Ti Tungpal-Biag a Rag-ok Gapu ta Inaramidko ti Pagayatan ti Dios

Kas insalaysay ni Bill Yaremchuk

Idi Marso 1947, sumagmamano laeng a lawas kalpasan ti panagturposko kas misionero iti maikawalo a klase ti Watchtower Bible School of Gilead, a masarakan pay laeng idi iti South Lansing, New York, E.U.A., agturongak idin iti adayo a lugar a pakaidestinuak​—idiay Singapore.

KADUAK nga agserbi sadiay ni Dave Farmer, a padak a taga-Canada ken nagturpos iti maikapito a klase ti Gilead. Naglugankami iti Marine Adder, ti dati a barko ti militar nga aglayag manipud San Francisco, California.

Ti Hong Kong ti immuna a simmangladanmi iti Oriente. Talaga a nakaal-alinggaget ti naimatanganmi sadiay. Nakakadkadlaw pay laeng dagiti rigat nga inyeg ti Gubat Sangalubongan II iti amin a lugar​—dagiti nakaidda a tattao kadagiti igid ti kalsada a mabisbisinan ken kasla agngangabiten ken patay. Dikami nagbayag sadiay ket nagturongkamin idiay Manila a kabesera ti Pilipinas.

Nakitami met idiay ti nakaam-amak nga epekto ti gubat. Agkaraiwara iti sangladan ti paspaset dagiti barko a binomba dagiti Aliado, ken nasaknap pay ti kinapanglaw. Simmabet ti sumagmamano a Saksi ni Jehova a nangitulod kadakami iti Kingdom Hall. Naragsakda iti laksid dagiti parikut a pakaipaspasanguanda.

Ti simmaruno a nagsangladanmi ket ti Batavia (Jakarta itan) idiay Indonesia. Ngem kabarbaraan idi ti gerra sibil ken adda panagraranget iti asideg isu a dikam napalubosan a dimsaag iti barko. Bayat nga agturturongkami idiay Singapore, pampanunotekon no anianto ti madatnganmi sadiay. Kastoy laeng kadi a talaga ti nagbalinan daydi nakapimpintas nga Oriente a nailadawan kadagiti nabasami a broshur para kadagiti turista?

Iti sumagmamano nga aldaw, nasungbatanen ti pampanunotek. Adda dagiti makapikapik a pasamak a sigurado a mangpaneknek nga anamongan ti Dios ti pannakaibaonmi ken Dave sadiay.

No Kasano a Napalubosankami nga Agtalinaed

Kalpasan ti dandani makabulan sipud ipapanawmi idiay San Francisco, dimtengkami iti St. John Island, ti pagkuarentinasan kadagiti ganggannaet a sumrek iti Singapore. Immay dagiti opisial ti imigrasion tapno sukimatenda ti papeles dagiti pasahero ket minarkaanda dagiti pasaportemi iti “Mapalubosan a Dumsaag.” Kabigatanna, simmanglad iti pier ti barko a naglugananmi. Kalpasan a sinukimat ti maysa nga opisial ti barko dagiti papelesmi, dimsaagkamin.

Iti simmaganad nga aldaw, nagsublikami iti sangladan tapno agpakadakamin kadagiti kaduami a misionero a nagbiahe. Agdaliasatda pay ngamin kadagiti pakaibaonanda nga India ken Ceylon (Sri Lanka itan). Idi nakitanakami ti kapitan ti barko, dimsaag ket sinalangadnakami. Makapungtot ken impukkawna a saan a mabalin a dumsaagkami iti barko. Idi addakam pay laeng iti taaw, adda gayam bilin ti kangatuan nga opisial ti imigrasion a ni Mr. Haxworth a no sumanglad ti barko, saankami a mapalubosan a dumsaag. Ngem dimi ammo nga adda kasta a bilin ken di met ammo ti opisial a nangpadissaag kadakami.

Makapungpungtot unay kadakami ni Mr. Haxworth idi napankami kenkuana. Binugkawannakami a kunana a saankami a mapalubosan a sumrek iti Singapore. Gapu ta saanmi nga ammo dayta, impakitami dagiti pasaportemi nga addaan iti opisial a marka a “Mapalubosan a Dumsaag.” Rinabsutna dagiti pasaportemi ket binurana dayta a marka. Ngem imbag laengen ta nakapanawen ti barko! Indulin ni Mr. Haxworth dagiti pasaportemi iti makatawen sana insubli a napabaron ti markana a “Mapalubosan a Dumsaag.”

Nabunga a Ministerio Idiay Singapore

Idi dimtengkami idi Abril 1947, ti lalaki nga agnagan iti Joshua ti kakaisuna a Saksi idiay Singapore. Isu ket nagserbi kas amin-tiempo a ministro wenno payunir agingga iti ipapatayna idi rugrugi ti dekada 1970. Di nagbayag, dadduma nga agad-adal iti kinapudno ti Biblia ti nangrugi a mangiranud kadagitoy iti sabsabali. Mangrugin a masungbatan dagiti kararagmi nga umadu koma ti trabahador iti naespirituan a panagani.​—Mateo 9:37, 38.

