Ania ti Solusion?
NAGANETGET a pagdedebatean dagiti eksperto ti solusion dagiti narikut a problema ti sangatauan maipapan iti danum. Kayat ti World Bank a maipuonan ti $600 bilion iti sanitasion ken kadagiti programa maipapan iti danum bayat ti sumaganad a sangapulo a tawen. Ti magasto iti saan a panangipuonan mabalin a dakdakkelto pay. Idiay Peru, kas pagarigan, ti sangapulo a lawas nga epidemia ti kolera, a maigapu iti namulitan a danum, iti di pay nabayag, nakabusbos iti agarup $1 a bilion—mamitlo a daras iti kuarta a naipuonan iti suplay ti pagilian a danum bayat ti intero a dekada ti 1980.
Ngem, nupay naimbag ti panggep dagidiay a mangitantandudo kadagitoy, masansan a bassit laeng ti maaramidan dagiti proyekto para iti danum a mangtulong kadagiti napanglaw a mismo. Ti iyaadu ti populasion kadagiti nagdadakkel a siudad iti napanglaw a pagpagilian ket nakaad-adu ken nariribuk. Dagiti napanglaw agnanaedda kadagiti nakapuspusek, di nasayaat ti kasasaadna a kalapaw nga awanan kadagiti gripo wenno sanitasion. Gapu ta dida magun-odan dagiti supsuportaran ti gobierno a serbisio ti danum, masapul nga agbayadda iti nangina kadagiti pribado nga agilaklako iti danum, a masansan a narugit.
Nalawag, ti sangalubongan a krisis iti danum ket nakarikrikut ken ramanenna dagiti agkakanaig a bambanag: kinakirang [ti danum], polusion, kinapanglaw, sakit, ken ti umad-adu a kasapulan ti umad-adu a populasion. Kasta met a nalawagen a saan a marisut dagiti tattao dagitoy a problema.
Pakaibatayan ti Pangnamnamaan
Ti masanguanan, nupay kasta, saan a nalidem kas ipadto dagiti adu. Apay? Agsipud ta ti solusion ti sangalubongan a krisis ti danum saan nga agpannuray kadagiti tattao; agpannuray dayta iti Dios. Isu laeng ti addaan nga agpadpada iti abilidad ken ti pagayatan a mangsolbar kadagiti amin a problema iti danum.
Di pagduaduaan a kabaelan ni Jehova a Dios a solbaren dagitoy a parikut. Isu ti Diseniador ken Namarsua, saan laeng nga iti daga no di ket amin a danum nga adda iti dayta. Isu ti nangpaandar iti nakaskasdaaw a siklo ti danum agraman dagiti amin a dadduma a natural a siklo a mamagbalin nga adda biag ditoy daga. Bigbigen ti Apocalipsis 14:7 ni Jehova a kas “Daydiay nangaramid iti langit ken iti daga ken baybay ken kadagiti ubbog ti dandanum.”
Ni Jehova addaan pannakabalin a mangkontrol kadagiti danum ti lubong. Isu “Daydiay mangted ti tudo iti daga, ken agbaon ti dandanum iti rabaw ti taltalon.” (Job 5:10) Maipapan kenkuana kuna ti Biblia: “Pagbalinenna ti let-ang a danaw, ken ti natikag a daga a burayok.”—Salmo 107:35.
Maulit-ulit a pinaneknekanna ti abilidadna a mangipaay iti danum. Kas pagarigan, nangipaay iti danum kadagiti Israelita bayat ti 40 a tawen a kaaddada idiay let-ang, no dadduma babaen iti milagro. “Pinagpusuakna met dagiti baresbes kadagiti batbato, ket pinagayusna dagiti dandanum a kas karkarayan,” kuna ti Biblia. “Adtoy, dinugsolna ti bato, ket iti kasta pimsuak dagiti dandanum, ket dagiti karayan naglippiasda.”—Salmo 78:16, 20.
Anianto ti Aramiden ti Dios
Saan nga ipalubos ti Dios nga agtultuloy ti krisis ti danum iti agnanayon. Ipadto ti Biblia nga umayen ti tiempo nga agtignayton maigapu kadagidiay amin nga adda iti sangalubongan nga agtarigagay nga agbiag iti sidong ti naayat a panangituray ti nailangitan a gobiernona, a dandanin mangituray iti daga.—Mateo 6:10.
Dayta a gobierno, wenno Pagarian, ipatinggananto ti saksakit a maigapu iti danum, agraman dagiti sabsabali pay a sakit. Ipanamnama ti Biblia kadagiti nasungdo iti Dios: “[Ti Dios] bendisionannanto ti taraonmo ken ti danummo; ket ikkate[nnan]to ti sakit iti tengngam.” (Exodo 23:25) Kasta met, madadaelto dagiti mangmulmulit iti danum ti daga inton ‘iyegna iti pannakadadael dagidiay mangdaddadael iti daga.’—Apocalipsis 11:18.
Rumang-ayto ti intero a daga iti sidong ti naayat a panangaywan ti Dios. Saanton a pulos marigatan ti tattao nga agsapul iti natamnay, nadalus a danum. Ti Mannakabalin-amin a Dios, a kankanayon nga agsao iti pudno, pinaltiinganna ti mammadtona nga agsurat maipapan iti masanguanan: “Ta iti let-ang pumsuakto dagiti dandanum, ken barbaresbes iti tay-ak a langalang. Ket ti sumilsilap a darat agbalinto a libtong, ken ti mawaw a daga agbalinto nga ub-ubbog ti danum.”—Isaias 35:6, 7; Hebreo 6:18.
[Ladawan iti panid 10]
Ikari ti Dios: “Iti let-ang pumsuakto dagiti dandanum, . . . ken ti mawaw a daga agbalinto nga ub-ubbog ti danum.”—saias 35:6, 7