita ti panagayat ken panangpakawan. Nupay kasta, pulos a diak maikuna a sipupudno a napakawankon dagitoy a tallo a tattao a nangdudog iti riknak iti adun a tawen. Maamirisko itan nga adda dadduma a banag a masapul a maipabiang ken ni Jehova, ket maitultuloyko latta ti agbiag. Ti Apocalipsis 21:4 ti mangipasigurado kaniak a mapukawton daytoy a nadudog a riknak.
A. B., Estados Unidos
Kabasbasak ti artikulo, ket nariknak a nadekdekketak ita ken ni Jehova a Dios ngem idi. Nabiit pay a nakaaramidak iti nadagsen a basol isu a nagpatulongak kadagiti panglakayen iti kongregasion. Nupay siaasi ken siaayat a binagbagaandak, maalumiimak pay laeng a makisarita ken ni Jehova babaen iti kararag. Daytoy nga artikulo ti nangted kaniak iti nalawlawag a pannakaawat a kasapulak unay no kasano a mamakawan ken manglipat ti nailangitan nga Amatayo. Dayta ti timmulong kaniak tapno siwayawaya a makaadaniakon kenkuana babaen iti naimpusuan a panagkararag—maysa a pribilehio a simamaag a likliklikak idi. Pagyamanan ken ni Jehova iti panangipaayna kaniak iti ‘taraon iti umiso a tiempo.’—Mateo 24:45.
D. J. S., Estados Unidos