Idi 1949, bayat ti napaut a panagbakasion ni Mr. Haxworth idiay England, simmangpet idiay Singapore ti innem a misionero a nagturpos iti maika-11 a klase ti Gilead. Maysa kadakuada ni Aileen Franks, ket inkallaysak idi 1956. Kabayatanna, ni Dave a kaduak a misionero iti sumagmamano a tawen nariknana a kasapulanen a pumanaw iti Singapore gapu iti kimmapuy a salun-atna. Nagindeg idiay Australia a nagserbianna a simamatalek agingga iti ipapatayna idi 1973.

Iti panaglabas dagiti tawen, adu ti inyadalanmi iti Biblia a nagbalin a Saksi agraman dagiti annakda. Agingga ita, dadduma kadakuada ti agserserbi kas payunir kadagiti sabali a pagilian. Makaparegta ti kapadasan ti Amerikano nga agassawa a da Lester ken Joanie Haynes a nagindeg idiay Singapore. Inrugimi ida nga inyadalan iti Biblia idi dekada 1950. Napardas ti panagrang-ayda iti naespirituan ket nabautisaranda idi nagsublida idiay Estados Unidos. Kalpasanna, nagbalin a nabunga ti ministerioda sadiay. Adu ti natulonganda a nagbalin a Saksi, a pakairamanan ti tallo nga annakda.

Insurat ni Joanie: “Malagipko pay a nagbalbaliw ti direksion ti biagmi gapu iti panagnaedmi dita Singapore. No didakam koma ‘inampon,’ mabalin nga agakar-akarkami pay laeng iti nadumaduma a pagilian. Maragsakanak ta dakayo ti nangisuro iti kinapudno ken Lester. Intukityo kenkuana ti panagayat kenni Jehova ken kadagiti kakabsat a Kristiano. Saan a pulos a bimmaaw dayta.”

Panagserbi Kas Pamilia Idiay Singapore

Idi 1962, adda naisangsangayan a pagteng a nangyeg kadakami iti baro a biag. Imbaga ti doktormi a masikog ni Aileen. Kayatmi ti agtalinaed kas misionero ngem kasano a maaramidanmi dayta yantangay addanto metten anakmi? Sinuratannakami ni Nathan H. Knorr a mangimatmaton idi iti sangalubongan a trabaho dagiti Saksi ni Jehova. Parparegtaennak nga agbirok iti panggedak tapno makapagtalinaedkami idiay Singapore. Dakkel a karit daytoy kaniak.

Kaaduan a ganggannaet ket agtartrabaho kas manedyer kadagiti negosio a kukua ti sabali a pagilian. Awan ti kapadasak iti negosio tangay simrekak iti amin-tiempo a ministerio kalpasan ti panageskuelak agarup 23 a tawenen ti napalabas. Isu a nagbayadak iti ahensia nga agituktukon iti trabaho idiay London tapno mangaramidda iti dokumento a naglaon iti kualipikasionko a maibatay iti trabahok kas ministro ti relihion iti sabali a pagilian, ket impatulodda dayta iti adu a dadakkel a kompania iti Singapore.

Masansan a ti sungbat dagiti kompania ket, “Ladingitenmi ta dikam makasarak iti trabaho a maitutop iti kualipikasionmo.” Nalabes kano ti kualipikasionko! Limmabas dagiti bulan agingga a naipasngay ti anakmi a ni Judy. Agbisbisita idi ni Kabsat Knorr iti Singapore ket sinarungkaranna da Judy ken ti baketko idiay ospital. Impanamnamana kadakami, “Mabalinyo latta ti agnaed iti pagtaengan dagiti misionero agingga a makasarak ni Bill iti trabaho.”

Sumagmamano a bulan kalpasanna, nakastrekak kas ahente iti maysa a kompania ti eroplano. Ngem kasla di pay umanay a pagbiagmi ti sueldok. Kalpasan ti dua a tawen, nagtrabahoak iti sabali a kompania ti eroplano dagiti Amerikano ket dinobleda ti sueldok. Idi agangay, natalgeden ti trabahok iti kompania isu nga ad-adun ti tiempok iti pamiliak ken iti Nakristianuan a ministerio.

Impamaysami ti biagmi iti panagserbi ken Jehova, nga inyun-unami dagiti naespirituan a bambanag. Nagresulta dayta iti panangtagiragsakko iti adu a pribilehio iti organisasion. Nagpayunir manen ni Aileen. Kabayatanna, narang-ayen ti trabaho a panangikasaba iti Pagarian iti Singapore. Idi ngalay ti dekada 1960, gimmatangkami iti nagsayaat ken dua ti kadsaaranna a pasdek iti sentro ti siudad. Nagserbi dayta kas Kingdom Hall a paggigimongan ti uppat a kongregasion.

