Panangmatmat iti Lubong
Saan a Basol ti “Panagkabbalay a Di Nagkasar?”
Ti iglesia ti nabiit pay a binalakadan ti Board of Social Responsibility iti Church of England a saanen a basol ti “panagkabbalay a di nagkasar,” kinuna ti Guardian Weekly. Imbalakad pay ti board iti iglesia a “makasursuro dagiti kongregasion manipud kadagiti di nagkasar a pareha, agraman kadagiti binabai ken tomboy, ken rumbeng a liklikanda ti pannakagargari a manglagip iti ‘tiempo ti naragsak a pamilia.’” Adawen ti Guardian ti klero a ni Philip Hacking a simmungbat: “Daytoy a liberal a kababalin ti mangumsi ken pakariribukan unay iti adu a matalek a Kristiano.”
Pannakapukaw ti Abilidad nga Agbasa ken Agsurat
Agarup tallo a milion a tattao idiay Germany ti makapukpukaw iti abilidadda nga agbasa ken agsurat gapu iti kurang a panagensayo. Inlawlawag ni Johannes Ring, ti sekretario ti Reading Foundation, a ti irarang-ay ti electronic media ti mangdegdegdeg iti parikut. Ipadamag ti Frankfurter Allgemeine Zeitung nga idiay World Conference on Combating Illiteracy, imbaga ni Ring a ti panagsaknap daytoy a kita ti iliterasia adda pakaigapuanna iti nasaknap a pannakausar ti television, computer, ken video games.
Uminum Tapno Sumayaat ti Panagpanunot
Marigatankay kadi a mangipamaysa iti panunotyo? Nalabit kasapulan nga uminumkayo iti ad-adu a danum, isingasing ti Asiaweek. Ireport ti magasin a nabiit pay a nabalakadan dagiti mannursuro ken nagannak ti dadduma nga ages-eskuela nga ubbing idiay Hong Kong a ti iyiinum iti adu a danum ti tumulong kadagiti estudiante a mangparmek iti panagalusiis. Naibaga kadagiti nagannak a rumbeng nga uminum dagiti ubing iti 8 agingga iti 15 a baso ti danum iti kada aldaw. Iti panangadawna iti libro a The Learning Brain, itudo ti magasin ti naipablaak a report ti panagadal a mangipamatmat a ti pannaka-dehydrate ti pakaigapuan ti nakapuy a panagadal. Nasaysayaat ti iyiinum iti puro, nadalus a danum ngem ti iyiinum kadagiti soft drink, kape, tsa, wenno uray pay juice, a mabalin nga aktual a mangpaganaygay iti bagi tapno maparuar dagiti pluido, kuna ti Asiaweek.
Ballaag Maipapan ti Panagusar iti Pestisidio
Dakdakkel ti sagsagabaen dagiti Americano a pannakaisarang kadagiti pestisidio babaen kadagiti produkto a para balay ngem babaen kadagiti napugsitan a prutas ken nateng, sigun kadagiti managsirarak idiay University of California sadi Berkeley. Aglaon kadagiti makasabidong a kemikal dagiti pangpugsit iti ipes, dagiti maibitin a pagtiliw iti ngilaw, pangullom iti timel, mothball, ken dagiti umasping a produkto. Malaksid iti pakaigapuanda a rinibu a pannakasabidong iti kada tawen, adu ti mangpataud iti napaut a peggad para iti salun-at. Isingasing ti UC Berkeley Wellness Letter dagiti nataltalged a pagpilian: Tarimaanen wenno mangikabit kadagiti screen ken tapalan dagiti nagbirri iti suelo ken diding tapno pumanaw dagiti peste; ipisok sa serraan dagiti taraon ken basura iti plastic; agusar iti pangablat kadagiti ngilaw; sagádan dagiti murkat, lamawen dagiti nasnas, kadarato a dalusan dagiti wool ken ipempen ida kadagiti maserraan a bag. Isingasing ti Wellness Letter a no adda latta dagiti ipes, padasenyo nga usaren dagiti napigket a pagtiliw wenno mangiwarasiwiskayo iti boric acid iti likudan dagiti aparador, ngem annadanyo a di masagid dagiti ubbing ken taraken dagitoy a produkto.
