Manipud Managbasatayo
Atake ti Puso Agyamanak ta kamengak ti organisasion a, malaksid nga iwanwannatayo iti naespirituan, maseknan iti pisikal a kinasalun-attayo. Impakita kadatayo dagiti serye ti “Atake ti Puso—Aniat’ Maaramidan?” (Disiembre 8, 1996) no kasano a mailasin dagiti sintoma ti sakit ti puso. Idi naaddaan ti katugangak a lalaki kadagitoy a sintoma, naamirismi a nalabit graben ti kasasaadna isu nga inyospitalmi. Naatake gayamen ti pusona; ngem kalpasan ti 24 nga aldaw a pannakayospitalna, saanen a peligroso ti kasasaadna.
E. S., Brazil
Natay ni tatangko iti aortic aneurysm idi 1995, isu nga idi damo a nakitak daytoy a ruar, diak maitured a basaen. Nupay kasta, binasak dayta makabulan kalpasanna, ket dagiti artikulo liniwliwadak, tangay naammuak a napasaran metten dagiti sabsabali ti ladingit nga ipaay ti sakit ti puso iti maysa a pamilia.
S. J., Canada
Itay napan a Hulio, natumba ni lakayko bayat a mangaskasaba iti binalaybalay isu nga impanmi a dagus idiay ospital. Naimbag ta nakalasat. Dagiti artikuloyo dimtengda kadakami iti umiso nga oras. Nakasangitkami a nakakita iti paset a “Masapul Dagiti Pamilia ti Pannaranay,” agsipud ta eksakto a kastat’ nariknami.
M. A., Japan
Itay napan a Domingo, kanayon nga agut-ot ti kannigid a takiagko ken agbibineg ti ungto dagiti ramayko. Impagarupko no gagangay laeng nga ut-ot. Idi nabasak dagiti artikuloyo maipapan iti atake ti puso, silalawag a naamirisko nga agsagsagabaak kadagidiay a sintoma! Napanak iti kuarto ti emerhensia ti maysa nga ospital, ket natakkuatan dagiti doktor a nagbara ti maysa kadagiti kangrunaan nga urat ti pusok. Inoperadak kabigatanna. Posible unay a no saan a naisurat dagiti artikuloyo, awanak koma ditoyen a mangisurat iti daytoy a panagyaman!
N. S., Estados Unidos
Partikular nga inapresiarko ti kahon a “Dagiti Sintoma ti Atake ti Puso.” Impaamirisna kaniak a maseknankay unay iti parparikutmi ken ipapaayyo dagiti kasapulanmi tapno madaeran ida.
M. B., Senegal
Sipud idi naatake ti puso ni tatangko, dakkel ti nagbaliwan ti biag ti pamiliami. Kabayatan dagitoy a narikut a kanito, dagiti artikulo talaga a dakkel a liwliwa kadakami.
P. G., Italia
Panagpasakup ti Asawa a Babai Talaga nga inapresiarko ti artikulo a “Ti Panangmatmat ti Biblia: Panagpasakup ti Asawa a Babai—Aniat’ Kaipapananna?” (Disiembre 8, 1996) Di manamati ni lakayko, ket no dadduma, nagrigat ti agpasakup kenkuana. Kayatko nga ipakita ti kasayaatan nga ulidan tapno isut’ magun-odko. (1 Pedro 3:1) Kaskasdi, kayatko nga itandudo a sititibker ti panagserbik ken ni Jehova. Ti artikuloyo pinaregtanak, ket pinaragsaknak a mangammo a ti Diosko ay-aywanannak.
M. S., Estados Unidos
Napaneknekak a ti artikulo makailawlawag unay. Tangay agtutupatop dagiti pammarigat ni Satanas, kasapulanmi daytoy a kita ti impormasion tapno agtalinaedkami iti pammati. Partikular a tinagiragsakko ti ulidan ni Abigail iti Biblia ken ti naigunamgunam a ti asawa a babai nasken nga ipakitana ti pannakaawat ken di rumbeng a makarikna a makabasol no umun-una nga agtignay kadagiti agduduma a kasasaad.
D. M., Estados Unidos
Ni Louis Pasteur Agtawenak iti 12 ket kayatko a maammuanyo nga inapresiarko ti artikulo a “Ni Louis Pasteur—Ti Impalgak ti Nagapuananna.” (Disiembre 8, 1996) Ad-adalenmi ti maipapan kenkuana iti klasemi iti science. Inusarko daytoy nga artikulo idi insaganak ti maysa a report ket nakagun-odak iti sangapulo a puntos a nayon ti gradok!
A. P., Estados Unidos