Agbalinkay a Napili iti Paglinglingayanyo
Aniat’ epekto ti paglinglingayan kadagiti ubbing? Ni Alvin Poussaint, maysa nga edukador ken doktor a 30 a tawenen a mangay-aywan iti salun-at dagiti ubbing, ket kombinsido a ti panagbuya kadagiti pelikula a naglaon iti sekso ken kinaranggas ti mangisursuro kadagiti agtutubo a normal ti kasta a kababalin. Inyunay-unayna met ti maysa pay a peggad: “Nakakitaakon kadagiti mabutbuteng—wenno napalalot’ kinaagresiboda nga ubbing nga agawid manipud iti panagbuyada kadagita a pelikula. Nakitak dagiti dadduma a nagsublida a kumpet, agnutnot iti tangan wenno agisbo iti pagiddaan.” Sigun iti daytoy a doktor, nausigen dagiti eksperto ti dadduma pay a pasamak a pakaigapuan ti kakasta a kababalin—pisikal wenno seksual a panangabuso wenno panagnaed iti lugar a pagdadangadangan, no madakamat ti sumagmamano. “Awan kadatayo ti mayat a mangikabil iti ubing kadagidiay a kasasaad,” ilawlawagna, “ngem ditay laplapdan ida nga agbuya iti pelikula maipapan kadagiti banag a pagaligagetantayo a makitada iti agpayso a biag.”
Adda naimbag a rason dagiti Kristiano nga agbalinda a napili ken siertuenda a ti paglinglingayan a pilpilienda ket saan a maisalungasing kadagiti prinsipio ti Biblia. Kas pagarigan, kuna ti Salmo 11:5: “Ni Jehova suotenna ti nalinteg; ngem ti nadangkes ken ti agayat iti kinauyong guraen ti kararuana.” Sa insurat ti Kristiano a ni apostol Pablo: “Papatayenyo, ngarud, ti kamkameng ti bagiyo nga adda iti rabaw ti daga no maipapan iti pannakiabig, kinarugit, panaggartem iti sekso, makapasakit a tarigagay, ken kinaagum . . . Iwaksiyo amin ida manipud kadakayo, pungtot, unget, kinadakes, nabassawang a panagsasao, ken naalas a sasao manipud iti ngiwatyo.”—Colosas 3:5, 8.
Pagannadan koma ngarud dagiti nagannak a ti pilienda a paglinglingayan ti annakda—ken ti paglinglingayanda a mismo—saanna nga itandudo “dagiti aramid ti lasag.” (Galacia 5:19-21) Napilida koma, nga usigenda agpadpada ti kalidad ken ti kantidad ti paglinglingayanda.—Efeso 5:15-17.