Panangmatmat iti Lubong
Bumasbassit Dagiti Miembro ti Simbaan
Mapapati nga idiay Estados Unidos, basbassit ngem iti kagudua kadagidiay napadakkel kadagiti naipasdeken nga iglesia ti Protestante iti napalabas a 30 a tawen ti nagtalinaed iti denominasionda idi adultodan. Mapattapatta a 78 a milion a tattao idiay Estados Unidos ti “di aktibo” a Protestante. Kaipapananna nga iyam-ammoda ti bagida kas Baptist, Episcopalian, Metodista, Presbyterian, wenno kameng ti dadduma nga iglesia Protestante, ngem saanda a miembro wenno tumabtabuno iti lokal a kapilia.
Negosiante iti Tulang
“Kalkalien dagiti desperado a residente iti dinadael-gubat a Kabul dagiti tulang ti tattao tapno ilako a mausar kas pagpakan iti manok,” ireport ti serbisio ti panagipadamag a Reuters. Ti tulang, a nabaknang iti calcium, phosphate, ken carbonate, maus-usar a pagaramid iti taraon ti animal, sabon, ken manteka. Ti rurog nga agdagsen iti agarup 6 a kilo ti aggatad iti 50 a sentimo, a dakkel metten a gatad ti kuarta iti dayta a nakapangpanglaw a siudad. “Narang-ay a negosio,” kuna ti 14 ti tawenna a ni Faizdeen. “Nupay masansan a tulang dagiti animal ti ur-urnongek, nalaklaka a masarakan ditoy ti tulang ti tattao.” Nakalkaldaang ta ti adu a tawen ti gerra sibil idiay Afghanistan pinagbalinna a nalaka a magun-odan daytoy tagilako a nabaknang iti mineral.
Saan la nga Oras ti Makita iti Relos
Idiay Rio de Janeiro, 77 nga estudiante ti nadiskualipikar kalpasan a natakuatan nga addaanda iti digital a relos a mausar a pangsaur iti eksaminasion tapno makastrekda iti unibersidad, kuna ti periodiko nga O Globo. Dagiti relos kasda la pager ti telepono; ngem imbes a numero ti telepono ti ipaayda, mangipaayda iti umiso a sungbat dagiti mangsubok a salsaludsod. Kuna ti periodiko a nagbayad dagiti estudiante iti $14,000 iti tunggal relos. Makapainteres ta sipud pay idi 1987, dagiti autoridad iti eskuelaan a mangpapaeksamen idiay Inglatera ken Wales ti namakdaaren kadagiti mannursuro a siputanda dagiti agkopkopia a mangus-usar kadagiti de-computer a relos.
Nadadael a Panagkita
Kaaduan a tattao a kumitkita iti sarming ti mangawat iti mayanninaw a ladawan a makitada—ti bagida. Ngem dagiti tattao nga adda diperensia ti bagida a pagaammo kas dysmorphic disorder ti mangkita iti bagida iti sarming ket makitada ti sabali a ladawan ti bagida. “Kasasaad dayta a ti la maysa a paset ti pampanunoten dagiti tattao, a dardarepdependa a nakaal-alas, idinto ta ti kinaagpaysuanna ket normal,” kuna ti The Province, iti British Columbia, Canada. Kuna ti sikiatrista iti New York a ni Eric Hollander a nakaro a tuok ti panangdarepdep kadagiti pakapilawan nga uray la agpanggep nga agpakamatay ti ag-25 porsiento kadagidiay agsagsagaba iti dayta a sakit.
Dagiti Kararag iti E-Mail
Nabayagen nga agaaripuno dagiti napasnek a Judio iti Pader a Pagdudung-awan idiay Jerusalem tapno agsangit ken agkararag. Masansan nga isurat dagiti managdaydayaw ti kararagda iti bassit a papel ken iselselda kadagiti rengngat ti pader. Nupay kasta, mabalinen nga ipatulod dagiti Judio iti intero a lubong ti kararagda iti E-mail babaen ti Internet. Sigun iti magasin a Computerworld, dagiti agtartrabaho manipud iti Web site ti Virtual Jerusalem ti mangurnong kadagiti kararag, iyimprentada ida, ken ipanda iti Pader a Pagdudung-awan, a sadiay, “sigun iti tradision dagiti Judio, awaten ti Dios ida.”