Naparitan ti Trabahomi!

Idi agangay, agpangpangtan ti ibubusor. Idi Enero 14, 1972, kas linawas nga ar-aramidenmi, napankami nakigimong idiay Kingdom Hall. Ngem nakawaran ken nakandaduanen ti ruanganna. Adda naipaskil sadiay a mangipakpakaammo a saanen a rehistrado ti kongregasion dagiti Saksi ni Jehova iti Singapore. Naparitankamin!a

Ti panangiparitda a mausar ti Kingdom Hall dina pinasardeng ti panagdayawmi ken Jehova, ngem pinampanunotko no ania ngata ti pagayatan ti Dios para iti pamiliak. No kas pagarigan ta mapagawidkami, diminton masarungkaran dagiti gagayyemmi iti Singapore. Isu a kiniddawko iti manedyer ti kompaniami no mabalinko ti agtrabaho idiay Kuala Lumpur, Malaysia. Iti kasta, mabalinmi latta ti rummuar ken sumrek iti Singapore. Diak ninamnama a pagbalinennak a manedyer ti kompania idiay Kuala Lumpur, ket doblienna ti sueldok ken mangted pay iti dadduma a benepisio.

Ngem napanunotko, ‘Pagayatan ngata ti Dios a panawanmi ti Singapore ken dagiti kakabsatmi?’ Kas pamilia, inkararagmi dayta ken Jehova. Napanunotmi a ni Jehova ti nangibaon kadakami ditoy. Isu a nagdesisionak nga agtalinaedkami. Naklaat ti manedyer ta saanko nga inawat ti nagsayaat a tukonna.

Nagrigat ti agbiag ken agtrabaho iti lugar a maiparit ti trabaho a panangasaba agsipud ta kanayon a maipangtakami a maaresto ken maibalud. Adda dagiti kasasaad a talaga a naapresiarmi dagiti sasao iti Salmo 34:7 a kunana: “Ti anghel ni Jehova agpakpakarso iti intero nga aglikmut dagidiay agbuteng kenkuana, ket alawenna ida.”

Baro a Pagserbianmi

Kamaudiananna, kalpasan ti nasurok nga 46 a tawen a panagserbimi idiay Singapore, nakiddaw idi 1993 a mapankami idiay New Zealand tapno saankam unay a marigatan. Ngem maladingitankami a mangpanaw kadagiti patpatgenmi a gagayyem idiay Singapore. Nupay kasta, makaparegta a maamuan a natibker ti pammatida gapu ta naibangon kadagiti materiales a di mauram. Gapu iti daytoy, sititibker a naanduranda dagiti pakasuotan a nagtultuloy a napasaranda.​—1 Corinto 3:12-14.

Ita, kalpasan ti nasurok a 14 a tawenmin ditoy New Zealand, maragragsakankami pay laeng ken Aileen a makipaset iti ministerio kas special pioneer uray bumaket ken lumakaykamin. Dua kadagiti kakabsatko​—ni Mike nga agtawenen iti 94 ken ni Peter nga agtawen iti 90​—​ti sibibiag pay laeng ken matalek nga agserserbi ken Jehova idiay Canada.

Idi 1998, nagsubli ti balasangmi a ni Judy iti Oriente ket nagserbi sadiay iti sumagmamano a tawen. Kinunana iti maysa kadagiti suratna kadakami: “Inaldaw nga agyamyamanak ken Jehova gapu iti naisangsangayan a pribilehio a panagserbi ditoy! Gapu kadakayo agraman ti naayat a panangsanay ken agtultuloy a panagsakripisioyo, naragpatko amin dagitoy a pribilehio.” Idi 2003, nagsubli ti balasangmi ditoy New Zealand tapno suportarannakami ken Aileen.b

Agyamankami ken Jehova gapu ta impalubos ti kasasaadmi a naipangagmi ti awis ti Apo nga agkidkiddaw iti ad-adu nga agani. Gapu iti dayta, napalalo ti ragsakmi. Ket kas kuna ti Biblia a mapasamak, inton ‘aglabas ti lubong,’ sagrapenminto ti kaitungpalan ti nagsayaat a kari ti Dios: “Ti agaramid iti pagayatan ti Dios agtalinaed iti agnanayon.”​—1 Juan 2:17.

[Footnotes]

[Ladawan iti panid 29]

Ni Joshua ti kakaisuna a Saksi idiay Singapore idi simmangpetkami idi 1947

[Ladawan iti panid 29]

Dakami ken Dave Farmer idiay Hong Kong idi 1947 bayat ti panagbiahemi nga agturong idiay Singapore

[Ladawan iti panid 29]

Dakami ken Aileen idi 1958

[Ladawan iti panid 31]

Kaduami ti balasangmi a ni Judy

[Credit Line]

Kimroy Photography

[Picture Credit Line iti panid 28]

Kimroy Photography