Ti Kasayaatan a Gayyemtayo Adda iti Lubong Dagiti Espiritu

MANGTED ti Biblia kadatayo iti nabatad a panangiladawan kadagidiay agindeg iti lubong dagiti espiritu. Ni Jehova a Dios ti katan-okan idiay langit. Ni Jesu-Kristo sumaganad ken Jehova iti pannakabalin ken autoridad. Dagiti anghel a matalek iti Dios agserbida a ministro ti Dios ken kadagiti tattaona ditoy daga. Ni Satanas ken dagiti demoniona busorenda ti Dios ken allilawenda dagiti tao. Maturog ken patay dagiti tao agingga a pagungarento ti Dios ida.

Tarigagayan Dagiti Demonio ti Panagdayawtayo

Tangay awan biag dagiti natay, awan ti maganabtayo iti panangdayaw kadakuada. Ti panagidaton kadagiti natay pakaruenna laeng ti kinaulbod ni Satanas ken dagiti demoniona.

Tarigagayan kadi dagiti anghel ti Dios ti panagdayawtayo? Talaga a saan! Agdaydayaw dagiti matalek nga anghel iti Dios ket paregtaenda dagiti tao a mangaramid iti kasta. Pinadas ni apostol Juan a dayawen dagiti anghel iti namindua a daras, ngem tinubngarda, a kunkunada: “Agannadka! Dika aramiden dayta! . . . Agdaydayawka iti Dios.”​—Apocalipsis 19:10; 22:8, 9.

Maisupadi kadagiti matalek nga anghel, tarigagayan ni Satanas ken dagiti demoniona ti madaydayaw ken maitan-ok. Nabatad daytoy idi sinulisog ni Satanas ni Jesus idi a ni Jesus maysa a tao ditoy daga. Isalaysay ti Biblia: “Impan ti Diablo [ni Jesus] iti maysa a bantay a di gagangay ti kangatona, ket imparangna kenkuana dagiti isuamin a pagpagarian ti lubong ken ti dayagda, ket kinunana kenkuana: ‘Isuamin dagitoy a bambanag itedkonto kenka no agruknoyka ken mangaramidka iti maysa a tignay a panagdayaw kaniak.’”​—Mateo 4:8, 9.

Simmungbat ni Jesus: “Pumanawka, Satanas! Ta adda a naisurat, ‘Ni Jehova a Diosmo ti masapul a daydayawem, ket kenkuana laeng ti masapul a pangipaayam ti sagrado a panagserbi.’” (Mateo 4:10) Ammo ni Jesus ti Linteg ni Jehova, ket dina kayat a labsingen dayta.​—Deuteronomio 6:13.

Nupay di nabaelan ni Satanas a pinagdayaw ni Jesus kenkuana, nagballigi kadagiti sabsabali. Siempre, manmano a tattao ti mangigagara nga agdayaw ken Satanas. Nupay kasta, babaen iti kinasikap, panangallilaw, kinaulbod, ken panagbuteng, intallikud ni Satanas ken dagiti demoniona ti adu a tattao iti nadalus a panagdaydayaw ken Jehova ta insurat ni apostol Juan: “Ti intero a lubong adda iti [pannakabalin] daydiay nadangkes.” (1 Juan 5:19) Dagidiay agdaydayaw iti pamay-an a maikontra iti Sao ti Dios padayawanda ni Satanas, saan a ni Jehova. Mamakdaar ti Biblia: “Dagiti bambanag nga isakripisio dagiti nasion isakripisioda kadagiti sairo, ket saan nga iti Dios.”​—1 Corinto 10:20.

Kukua ni Jehova ti Panagdayaw

Rumbeng a maiturong laeng iti Dios ti panagdayawtayo. Imbaga ni Jehova ken Moises: “Awanto ti sabali a diosmo iti sangok. Dika mangaramid iti maipaay kenka a ladawan a kinitikitan wenno uray ania a katulad ti adda idiay ngato sadi langit wenno ti adda iti baba ditoy daga wenno ti adda iti danum iti uneg ti daga. Saanka nga agruknoy kadakuada wenno maallukoy nga agserbi kadakuada, agsipud ta siak ni Jehova a Diosmo maysaak a Dios a makasapul ti naipamaysa a debosion.”​—Exodo 20:3-5, NW.

Nupay nakaam-amak ti kinatan-ok ni Jehova, isut’ nalaka nga asitgan. Insurat ni adalan a Santiago: “Umadanikayo iti Dios, ket isu umadaninto kadakayo.” (Santiago 4:8) Insurat ni apostol Pablo: “[Ti Dios] saan nga adayo manipud iti tunggal maysa kadatayo.” (Aramid 17:27) Ken insurat ni apostol Juan: “Daytoy ti adda kadatayo a panagtalek ken [Jehova], nga, uray no ania ti dawatentayo maitunos iti pagayatanna, denggennatayo. Kanayonanna, no ammotayo a denggennatayo maipapan iti aniaman a dawdawatentayo, ammotayo a maaddaantayonto kadagiti bambanag a dinawattayo yantangay dinawattayo ida kenkuana.”​—1 Juan 5:14, 15.

