Barkada Dagiti Babbai—Makapadanag ti Panagrairana
“NAUYONG, naranggas, ken brutal” ti sasao nga inusar ti periodiko a The Globe and Mail a pangiladawan iti barkada dagiti babbai kadagiti high school idiay Canada. Tangay naumadan a makibarkada kadagiti lallaki, umad-adu a babbai ti mangipatpatangken iti kinawaywayasda. Napaliiw ti maysa a detektib ti polisia idiay Toronto, a batidona ti barkada dagiti agtutubo, a dagiti babbai ti “mangipatpatangken iti bagida iti nakarangranggas a pamay-an.” Situtulokda a “mangusar kadagiti igam ken ‘nakaro’ a puersa” ken “masansan a nauy-uyong ken naag-agresiboda ngem kadagiti katupagda a lallaki,” kinuna ni Dr. Fred Mathews iti Globe. Apay? Ti nalatak a kapanunotan kadagita a nasubeg nga agtutubo, sigun iti maysa a konstable ti polisia, ket “mabalin nga ab-ababa a tiempo ti sentensia [ti babbai] iti pagbaludan no matiliwda.” Imbaga ti maysa a pannakangiwat ti polisia iti Globe a “nairamanen dagiti babbai nga agtawen iti 11 laeng kadagiti babassit a krimen ken panaglako iti maiparit nga agas ken igam kadagiti high school.”
Pinagsaludsodan ni Dr. Mathews, maysa a sikologo kadagita a kinaranggas, dagiti miembro ti barkada dagiti babbai maipapan iti sangapulo-tawen a tiempo ket natakuatanna a “makaunget ken rebelioso[da], a kaaduan ti naggapu kadagiti abusado wenno nariribuk a pamilia.” Aniat’ pakaallukoyan dagita nga agtutubo kadagiti barkada? Mangitukon dagiti barkada iti “rikna ti panagbalin a paset ti maysa a grupo ken kinatalged,” kuna ti maysa a dati a miembro. Nupay kasta, idi pinagsaludsodan ti periodiko, inaminna a naminduan a nagpanggep nga agpakamatay tapno malibasanna ti barkada sa impasarunsonna: “Adu kadagiti maaw-awagan nga aksidente nga ipapatay ken panagpakamatay kadagiti siudad ti kinaagpaysuanna a pinatay dagiti barkada. Agsisinnalaknibkayo no addaka iti maysa a barkada. Ti problema ket saanmo a masalakniban ti tunggal maysa manipud kadagiti mismo a kabarkadam.”
Maysa a maseknan a maestro ti high school ti nagkuna: “Talaga a naan-anay a di mapakpakadaan dagiti naranggas a babbai a pakilanglangenanmi. No makaungetda, saanmo nga ammo no aniat’ naranggas nga aramidenda. Ket no sika ti maestro, talaga a mapabutnganka.” Maipapan “kadagiti maudi nga al-aldaw,” impadto ti Biblia a dagiti panawen ket “narigat a pakilangenan” agsipud ta ti tattao, agraman dagiti agtutubo, ket “awanan panagteppel, nauyong.”—2 Timoteo 3:1-5.