Manipud Managbasatayo
Krisis Kadagiti Eskuelaan Agur-urayak iti maysa a paradaan ti bus idi adda nangted kaniak iti ruar a “Krisis Kadagiti Eskuelaan.” (Disiembre 22, 1995) Napaneknekan nga ad-adda a makagunggona ngem iti intero a libro a nabiit pay a binasak maipapan iti tema. Agyamanakto unay no adda maipatulod a suskripsion nga Agriingkayo! iti pagtaengak.
V. C., Estados Unidos
Ti paset maipapan iti Teokratiko nga Eskuelaan ti Panagministro ti nangipalagip kaniak idi ages-eskuelaak pay laeng. Kasapulan idi a mangtedak iti maipalawag a report ngem limitado pay laeng idi ti ammok nga Ingles. Idi nairingpasko ti presentasionko, kinuna ti maestrok a komendarannak unay ket siak laeng ti kakaisuna nga addaan iti nasayaat a postura ken panangmatmat iti tallaong. Naaramidak daytoy gapu iti ekselente a panangsanay a maaw-awatmi iti Teokratiko nga Eskuelaan ti Panagministro idiay Kingdom Hall.
G. A., Estados Unidos
Diak nga impagarup idi a dagitoy nga artikulo ti mangparegta unay kaniak. Idi ages-eskuelaak, okupado unay dagiti dadakkelko kadagiti bukodda a problema isu nga awan tiempoda tapno iwanwandak. Kas resultana, adda idi dagiti tiempo a nalidayak bayat nga ages-eskuelaak. Gapu kadagiti artikulo a kas kadagitoy, naamirisko nga ipatpateg ni Jehova dagiti agtutubo ket dina ida kayat a makarikna nga agmaymaysada iti daytoy a lubong.
M. M., Estados Unidos
Mali Nagsayaat ti artikulo a “Ti Kaunaan Idiay Mali” (Disiembre 22, 1995). Namitlon a binasak. Sapay koma ta ti kasasaadko palubosannak nga agbalin a misionero! Ti artikulo ti nangipaamiris met kaniak nga adu a tattao ti awanan kadagiti pagnam-ayan a tagtagiragsakenmi ngem kaskasdi a naragsakda. Anian a naintiempuan a pammalagip!
D. L., Estados Unidos
Dagiti Tumayab a Bato Sumagmamano pay la nga aldaw ti napalabas, pampanunotek idi ti nagdumaan ti layap ken meteorite. Darepdepenyo ti pannakasorpresak idi nabasak ti artikulo a “Dagiti Tumayab a Bato” (Disiembre 8, 1995) a nangilawlawag itoy a punto. Pagyamanan iti panangipablaakyo kadagiti artikulo a mangyam-ammo kadatayo kadagiti panamarsua ni Jehova.
R. P., Switzerland
Panagsursuro ken ni Andrew Kabasbasak ti artikulo maipapan iti agtutubo a lalaki nga addaan iti Down’s syndrome, “No Ania ti Nasursuromi ken ni Andrew.” (Disiembre 8, 1995) Adda met anakmi nga adda kurkurangna, ket adu kadagiti komento dagiti dadakkel ni Andrew ti mangyanninaw no kasano ti panagriknami a mismo. Masansan a narigat a maapresiar dagiti Kristiano a kakabsatmi dagiti naisangsangayan a pakarigatan nga ipaay ti adda kurkurangna nga anak ken dagiti emosional a rigat a mapasaran ti pamilia. Isu a pagyamanan iti artikulo.
J. B., Inglatera
Patiek a daytoy ti maysa kadagiti kapintasan ken sensitibo nga artikulo nga impablaakyo. Iti tallo la a panid, naiparang ti intero a salaysay no kasano ti rumbeng a panangmatmatmi kadagidiay addaan pakalappedan. Inyallatiwna ti napateg a leksion maipapan iti natauan a relasion.
M. L., España
Idi apagtapog daytoy a tawen, nangipasngay ni baketko iti lalaki nga addaan iti Down’s syndrome. Kas kadagiti dadakkel ni Andrew, napasaranmi ti rikna ti adu a nagannak idi maammuanda a baldado ti maladagada—leddaang ken liday agraman salsaludsod maipapan iti agdama ken iti masakbayan. Iti biangmi, naawatmin ti kinabaldado ti anakmi. Innem a bulannanton, ken napartak ti idadakkelna. Ti aldaw kalpasan a naipasngay, kasta unay ti ragsak ni baketko iti adu a simmarungkar a Kristiano a kakabsatmi. Talaga a nariknami ti kaipapanan iti kaadda ti naespirituan a pamilia. Ket malaksid iti ayat dagiti kakabsatmi, adda ni Jehova. Pagyamanan iti daytoy nga artikulo.
G. C., Francia