Panagsakdo Kadagiti Ulep

BABAEN TI KORESPONSAL TI AGRIINGKAYO! IDIAY ABAGATAN NGA AMERICA

SIBABALLIGI a natulad dagiti managsirarak nga agtartrabaho idiay Chile ti kadaanan a pamay-an dagiti Arabo a mangsakdo iti danum manipud iti angep. “Dagiti kayo ti olibo kadagiti disierto ti Oman,” ilawlawag ti pagiwarnak a Health InterAmerica, “ti agbibiag iti adun a siglo gapu iti danum ti angep a maurnong kadagiti bulong ken agaruyot kadagiti babassit a tangke a naikabil iti sakaanan dagiti kayo.” Imbes a kayo ti olibo, nangikabil dagiti managsirarak iti dadakkel nga iket kadagiti disierto a lugar iti kabambantayan a kanayon a maangepan iti aggaput’ taaw. Dagiti iket a kaslattay higante nga iket ti volleyball sillawatenda dagiti tedted ti danum manipud angep. Agtedted dagitoy iti kalasugan nga agaruyot iti tubo a mangyayus iti danum iti pagurnongan a tangke.

Pinaneknekan ti Chungungo, maysa a bassit a purok iti amianan a disierto iti kosta ti Chile, nga agkurri ti sistema. Sangapulo ket uppat a tawenen ti napalabas, kuna ti IDRC Reports, maysa a magasin nga impablaak ti International Development Research Centre iti Canada, awan idi ti pangalaan dagiti umili ti Chungungo iti danum a tamnay iti lugarda. Inaldaw a mangipan dagiti trak iti 5,000 a litro, ket an-anusan la idi ti tunggal pamilia ti 3 agingga iti 14 a litro iti inaldaw. Ita, nupay kasta, gapu ta naikabil ti 75 nga iket a mangurnong iti angep iti kabambantayan iti ngatuen ti purok, ti nakaskasdaaw a 11,000 a litro a danum ti agay-ayusen idiay Chungungo, a mangipaay iti tunggal pumurok iti 30 a litro a danum iti kada aldaw. Kuna ti managsirarak a ni Dr. Robert Schemenauer, maysa a pisiko iti ulep, a ti sistema a panagsakdo iti angep ti nangpasayaat iti salun-at dagiti pumurok. “Amin ket mangmanganen iti nateng ken prutas manipud iti bukodda a bangkag ken kamuyongan.”

Saan la a makapasalun-at no di ket nalaka pay ti danum ti angep. Aggatad iti agarup $75,000 (E.U.) ti ordinario a panagpakabit, kuna ni Dr. Schemenauer, no idilig iti minilion a doliar a kasapulan tapno maibangon dagiti dam. Kuna dagiti managsirarak a nupay adu a sabsabali pay a natikag a lugar iti intero a lubong ti mabalin a magunggonaan iti daytoy a sistema, nabuntog dagiti internasional nga ahensia a mangusig itoy a sabali a pamay-an ti suplay a danum.

[Dagiti ladawan iti panid 23]

Kannigid: Dagiti iket iti tapaw ti bantay a mangurnong iti tedted a danum manipud iti angep

Baba: Asideg a buya ti iket

[Credit Line]

Dagiti Retrato: IDRC