Watchtower ONLINE A LIBRARIA
Watchtower
ONLINE A LIBRARIA
Iloko
  • BIBLIA
  • PUBLIKASION
  • GIMONG
  • g98 8/8 pp. 8-11
  • Kinadangkok—Ania ti Solusion ti Dios?

Awan video-na ti napilim.

Pasensiakan, adda problema iti pannakai-load ti video.

  • Kinadangkok—Ania ti Solusion ti Dios?
  • Agriingkayo!—1998
  • Subtitulo
  • Umasping a Material
  • Kinamanaginsisingpet
  • Dagiti Leksion nga Insuro ti Biblia
  • Ti Laglagipen ti Dios ken ti Lipatenna
  • Ti Maudi nga Ukom
  • Asidegen ti Maysa a Baro a Lubong!
  • Mangpakawan ken Manglipat—Posible Kadi?
    Agriingkayo!—1998
  • Laglagipentayo Kadi ti Napalabas?
    Agriingkayo!—1998
  • Ti Pudno a Dios ken ti Masanguananyo
    Ti Panangbiruk ti Sangatauan iti Dios
  • Maysa a Baro a Lubong nga Awan Panagsagaba
    Agriingkayo!—1990
Kitaen ti Ad-adu Pay
Agriingkayo!—1998
g98 8/8 pp. 8-11

Kinadangkok​—Ania ti Solusion ti Dios?

KASANO a malapdan ti kinadangkok? Ania ti solusionna? No adalentayo ti historia, nabatad a saan a nagballigi dagiti solusion ti tao. Kinapudnona, adda dakkel a supiat, no di interamente a kinamanaginsisingpet, iti panangtaming dagiti agtuturay a tao iti tema.

Usigenyo, kas pagarigan, ti tawen 1995. Maika-50 nga anibersario dayta ti panagpatingga ti Nazi Holocaust, ti Gubat Sangalubongan II, ken ti ibebettak ti bomba atomika. Iti dayta a tawen, naangay dagiti panglaglagip a seremonia iti adu a paset ti lubong, a tinabunuan dagiti agtuturay ti lubong. Apay? Tapno maipakaammo a marimonda kadagitoy a kinadangkok ket iti kasta saanda a pulos a mauliten. Ngem, dadduma ti nakapaliiw iti di panagtutunos kadagita a seremonia.

Kinamanaginsisingpet

Kadagita a nasaknap pannakaipablaakda a seremonia, tarigagayan dagiti amin a pannakabagi ti relihion ken gobierno a mamatmatanda kas gagayyem wenno uray kaskasano liklikanda pay ketdi ti maibilang a managdakdakes. Ngem dagiti nasion a nangkondenar kadagiti napalabas a kinadangkok nagibangonda kadagiti pagipempenan iti armas, adda dadakkel a badyetda a maipaay iti dayta a panggep. Kasta met, saanda a narisut dagiti kangrunaan a parikut a kas iti kinapanglaw, panagbaba ti moral, ken polusion, a masansan a kunada a saan nga umdas ti pundoda.

Ikagkagumaan dagiti relihion iti lubong ti mangpataud iti pakasaritaan a manglimo iti napaut a panagulimekna maipapan iti kinadangkok dagiti diktador ken ti panangilimedna a nakikanunong kadakuada. Awan ti inaramid dagitoy a relihion a nangpasardeng kadagiti agkakarelihion iti panagpipinnatayda. Kas pagarigan, idi Gubat Sangalubongan II, nagpipinnatay dagiti agpapada a Katoliko ken dagiti agpapada a Protestante agsipud ta nagduma ti nasionda ken agbinnusor ti dasig nga ayanda. Kinuna ti agsumbangir a dasig a Kristianoda ngem inaramidda ti naan-anay a maikontra kadagiti sursuro ni Jesus. (Mateo 26:52; Juan 13:34, 35; 1 Juan 3:10-​12; 4:20, 21) Kasta met la ti inaramid ti dadduma a relihion. Itatta, iti nadumaduma a paset ti lubong, ti kinadangkok ket ar-aramiden pay laeng dagiti kameng dagitoy a relihion.

