Manipud Managbasatayo

Katan-okan nga Artist Pagyamanan kadagiti serye ti “Panangsapul iti Katan-okan nga Artist.” (Nobiembre 8, 1995) Kas maysa nga artist, apresiarek unay dagiti artikulo. Ti adu a kinanadumaduma ti panamarsua ti Dios, ti poetiko nga arte ti Salmo, ken dadduma a nagsayaat pannakaisaoda a paset ti Biblia ti mangipakita a saan laeng a mangparparsua ni Jehova iti arte no di pay ket tagtagiragsakenna dayta!

B. R., Estados Unidos

Tangay nainaigak iti arte iti nasuroken a 30 a tawen, kayatko a komendaran amin a nakipaset iti pannakaisagana ti kasta a nagsayaat nga artikulo! Daytat’ siam a panid ti ekselente a lohika ken pannakirinnason maipapan iti naindaklan a Diostayo, ni Jehova, ken dagiti dinamiko nga abilidadna a mamarsua.

P. M., Estados Unidos

Dagiti Mormon Nabasak ti artikulo a “Ti Mormon Church​—Pannakaisubli ti Isuamin a Banag?” buyogen iti gagar. (Nobiembre 8, 1995) Napadakkelak iti sangakabbalayan a Mormon ken nabautisaran sa naordinan iti kinapadi kas Mormon sakbay a nagbalinak a maysa kadagiti Saksi ni Jehova. Ngem adda maysa a salaysay a naginteresak unay. Kunayo a “ti salaysay [dagiti Mormon] iti basol ti immuna a kasado a pagassawaan inramanna ti seksual a panagdenna ken panagpasngay.” Iti madanon ti lagipko, naisuro idi kadakami a nagbasol da Adan ken Eva babaen iti pannanganda iti literal a prutas.

D. A., Estados Unidos

Dispensarendakami no medio nakariro daytoy a salaysay. Dimi kayat a sawen a patien dagiti Mormon a ti basol a mismo isut’ seksual a panagdenna, nupay mabalin a kastoy ti maawatan ti maysa iti salaysay ti “Book of Mormon.” (2 Nephi 2:22, 23, 25) Imbes ketdi, kinunami a ti basol “inramanna” ti sekso. Kasano? Iti pamay-an a, sigun iti teolohia ti Mormon, linukatanna ti dalan tapno agpaadu ti tao. Sigun iti libro a “Mormon Doctrine,” ni Bruce R. McConkie, sakbay ti panagbasolna, “saan a makapagputot [ni Adan]. . . . Sigun iti nasaksakbayen a plano, agbasol ni Adan . . . Makapagputoten idi nagbalinen a mortal.” Iti kasumbangirna, saan nga isursuro ti Biblia a kasapulan nga agbasol ni Adan tapno makaputot. (Genesis 1:28) Wenno kunaenna a ti panagbasolda ket maigapu iti nasaksakbayen a plano ti Dios. Imbes ketdi, kunana a gapu iti bukodda a tarigagay nga agwaywayas. (Eclesiastes 7:29) Isu a nupay pagraemanmi ti kalintegan dagiti Mormon a patien ti aniaman a kayatda, iyilustrar daytoy a banag a nalawag a saan a maitunos iti Biblia dagiti pannursuro iti “The Book of Mormon.”​—ED.

Kas tao a talaga a pulos a di makaammo no ania ti masaritana maipapan kadagiti Mormon, makunak a talaga a naisuroak maipapan kadakuada itan, gapu kadagitoy nga artikulo. Kasano a makuna dagiti Mormon a patienda nga agpada ti Biblia ken ti The Book of Mormon a nagtaud iti Dios ngem saanda a maawatan nga agkontrada?

J. M., Estados Unidos

Pornograpia iti Computer Kayatko ti agyaman kadakayo iti paset ti “Panangmatmat iti Lubong” a “Pornograpiko a Computer a Magun-odanen Dagiti Ubbing.” (Nobiembre 8, 1995) Binasak daytoy, ket gistay nagsardeng a nagpitik ti pusok! Talaga nga impakitana ti kinakaro ti peggad dagitoy a programa ken ti kinalakada a magun-odan dagiti ubbing. Tumulongto daytoy nga artikulo kadagiti Kristiano a mangtingiting kadagiti positibo ken negatibo nga aspeto a mainaig iti kasta a teknolohia ti computer.

D. P., Estados Unidos

Parnuayen-Taraon a Sakit Tinagiragsakko ti artikuloyo a “Salaknibanyo ti Bagiyo Manipud Parnuayen-Taraon a Sakit.” (Nobiembre 22, 1995) Agtartrabahoak kas maysa a kosinero, ket kayatko ti agkomento. No tagtagiragsaken ti maysa ti mangan iti manmano a karne, mabalin a saan a posible daytoy iti lugar a pakaseknan ti panangliklik iti parnuayen-taraon a sakit. Pudno, ti panangluto iti karne iti nabarbara a temperatura pagmagaenna ti karne ken mabalin a mangparigat iti panagtunaw. Ti nasayaat a pamay-an ti panangluto a naimbag iti karne ken panamagtalinaed iti tubbogna isut’ panangilauya wenno nakaluban a panagluto iti dayta a naalay-ayan ti apuyna.

J. P. K., Estados Unidos

Pagyamanan iti tip maipapan iti panagluto.​—ED.