Panagpakawan ti Maysa a Sheriff

Ni Tom Will Lane ti sheriff nga inestoria ni Edward Michalec iti artikulo a “Napabileg a Mangsaranget Kadagiti Pakasuotan iti Masanguanan” iti Disiembre 22, 1996, nga “Agriingkayo!” Iti estoria, insalaysay ni Michalec:

“Nakaunget ti sheriff iti Wharton, Texas, E.U.A. Iti panangibaludna kaniak iti maikapaten a daras, imbugkawna: ‘Apay a dika agtungpal kadagiti bilin?’

“‘Addaanak iti naan-anay a kalintegan a mangaramid iti daytoy,’ dagus nga insungbatko. Daytoy ti lalo pay a nangpaunget iti sheriff, ket rinugiannakon a minalo iti blackjack. Nakiraman met dagiti dadduma nga opisial, a nangmalo kaniak kadagiti putan ti pistolda.”

Nabiit pay, insurat ni Mary Perez, maysa a babai nga agserserbi ken Sheriff Lane idi kattapog ti 1960: “Ammona a maysaak kadagiti Saksi ni Jehova. Imbagana kaniak no kasano nga indadanesna ni Ed Michalec. Kiniddawna kaniak nga ibagak kadagiti dadduma a Saksi a ladingitenna dagiti inaramidna. Imbagana a dina ammo ti kinapudno a dagiti Saksi ket naimbagda, managtungpal-linteg a tattao. Napasnek ti panagpadispensarna.”

Innayon pay ni Mary: “Nupay natayen ti sheriff sumagmamano a tawen ti napalabasen, inanamaek a daytoy a surat ti mangidanon iti panagpadispensarna.”

Kalpasanna insalaysayna no kasano ti panagbalinna a Saksi: “Napasamak ti pannakaidadanes ni Kabsat Michalec idi kattapog ti dekada 1940. Gapu iti daytoy determinadoak idi a dumngeg kadagiti Saksi idi immayda iti ruanganko. Di nagbayag, agad-adalkamin iti Biblia. Nabautisarankami nga agassawa idi 1949.”

Daytoy ti sabali pay a mangipakita a dakkel ti epekto iti biag dagiti sabsabali ti [natibker] a takder ti maysa a tao a maipaay kadagiti Nakristianuan a prinsipio. Kas pagarigan, mano ti naguyugoy iti natured a takder ni Pedro ken dagiti dadduma pay nga apostol idi umuna a siglo?​—Aramid 5:17-​29.

[Dagiti ladawan iti panid 31]

Ni Ed Michalec ken ni Mary Perez, idi dekada 1940