Ti Taraon—Banag a Pakaseknan
“INKA iti dalanmo, kanem a sirarag-o ti tinapaymo,” kuna ti Biblia iti Eclesiastes 9:7. Ti pannangan, kinapudnona, saan laeng a nasken no di maysa met kadagiti kangrunaan a pakaragsakan iti biag.
Amirisem ti 34-anyos a ni Thomas. Pagay-ayatna ti agsida iti karne. Ket inaldaw a mangan iti dayta—masansan a mamin-adu a daras iti maysa nga aldaw. Ti gagangay a pagalmusarna ket gatas, sumagmamano nga itlog, tinapay wenno tostado nga adda mantekiliana, ken soriso wenno bacon. Kadagiti fast-food, agorder iti cheeseburger, French fries, ken milk shake. No mangan iti restawran, beefsteak ti pilienna a sidana. Mangidasar ti paboritona a restawran iti 680 gramo nga steak ken nayurno a patatas a naparabawan iti sour cream, ta kasta ti kayatna. Chocolate cake a naparabawan iti chocolate ice cream ti paboritona a dulse.
Ni Thomas ket lima a pie ken sangapulo a pulgada ti tayagna ken agdagsen iti 89 a kilo; sobra ti 9 a kilo ti dagsenna, sigun iti 1995 a pagannurotan ti gobierno ti E.U. iti taraon. “Diak madanagan iti kadagsenko,” kuna ni Thomas. “Nasayaat ti salun-atko. Diak pulos naglanglangan uray maysa nga aldaw iti trabaho iti las-ud ti 12 a tawen. Kaaduanna, nasayaat ti riknak ken naalibtakak—malaksid, siempre, kalpasan ti pannanganko iti 680 gramo nga steak.”
Ngem, ti kadi taraon ni Thomas addanto dakes nga epektona kenkuana, a mangin-inut a mamagbalin kenkuana a kandidato iti atake ti puso? Iti librona a How We Die, sarsaritaen ni Dr. Sherwin Nuland dagiti ‘makapapatay a pamay-an ti panagbiag’ ket inramanna ti taraon a ‘nalabaga a karne, dadakkel nga iwa ti bacon, ken mantekilia.’
Kasano a ti dadduma a taraon mangpasakit iti puso ti adu? Ania ti adda kadakuada a makagapu iti peggad? Sakbay a sungbatantayo dagitoy a saludsod, sukimatentayo a naimbag dagiti peggad ti kinalukmeg iti salun-at.
[Ladawan iti panid 3]
Apay a ti kasta a taraon banag a pakaseknan?