Salun-at ken ti Aglawlaw
Babaen ti koresponsal ti Agriingkayo! idiay Nigeria
Kada tawen iti sangalubongan, matmatay ti 49 milion a tattao. Nasapa a matay ti agarup 75 porsiento kadagitoy, a mainaig ti makagapu iti di nasayaat nga aglawlaw ken estilo ti panagbiag, sigun iti report ti World Health Organization (WHO). Usigenyo ti sumagmamano a pagarigan:
◼ Lima a milion ti papatayen ti kanser iti kada tawen. Ireport ti WHO a kaaduan kadagitoy “ti direkta a maigapu iti kasta unay nga iyaadu dagiti managsigarilio iti napalabas a 30 a tawen.”
◼ Ti saksakit a panagsíka, a mangpappapatay iti nasurok a tallo a milion nga ubbing iti kada tawen, ti masansan a maigapu iti namulitan a taraon ken danum, agraman ti kinaawan ti umno a kinadalus.
◼ Ti sarut, a mangpappapatay iti tallo a milion iti kada tawen, ti agsaksaknap kadagiti napanglaw ken aglilinnetlet, nangnangruna iti narugit [a lugar].
◼ Dagiti impeksion iti aangsan, kangrunaanna ti pulmonia, ti mangpappapatay iti tallo ket kagudua a milion nga agtutubo a nababbaba ngem lima ti tawenda iti kada tawen. Adu ti agnanaed kadagiti siudad a makalanglang-ab iti nakaro unay a polusion iti angin.
Malaksid kadagitoy a matmatay, iti tinawen, agarup dua ket kagudua a bilion—gistay kagudua iti populasion ti lubong—ti agsagsagaba iti sakit a maigapu iti di umdas wenno namulitan a danum ken kinarugit. Kanayonanna, dagiti nabiit pay a pakaseknan kas ti acid rain, ti iyiingpis ti ozone layer, ken ti panagbara ti daga ti innaig ti WHO iti kumapkapuy a salun-at ti adu. Ti pakagupgopan, inlanad ti report ti WHO, nasurok a dua a bilion a tattao ti agnanaed kadagiti aglawlaw a mamagpeggad iti biag wenno salun-at.
Ipakdaar ni Dr. Hiroshi Nakajima, direktor heneral ti WHO: “No ditay agtignay ita, nakaronto unayen ti krisis iti Daga ken dagiti agindeg iti dayta, nga addaan iti aglawlaw a saanen nga agpaut.”
Ikari ti Biblia nga addanto tiempo inton “ti agindeg dinanton kunaen: ‘Masakitak.’” (Isaias 33:24) Maibanagto daytoy, saan a babaen kadagiti panagregget ti tao, no di ket babaen ti Pagarian ti Dios, a mangpukawto iti saksakit ken dagiti pakaigapuanda.—Apocalipsis 21:3, 4.
[Picture Credit Line iti panid 24]
Godo-Foto