Manipud Managbasatayo

Dagiti Konsierto ti Rock Sangkapanunotko a medio adda dasdasigan ti artikulo nga “Agimtuod Dagiti Agtutubo . . . Mapanak Aya Kadagiti Konsierto ti Rock?” (Disiembre 22, 1995) Napanak iti maysa a konsierto ti rock a kaduak ni nanangko. Daytat’ kadaanan a banda, ket natalna ti bunggoy. Ngem saan man la nga intampok ti artikulo ti posibilidad a masarakan ti disente a konsierto.

S. A., Estados Unidos

Dagiti posible a peggad ti konsierto ti rock ti intampok ti artikulo. Nupay kasta, dikam nangaramid iti naan-anay a panangkondenar iti itatabuno kadagita a pasken. Kinunami kadagiti managbasa: “No planoyo ti mapan iti maysa a konsierto, agdamagkayo.” Naipaay ngarud ti impormasion a tumulong kadagiti agtutubo ken kadagiti dadakkelda a mangaramid iti natimbeng a desision.​—ED.

Kayatkay a pagyamanan iti artikulo. Sumagmamano a lawas sakbay a naawatko ti magasin, sumagmamano kadakami ti napan iti maysa a konsierto. Nalaaw, ket adut’ nakainum sadiay; saan a lugar daydi para kadagiti Kristiano. Talaga a nakasursuroak iti kamalik ket manginanamaak a kasta met dagiti sabsabali.

M. E., Estados Unidos

Costa Rica Adda kayatko a lawlawagan maipapan iti artikulo a “Costa Rica​—Bassit a Pagilian, Adu a Nagdudumaan.” (Hulio 8, 1995) Kinunayo a “nasalakniban ti ag-27 porsiento iti lugar, ti kadakkelan a proporsion ti aniaman a pagilian iti lubong.” Nupay kasta, sigun iti World Almanac, nangireserba ti Ecuador iti pagitalimengan a gistay 40 a porsiento iti dagup a kalawa ti dagana.

M. E., Ecuador

Pagyamanan iti pananglawlawagyo.​—ED.

Mali Nakaluaak iti rag-o idi nabasak ti artikulo a “Ti Kaunaan Idiay Mali.” (Disiembre 22, 1995) Makapabileg iti pammati ti espiritu ti kooperasion dagiti miembroyo idiay Mali. Nakiam-ammoakon kadagiti Saksi ni Jehova tapno rugiandak a suruan iti Biblia. Determinadoak a makikadua kadagiti miembroyo nga agdayaw iti Dios.

D. C. A., Nigeria

Tourette Syndrome Kayatko nga iyebkas ti panagyamanko iti artikuloyo a “Ti Karit iti Biag ti Addaan Tourette Sydrome.” (Disiembre 22, 1995) Napukaw dagiti sintomasko idi arinunos ti kinaagtutubok. Ngem saan nga amin ti napagasatan iti kasta. Makagunggonanto a tulong daytoy nga artikulo kadagita a tattao ken dagiti pamiliada.

Y. L., Francia

Am-ammok ti maysa nga ubing nga addaan iti kasta, ket agingga ita, isut’ likliklikak agsipud ta napabainanak idin a nakikadua kenkuana. Diak pulos naamiris a mabalin a nakarkarot’ bainna maipapan iti dayta ngem kaniak!

P. M., Italia

Addaanakon iti kastoy a sakit sipud pay idi agtawenak iti lima, ket kasta unay ti panangpaleddaangna kaniak. Addaanak iti muscular ken vocal tics. Dikam maawatan kadagiti dadakkelko no apay a mapasamak dagitoy tics; madanaganda di la ket ta adda kamali iti panangpadakkelda kaniak. Nagkararagak ken Jehova tapno tulongannak a makaawat, ket sinungbatannak babaen itoy nga artikulo. Naparegtaak unay a mangbasa kadagiti kapadasan ti dadduma kadagiti Saksi ni Jehova nga addaan iti isu met la a sakit.

Y. K., Japan

Nagbiagakon iti kastoy a kasasaad iti gistay amin a panagbiagko, ngem idi laeng 1983 a naammuak no ania dayta. Idi ubingak pay, pagaangawandak dagiti dadduma. Ngem kanayon a naayat unay dagiti kakabsat idiay Kingdom Hall ket inawatda dayta kas paset [ti kinataok]. Idi agangay, nagayatak iti maysa nga agtutubo a Kristiano a lalaki. Ammona unay ti problemak. Nupay impagarup ni tatangko a saan nga agpaut ti panagasawami, maragsakanak a mangibaga a 30 a tawenen ti napalabas ngem naragsakkami pay laeng kas agassawa. Kanayon a tratuennak ni lakayko a kas balitok ket pulos a dina impalubos a ti problemak ti mangsinga wenno mangpabain kenkuana.

F. H., Canada