Programa ti TV Para Kadagiti Ubbing—Naranggas Unay
Inkonklusion ti panagadal iti network ti television ti America nga adda nakaro unay a “makadidigra a naranggas a panaglalaban” iti adu a programa a naipamaysa kadagiti ubbing. Sigun iti The Wall Street Journal, pinili ti panagadal idiay University of California idiay Los Angeles ti sumagmamano a nalatak a serye ti cartoon a naglaon iti “kinaranggas tapno maipakita ti kinaranggas.” Kadawyanna a maipabuya dagiti programa no agsapa ti Sabado, no awan klase dagiti ubbing ken saan pay a nakariing dagiti dadakkelda. Nupay saan a kabbaro daytoy a kita ti programa, nasarakan ti panagadal a dagiti “dakes a singasing ken nakaro a rinnanget kadagitoy a pabuya ti mangbukel iti kalalainganna a nabiit pay nga uso a panangipabuya iti kinaranggas nga agparang a dumegdegdeg.”
Nakaskasdaaw a Kayo
Natakuatan dagiti sientista a taga Britain dagiti bukel a mangdalus iti mainum a danum a din mausar dagiti nangina a kemikal. Ipadamag ti The Times ti London a dagiti mataltal a bukel ti kayo a Moringa oleifera idiay amianan nga India ti mangallukoy ken kumpet iti bacteria ken virus, a mayakayak wenno matnag kadagiti palonapin ti filter. Mausar pay dagiti nasamay a bukel kas pagaramid iti manteka, sabon, kosmetiko, lana ti silaw, ken agas kadagiti impeksion ti kudil. Nalaka nga imula ti kayo, madaeranna ti tikag, manglapped iti napigsa nga angin, ken mausar pay a pagsungrod ken derder a pagaramid iti papel. Kabayatanna, isingasing dagiti managsirarak ti pannakaimula dagitoy a kayo tapno mangpataud kadagiti bukel a makatulongto a manglapped iti pannakatay ti minilion iti kada tawen a resulta ti iyiinum iti namulitan a danum.
Nakuttong Unay?
Iti kagimongan a napalaus ti panangpanunotna iti langa, adu ti mangikuna nga imposible ti agbalin a nakuttong unay. Mabalin a kasla suportaran daytoy a kadawyan a panangmatmat ti nabiit pay a panagadal a mangpatpatalged kadagiti peggad ti kinalukmeg iti salun-at, ngem kayat nga ipakaammo ti autor ti panagadal a ni JoAnn Manson ti Harvard University a peggad met iti salun-at ti panagbalin a nakakutkuttong. “Patiek nga agbalinkayo a nakakutkuttong no saan nga umno ti nutrision, napalalo ti panagehersisio, wenno panagsigarilio,” naadaw a kinunana iti The Wall Street Journal. Iti panangisitarna iti sumagmamano a doktor a mangkondenar kadagiti pagdaksan ti napalalo a panagdieta, ilista ti Journal ti sumagmamano a peggad ti saan a natural a kinakuttong, nalabit 20 porsiento a nababbaba ngem ti promedio a kadagsen ti katayag ti maysa. Dagitoy ti anorexia, osteoporosis, pannakadadael ti normal nga andar dagiti hormone, pannakatnag, pannakapilay, ken nabannayat a panagimbag.
Kagat ti Uleg—No Aniat’ Di Aramiden
No maipapan iti panangagas kadagiti nakagat iti uleg, kanayon nga agsisimparat dagiti eksperto. Nupay kasta, sigun iti magasin nga FDA Consumer, kaaduan a propesional iti medisina ti U.S. ti “gistay sangsangkatunos dagiti paniriganda no ania ti di aramiden.” No 30 agingga iti 40 a minuto ti kaadayom iti ospital wenno klinika, ti balakad ket: Dika mangikabkabil iti yelo iti nakagat a paset, dika mangusar iti tourniquet wenno electric shock, ken dika sugsugaten ti nagkagatan. Ti singasing a patien ti adu isut’ nagita man wenno saan ti uleg, rumbeng a maagasan kas medikal nga emerhensia amin a nakagat iti uleg, ken rumbeng a maipan a dagus ti biktima iti ospital. Ti kasayaatan a panglapped isut’ “di panangsinga kadagiti uleg. Adu a tattao ti makagat agsipud ta ikagumaanda a patayen ti uleg wenno umasideg a mangkita iti dayta,” kuna ti FDA Consumer.