Kumarkaro ti di Kinabalanse ti Mateggedan
Sigun iti nabiit pay a report ti United Nations maipapan iti irarang-ay ti kagimongan, 83 porsiento iti mateggedan ti lubong ti mapan kadagiti kabaknangan a buklen ti 20 a porsiento iti populasion. Iti sabali a pannao, dagiti maurnong a kinabaknang ti 358 a bilionario iti lubong ti katupag ti napagdadagup a mateggedan ti 2,400,000,000 a kapanglawan a tattao. Idi 1960, ti promedio a tinawen a mateggedan dagiti tattao nga agnanaed kadagiti nabaknang a pagilian ket $5,700 a nasursurok ngem kadagiti tattao nga agnanaed iti napanglaw a pagpagilian. Idi 1993, nupay kasta, ti naggidiatan ti promedio a tinawen a mateggedan ti tunggal tao ket iti nagbaetan dagiti nabaknang ken napanglaw a pagilian ti dimmakkel agingga iti $15,400.
Historiko a Panagapit
“Inartapan dagiti makina a pagapit iti trigo ti panagapit ti tao idiay China iti damo unay a gundaway iti historia ti pagilian,” kinuna ti serbisio ti panagipadamag a Reuters. Kinunana a nausar ti nasurok a 800,000 a makina a pagapit. Ti trigo ket damo a naipan idiay China sakbay ti 1300 K.K.P. ken sibaballigi a napaadu kadagiti babassit a silong dagiti pamilia—kaaduanna babaen iti ima—manipud idin. Ngem no iti China a mangirepresentar iti nasurok a 20 porsiento iti populasion ti lubong, sa addaan iti 7 laeng a porsiento iti daga a mabalin a mulaan, “magagaran dagiti opisial iti agrikultura a mangitandudo iti pannakausar dagiti makina a pagtalon ken pagapit iti taltalon ti nasion,” kinuna ti report.
Parikut iti Seguro Dagiti Klero
Kaaduan nga iglesia ti addaan iti general liability insurance tapno masalaknibanda iti personal-injury claims. Nupay kasta, dadduma a kompania ti seguro idiay Estados Unidos ti nangrugin a mangikkat iti coverage para iti “seksual a basol” dagiti klero, kuna ti National Underwriter. Kinuna ni John Cleary, general counsel ti Church Mutual Insurance Company: “Adu . . . a liability policies ti di mangiraman iti seksual a basol agsipud ta inggagara a tignay dayta, talaga a krimen.” Kasta met a kinuna ni Donald Clark, Jr., ti abogado a mangirepresentar iti nadumaduma a grupo ti relihion, nga ipakita dagitoy a panagbalbaliw iti panangiseguro a “ti posible a pangta dagiti nakaro nga ibunga ti ekonomia para kadagitoy a kita ti aramid-tao a didigra ket nalabit ad-adda a makadadael ngem dagiti ibunga ti natural a didigra.” Manipud 1984, adda nag-claim iti Church Mutual, maysa kadagiti kangrunaan a mangisegseguro kadagiti iglesia idiay Estados Unidos, a 1,500 agingga iti 2,000 gapu iti seksual a basol, sigun ken ni Mr. Cleary.
Nalalaing Dagiti Estudiante ti Singapore
Nasurok a kagudua milion nga estudiante manipud iti 41 a nadumaduma a pagilian ti nageksamen iti 90 a minuto tapno mapagdidilig dagiti estandarte ti edukasion iti intero a lubong. Dagiti resulta? Ipakita dagiti naalada iti eksaminasion a mangpatpataud ti Singapore kadagiti kalalaingan nga estudiante iti lubong iti matematika ken siensia. Ti sumaruno iti Singapore, dagiti nagtalinaed a sangapulo a kalalaingan a pagilian iti naala iti matematika ket South Korea, Japan, Hong Kong, Belgium, Czech Republic, Slovak Republic, Switzerland, ti Netherlands, ken Slovenia. Dagiti kangangatuan a naala iti siensia ket ti Singapore, Czech Republic, Japan, South Korea, Bulgaria, ti Netherlands, Slovenia, Austria, Hungary, ken Inglatera. Kasano a ti nasion nga agarup 3,400,000 laeng ti umilina ti agparang a nalalaing ngem iti amin a dadduma a paset ti lubong? Nalabit gapu iti kinasaet. Mangbusbusbos dagiti estudiante idiay Singapore iti promedio nga 4.6 nga oras iti kada aldaw a mangar-aramid iti homework, idinto ta 2 agingga iti 3 nga oras ti internasional a promedio, kuna ti Asiaweek.
