Manipud Managbasatayo
Radio Pagyamanan unay iti ekselente nga artikulo a “Radio—Imbension a Nangbalbaliw iti Lubong.” (Oktubre 8, 1996) Agtawenak iti 18, ket pagay-ayatko unay ti dumngeg iti radio. Nagustuak unay ti salaysay maipapan iti pannakapataud ti radio. Nangnangruna a makapainteres a maammuan nga iti napalabas, inusar dagiti Saksi ni Jehova ti radio a pangirakurak iti naimbag a damag ti Pagarian.
F. B., Italia
Kulibangbang Sisiak idi a mangaskasaba iti kataltalonan ket inkeddengko nga usaren ti artikulo a “Nalami Ngem Naandur a Biahero.” (Oktubre 8, 1996) Naam-ammok ti maysa a mannalon, nagdakkelan a lalaki—saan a ti kita ti tao a kadawyan a pakisaritaak maipapan kadagiti kulibangbang! Nupay kasta, idi nakitana ti nagpipintas a ladawan, innalana dagiti magasin ket kinunana nga adu a manmano a kita ti kulibangbang ti masarakan iti taltalonna. Idi pumanawakon, sigagagar a binasa ni baketna ti magasin. Isu a kas iti kulibangbang, agsubliakto—ket ipakitak kadakuada ti ad-adu pay maipapan iti Pagarian ti Dios!
B. B., Inglatera
Daytoy ti maysa kadagiti kasasayaatan nga artikulo a nabasak. Sumagmamano la nga aldaw kalpasan a simmangpet dagiti magasin, nadlawko a dagiti kayomi napumpunno iti monarch! Nagyamanak iti Dios iti nakaskasdaaw a parsuana.
S. M., Estados Unidos
Naipalubos a Kinadakes Agyamanak iti artikulo nga “Agimtuod Dagiti Agtutubo . . . Apay nga Impalubos ti Dios a Mapasamak Dagiti Dakes a Bambanag?” (Oktubre 22, 1996) Kalpasan a nagleddaang, naibabain, ken nagladingitak iti nakaro bayat ti 18 a tawen a pannakiasawa iti di matalek a lalaki nga awan panagraemna iti babbai, ti panangbasak a naayat a Dios ni Jehova a maseknan kadatayo ket kas iti makaagas a sapsapo. Kas kettay ni Jehova a mismo ti mangliwliwa kaniak.
H. T., Estados Unidos
Sigarilio Kayatko ti agkomento maipapan iti artikulo a “Sigarilio—Idianyo Aya Ida?” (Oktubre 22, 1996) Pimanak pay ta awan kaniak dayta iti napalabas nga adun a tawen! Natay ni lakayko ita a tawen gapu iti kanser iti bara. Nakaro a mannigarilio iti 50 a tawen. Diak ammo a mismo a dagiti sigarilio addaan iti kasta a makadangran nga epekto.
H. G., Alemania
Akee Nagsayaat ti artikulo nga “Akee—Nasional a Putahe ti Jamaica.” (Oktubre 22, 1996) Kas katutubo iti Jamaica, pulos a diak pay nagidasar iti akee iti asinoman nga agkuna a dina kayat dayta. Parparegtaek ti asinoman a mapan idiay Jamaica a ramananda ti akee!
E. B., Estados Unidos
Anian a nakaay-ayat a makita ti sabali manen a pannakailawlawag dagiti gapuanan ti Namarsua kadatayo! Nagadu ti puon ti akee ditoy Ghana ket agserserbi kas linong iti sumagmamano nga ili ken purok. Nakataytayagda kadagiti kabakiran. Agdisso dagiti panniki, loro, ken dadduma a tumatayab kadagiti sangada. Ti kayo nga akee ket sabali pay a nakaskasdaaw a sagut ti Diostayo.
P. A. E., Ghana
Dagiti Kabalio Masapul nga agsuratak tapno iyebkasko ti panangapresiarko iti artikulo a “Pagaradoda pay Laeng Dagiti Kabalio.” (Oktubre 22, 1996) Pagay-ayatko dagiti animal, ket ti artikulo inabbukayna ti pusok. Nagustuak ti panangisalaysayyo iti relasion ti tao kadagiti animal, nangnangruna ti paset maipapan iti panangtagiragsak iti “pannakipatang” kadagiti kabalio.
V. H., Estados Unidos
Siudad ti pagnanaedak sipud pay idi addan puotko, ket masapul ngarud a mapennek ti tarigagayko nga agbalin a nasinged kadagiti parsua ni Jehova. Babaen ti panangbasak iti artikuloyo, makapagtrabahoak kadagiti kabalio babaen ti panangdarepdepko. Pagyamanan unay iti kasta a nagsayaat nga artikulo.
L. A. D., Estados Unidos