Idi kaaldawan ni Jesus, managinsisingpet dagiti panguluen ti relihion. Binabalaw ni Jesus ida, a kunkunana: “Asikayo pay, eskriba ken Fariseo, a managinsisingpet! agsipud ta bangonenyo dagiti tanem dagiti mammadto ket arkosanyo dagiti pakalaglagipan a tanem dagiti nalinteg, ket kunayo, ‘No addakami koma idi kaaldawan dagiti ammami, dikam makiraman kadakuada iti dara dagiti mammadto.’ Gapuna saksaksianyo a maibusor iti bagbagiyo nga annakdakayo dagidiay namapatay kadagiti mammadto.” (Mateo 23:29-31) Kinuna dagidiay a panguluen ti relihion a nadiosanda ngem managinsisingpetda a nangidadanes ken Jesus ken dagiti adalanna.

Dagiti Leksion nga Insuro ti Biblia

Adda maadal a leksion iti sekular a historia, ngem agtaud iti Biblia dagiti makagunggona unay a leksion. Saanna nga italek ti annongen a panangtarus iti historia iti panangipato ti tao wenno iti panangidumduma. Ilawlawag ti Biblia ti historia ken ti masakbayan sigun iti panangmatmat ti Dios.​—Isaias 55:8, 9.

Saritaen ti Kasuratan dagiti naimbag ken dakes a pasamak agraman dagiti naimbag ken dakes a tattao. Masansan a magun-odan ti umiso a leksion, daydiay maitunos iti pagayatan ti Dios, kadagitoy a salaysay. Nagkonklusion ni apostol Pablo, kalpasan a dinakamatna ti adu a pasamak iti pakasaritaan ti kadaanan nga Israel: “Ita dagitoy a bambanag napagteng kadakuada kas dagiti pagulidanan, ket naisuratda a pammakdaar kadatayo.” (1 Corinto 10:11) Ni Jesus a mismo ket nangadaw iti leksion iti historia idi kinunana kadagiti adalanna: “Laglagipenyo ti asawa ni Lot.”​—Lucas 17:32.

Ti Laglagipen ti Dios ken ti Lipatenna

Maammuantayo iti Biblia a manglagip wenno manglipat ti Dios kadagiti indibidual sigun kadagiti tignayda. Pakawanen ti Dios a ‘siwawadwad’ dagidiay agbasol ngem mangipakpakita iti panagbabawi. (Isaias 55:7) No agbabawi ti nadangkes ken “agbabawi iti basolna, ket aramidenna daydiay mayalubog iti linteg ken umiso; . . . awanto kadagiti basolna . . . ti malagip a maibusor kenkuana.”​—Ezequiel 33:14-16.

Insurat ni Pablo a “saan a nakillo ti Dios tapno lipatenna ti aramidyo ken ti ayat nga impakitayo iti naganna.” (Hebreo 6:10) Gapuna, gunggonaan ni Jehova dagidiay a laglagipenna. Nagkararag ni matalek a Job: “O sapay koma ta ilemmengnak idiay tanem [Sheol, NW] [ti kadawyan a tanem ti amin a sangatauan], . . . tapno tudingam kaniak ti maysa a nadutokan a panawen ket lagipennak!”​—Job 14:13.

Maisupadi iti dayta, ipataw ti Dios kadagiti di agbabawi a managdakdakes ti maitunos kadagiti sasao nga imbagana ken Moises: “Punasekto iti librok.” (Exodo 32:33) Wen, lipatento ti Dios dagiti nadangkes iti agnanayon.

Ti Maudi nga Ukom

Ti Dios ti maudi nga Ukom iti historia. (Genesis 18:25; Isaias 14:24, 27; 46:9-​11; 55:11) Sigun iti natan-ok a panangukomna, dinanto malipatan ti nagadu a kinadangkok a naaramid iti sangatauan. Iti aldaw ti nalinteg a pungtotna, ukomennanto amin a nakabasol a tattao ken institusion.​—Apocalipsis, kapitulo 18, 19.

Mairaman kadagita ti intero a sistema ti ulbod a relihion, nga iti Kasuratan ket simboliko a napanaganan a “Babilonia a Dakkel.” Maipapan kenkuana adda a naisurat: “Dagiti basolna namuntuonda a tumukno sadi langit, ket ti Dios linagipna dagiti aramidna a di kinahustisia.”​—Apocalipsis 18:2, 5.

Rumbeng koma nga insuro dagitoy a relihion kadagiti pasurotda a mangaramidda iti umiso ngem dida naisuro ida. Isu a kunaen ti Sao ti Dios kadagiti amin a relihion iti lubong: “Nasarakan kenkuana ti dara dagiti mammadto ken dagiti sasanto ken amin dagidiay napapatay ditoy daga.” (Apocalipsis 18:24) Gapu ta saanda nga insuro kadagiti miembroda nga ayatenda ti padada a tao ken ti karelihionanda, nakabasol dagitoy a relihion iti dara.