Kuarta a Naggapu iti Langit?
Naragsakan dagiti residente ti Overtown, maysa a napanglaw a kaarruba a purok iti Miami, Florida, idi kasla nagtinnag ti kuarta manipud langit. Ta gayam daydit’ saan a manna a naggapu iti langit, no di ket paset ti $3.7-milion a kuarta a natnag kadagiti kalsada iti baba idi a naidungpar ti armored truck iti maysa nga overpass iti ngatuen ti purok. Pattapattaen ti polisia nga agarup 100 a tattao ti nagdardaras a nagakup iti kuarta, ngem mabalin nga ad-adu pay. Sigun iti The New York Times, “inikkan ti polisia ti Miami dagiti nakaala iti kuarta iti 48 nga oras a mangisubli iti dayta a dida maakusar iti panagtakaw.” Ngem idi nagturposen ti amnestia, tallo laeng a tattao ti nangisubli iti kuarta, ket agarup $500,000 pay ti mapukpukaw. Maysa a 18 ti tawenna nga agtutubo ti naipadamag a nagkuna: “Pare, natnag dayta iti arubayan dagiti tattao. Aniat’ namnamaem nga aramidenda?”
Napagtalinaed Dagiti Pasiente iti Kalalainganna a Temperatura Kabayatan ti Operasion
Dagiti pagoperaan iti ospital a napagtalinaed a nalamiis tapno saan nga umadu dagiti itayab-angin a bacteria ti mamitlo nga agpeggad a maimpeksion, kuna ti baro a panagadal ti anesthesiologist ti University of California a ni Daniel Sessler. “Ti pakaimpeksionan ti sugat ket saan a talaga a bacteria a mayang-angin,” kuna ni Dr. Sessler, “no di ti kimmapuy a resistensia ti pasiente kadagiti bacteria iti kudil wenno iti uneg ti bagi.” Dagiti nalamiis a pagoperaan ti mangpababa iti temperatura iti bagi ti pasiente agingga iti 4 degrees Fahrenheit. Ket ti nababa a temperatura ti bagi ti mangpakapuy iti panagtaray ti addaan oksihena a dara, nga isut’ napateg iti pananglaban iti impeksion. Kuna ni Sessler a “no nalamiis ti bagi, saan nga episiente ti panagkurri dagiti selula ken enzyme a mangpapigsa iti imiunidad.” Natakuatan ni Sessler ken dagiti kakaduana a malaksid iti bimmassit a kaso ti impeksion, dagiti pasiente a napagtalinaed a normal ti temperatura ti bagida kabayatan ti operasion naksayan ti kabayagda iti ospital iti gistay tallo nga aldaw ngem dagiti pasiente a di napagtalinaed a normal ti temperaturada.
Saan a Pagimbagan ti Publiko
Idiay Japan, 49 porsiento kadagiti tattao a napagsaludsodan ti nagkuna a dagiti opisiales iti gobierno ti agtartrabaho laeng a para iti bagbagida, kuna ti Mainichi Daily News. Pito laeng a porsiento kadagiti nagresponde ti mamati nga agtartrabaho dagiti adda iti gobierno para iti “pagimbagan ti publiko,” ken 3 laeng a porsiento ti nagkuna nga agtartrabahoda para iti pagilian. Manmano a Hapones ti nangdeskribir kadagiti agtartrabaho iti gobierno kas nagaget wenno napasnek. Naipalgak ti surbey a naidaulo itay napan a Disiembre, a sinaruno ti tawen nga aduan iti eskandalo a pakainaigan ti sumagmamano nga agkakangato ti saadda nga adipen ti publiko idiay Japan.