Pakdaar Kadagiti Managay-ayam iti Soccer
Iti soccer, ti kalalatakan nga sport iti lubong, tiruen dagiti managay-ayam ti bola babaen kadagiti uloda. Nupay kasta, pakaigapuan daytoy ti pannakadadael ti utek no masansan a maaramid, kuna ti periodiko a Jornal do Brasil. Sigun iti nabiit pay a panagadal, agsagaba dagiti managay-ayam iti soccer iti pannakapukaw ti memoria ken kumapuy ti utek gapu iti panangusarda iti uloda a pangtiro iti bola. Nupay saan unay a grabe, maipada ti pannakadangran iti mapasamak iti dadduma a boksingero a masansan a matiruan ti uloda. Isingasing ti neurologist a ni Paulo Niemeyer Filho a rumbeng a liklikan dagiti managay-ayam ti panangusar kadagiti uloda a pangtiro iti bola no matnag dayta manipud iti ngato nga addaan puersa wenno no nabasá, nga ad-adda a mangpadagsen iti bola. Patien ti dadduma nga eksperto a mabalin met a mangdadael iti panagkita ti managay-ayam no napalalot’ pannakausar ti ulo a pangtiro iti bola.
Makaakar Dagiti Napudno nga Isem
Adda dua a kita ti isem, sigun kadagiti managsirarak a taga Finland a da Dr. Jari Hietanen ti University of Tampere ken Dr. Veikko Surakka ti Institute of Biomedicine idiay University of Helsinki. Maysa a kategoria ti isem ti pagaammo dagiti eksperto kas sosial nga isem. Maaramid dagitoy babaen laeng iti pannakarikna iti obligasion ken iramanda laeng dagiti masel ti pingping. Dagiti napudno nga isem, iti kasumbangirna, ti mangyebkas iti napudno a rikna ti ragsak ken mamagbalin nga aktibo saan laeng a kadagiti masel ti pingping no di pay ket kadagiti masel iti aglawlaw ti mata. Isingasing ti nabiit pay a panagadal manipud Finland a makaakar dagiti napudno nga isem. Babaen ti panangammo ken panangirekord iti nagbassit a panagtignay dagiti masel, naammuan dagiti managsirarak a natignay nga immisem dagiti tattao a pinageksperimentuanda babaen laeng iti panangkitada iti maysa a retrato ti tao a napudno ti isemna. Saan a naimatangan daytoy a reaksion idi a dagiti tattao a pinageksperimentuanda ti nangkita iti retrato dagiti tattao a nangipakita iti sosial nga isem.
Napaay Dagiti Astrologo
Sigun iti Aleman a periodiko a Die Zeit, 44 nga astrologo idiay Netherlands ti nabiit pay a situtulok a nagpasubok iti insagana ti Dutch Society of Skeptics. Dua a listaan ti naited kadagiti astrologo. Naglaon ti maysa iti lugar ken petsa ti pannakaipasngay ti pito a tattao. Nangipaay ti maikadua iti adu a personal nga impormasion maipapan iti saggaysa kadagiti pito a tattao. Nayimtuod kadagiti astrologo nga itupagda ti saggaysa a tao iti umuna a listaan iti bukod a pannakailadawan ti tao iti maikadua a listaan babaen ti panangusarda iti kinasigoda kano iti astrolohia. Kasanot’ kaballigida? Kagudua kadagiti astrologo ti saan a nakasungbat iti uray maysa la koma nga umiso, ket awan ti nakaitupag a siuumiso iti nasursurok ngem tallo. Nangpataud dagiti napalabas nga eksperimento kadagiti umasping a resulta, ngem kinuna dagiti astrologo a naikkanda iti kamali nga impormasion. Iti daytoy a kasasaad, nupay kasta, intuyang a mismo dagiti astrologo dagiti probision ti pannubok.