Asidegen ti Maysa a Baro a Lubong!

Asidegen ti aldaw ti pannakadadael dagiti nadangkes. (Sofonias 2:1-3; Mateo 24:3, 7-​14) Kalpasan dayta nga aldaw, dumtengto ti tiempo nga ‘awanton ti panagleddaang, panagsangit, ken ut-ot’ para kadagiti naragsak nga agindeg iti daga. (Apocalipsis 21:3-5) Saanto pulos a mapasamaken dagiti kinadangkok ken masaker agsipud ta maikkatton kadagiti tattao ti panangituray iti daytoy a daga ket maited iti nailangitan a Pagarian ti Dios nga iturayan ti “Prinsipe ti Kappia,” ni Jesu-Kristo.​—Isaias 9:6, 7; Daniel 2:44; Mateo 6:9, 10.

Iti dayta a tiempo, naan-anay a matungpalton ti padto idiay Salmo 46:9: “[Ti Dios] pasardengenna dagiti gubgubat inggana iti ungto ti daga.” Agpaut iti agnanayon dayta a kappia agsipud ta, kas ipadto ti Isaias 2:4, “ti maysa a nasion saannanto nga itag-ay ti kampilan a maibusor iti nasion, ket didanto met adalenen iti pannakigubat uray kaano.” Ipadto kadatayo ti Salmo 37:11: “Dagiti naemma tawidendanto ti daga, ket maay-ayatandanto iti kinaruay ti talna.” Wen, makunanto a “ti isuamin a daga aginana, ket natalna. Tumpuarda [dagiti tao] nga agkankanta.”​—Isaias 14:7.

Amin daytoy kaipapananna nga asidegen ti nalinteg a baro a lubong. Ket iti dayta a baro a lubong, iti sidong ti panagturay ti nailangitan a Pagarian ti Dios, maangayto ti maysa pay a nakaskasdaaw nga okasion​—ti panagungar dagiti natay! Ipanamnama ti Sao ti Dios: “Addanto panagungar agpadpada dagiti nalinteg ken dagiti nakillo.”​—Aramid 24:15.

Idi adda ditoy daga, impakita ni Jesus daytoy babaen ti panangpagungarna iti tattao manipud kadagiti natay. Kas pagarigan, idi pinagungarna ti maysa a balasang, kuna ti salaysay: “Ket dagus a ti balasang timmakder ket nangrugi a magna . . . Dagus a nagragsakda [dagidi nakaimatang] iti napalalo buyogen ti dakkel a panagsiddaaw.” (Marcos 5:42) Inton panagungar, dagidiay napapatay gapu iti kinadangkok agraman ti dadduma pay a nabayagen a natay mapagungardanto ket maikkandanto iti gundaway nga agbiag nga agnanayon iti paraiso a daga. (Lucas 23:43) Ket inton agangay “dagiti immun-una a bambanag didanto malagipen, didanto mapanunoten.”​—Isaias 65:17.

Agtignaykayo a nainsiriban a manggun-od iti umiso a pannakaammo iti Sao ti Dios, ti Biblia, ken mangaramid iti pagayatanna. Iti kasta, laglagipennakayto ti Dios a buyogen ti pananganamong inton risutenna nga agnanayon ti parikut a kinadangkok ken pagbiagenna manen dagiti biktima. Kinuna ni Jesus: “Daytoy kaipapananna ti agnanayon a biag, ti pananggun-odda iti pannakaammo maipapan kenka, ti maymaysa a pudno a Dios, ken iti daydiay imbaonmo, ni Jesu-Kristo.”​—Juan 17:3.

[Dagiti ladawan iti panid 8, 9]

Daytoy a daga ket pagbalinento ti Dios a natalna a paraiso

[Dagiti ladawan iti panid 10]

Ikkatento ti Dios dagiti epekto ti napalabas a kinadangkok babaen ti panangpagungarna kadagiti natay

    Dagiti Publikasion iti Iloko (1984-2025)
    Ag-log out
    Ag-log in
    • Iloko
    • I-share
    • Ti Kayatmo a Setting
    • Copyright © 2025 Watch Tower Bible and Tract Society of Pennsylvania
    • Pagannurotan iti Panagusar
    • Pagannurotan iti Kinapribado
    • Privacy Settings
    • JW.ORG
    • Ag-log in
    I-share