Paliiwenyo nga insurat ni Juan a patgan ni Jehova dagiti kiddawtayo no agdawattayo a “maitunos iti pagayatanna.” Tapno maammuantayo no ania ti pagayatan ti Dios, masapul nga ammuentayo ti isursuro ti Biblia. Maragsakanto dagiti Saksi ni Jehova a tumulong kadakayo a mangtarus iti Biblia.

Bayat nga umadu ti maammuanyo maipapan ken Jehova, magun-odanyonto ti ad-adu a pannakaammo maipapan kadagidiay agindeg iti lubong dagiti espiritu. Daytoy a pannakaammo wayawayaannakayo iti an-anito, dagiti patpatien, ken tradision nga us-usaren ni Satanas a mamutbuteng ken mangbalud kadagiti tao. Babaen iti umiso a pannakaammo iti Dios, masursuroyonto ti agtalek kenkuana a tulongannakayo a mangliklik wenno mangparmek kadagiti inaldaw-aldaw a parikut iti biag. Mabalin a makigayyemkayo iti Dios. Ket ti Dios mapaneknekanto a “kamang ken bilegyo, sidadaan a tulong bayat ti panagdukot.”​—Salmo 46:1, NW.

Dagiti Dakes a Buyot a Mapukawto

Dikay koma agduadua nga abakento dagiti buyot ti espiritu a naimbag dagiti buyot ti espiritu a dakes. Nalpasen ti gubat iti lubong dagiti espiritu a nangdalus iti langlangit ken Satanas ken dagiti dakes a kakaduana. Kuna ti libro nga Apocalipsis: “Bimtak ti gubat sadi langit: Ni Miguel [ti napagungar a Jesu-Kristo] ken dagiti anghelna nakibakalda iti dragon, ket ti dragon ken dagiti anghelna nakibakalda ngem saan a nangabak, awan met nasarakanen a lugarda idiay langit. Gapuna naitappuak ti dakkel a dragon, ti kadaanan a serpiente, daydiay naawagan iti Diablo ken Satanas, a mangiyaw-awan iti intero a mapagnaedan a daga; isu naitappuak iti daga, ket dagiti anghelna naitappuakda a naikanunong kenkuana.”​—Apocalipsis 12:7-9.

Ania ti resulta dayta a gubat? Ituloy ti report: “Gapu itoy agragsakkayo, dakayo a langlangit ken dakayo nga agnaed kadakuada! Asi pay ti daga ken ti baybay, agsipud ta ti Diablo immulog kadakayo, nga addaan iti dakkel nga unget, yantangay ammona nga ababan ti periodo ti tiempona.” (Apocalipsis 12:12) Mabalin nga agragsak dagidiay adda iti langlangit, tangay awanen sadiay ni Satanas ken dagiti demoniona a mamataud iti riribuk. Ti pannakaitapuakna manipud langit, nupay kasta, nangyeg iti adu a ladingit, dakkel a rigat, kadagidiay agnaed iti daga. Agbibiagtayon iti dayta a tiempo ti ladingit.​—2 Timoteo 3:1-5.

Masanguanan nga Awanan iti Dakes

Ngem, mangitukon met ti Biblia iti namnama. Ipanamnamana kadatayo a ti Diablo “ababan ti periodo ti tiempona” sakbay ti pannakapukawna. No mapasamak dayta, ni Jehova mangyegto kadagiti nakaskasdaaw a bendision iti amin [nga adda] ditoy daga a mangsapul iti pannakipagayamna. Usigenyo ti sumagmamano kadagiti karina iti masanguanan:

“Addanto kinaruay ti bukel iti daga iti tapaw dagiti bambantay; ti bungada margaayandanto.”​—Salmo 72:16.

“Dagiti pinilik agragsakdanto iti mabayag iti aramid dagiti im-imada. Isuda didanto agtrabaho iti ubbaw.”​—Isaias 65:22, 23.

“Ti agtaeng dinanto kunaen: ‘Masakitak.’”​—Isaias 33:24.

“Iti kasta maluktanton dagiti mata ti bulsek, ken dagiti lapayag ti tuleng maluktandanto. Iti kasta aglagtonto ti pilay a kas maysa nga ugsa, ken ti dila ti umel agkantanto.”​—Isaias 35:5, 6.

“Ket punasennanto [ti Dios] ti amin a lua kadagiti matada, ket awanton ni patay, awanto metten ti panagleddaang wenno panagsangit wenno ut-ot. Dagiti immuna a bambanag naglabasdan.”​—Apocalipsis 21:4.

“Ti sililinteg tawidendanto ti daga, ket agtaengto kenkuana nga agnanayon.”​—Salmo 37:29.

Ni laeng Jehova, ti pudno a Dios, ti makatungpal kadagita a naindaklan a kari. Awan ti mangpasardengto kenkuana a mangaramid iti panggepna. “Iti Dios awan ti deklarasion a saanto a mabalin.”​—Lucas 1:37.

[Dagiti ladawan iti panid 9]

Apaman a gayyemnakan ti Dios, tulongannakanto a mangtaming kadagiti parikut iti biag