Adu ti Naaramidan Dagiti Babbai
NAIPAGANETGET ti napateg nga annongen dagiti Kristiano a babbai iti pannakaibangon ti sanga nga opisina dagiti Saksi ni Jehova idiay Zimbabwe kabayatan ti programa ti dedikasion a naangay idi Disiembre 12, 1998. Kabayatan ti uppat a tawen a proyekto ti panagibangon, dagiti boluntario manipud iti adu a pagilian—agraman ti ginasut a taga Zimbabwe—ket nangipaay iti panawen, pigsa, laing, ken sanikuada tapno maibangon dagiti napipintas a pasdek a makitayo iti naipakuyog a retrato.
Makitayo ti innem nga agkakadakkel a residence building iti likudan. Ti dakkel a pasdek a kaasitgan kadagitoy isut’ ayan ti komedor, kosina, ken laundry. Dagiti residence building ket addaan iti 61 a siled a pagturogan, ket agarup 200 ti mapakan iti komedor. Ti opisina ket adda iti makinkannigid a sanguanan. Adda iti tengnga ti reception area, ket iti kannawan isu ti bodega, a nakaangayan ti programa ti dedikasion.
Daytoy nagpintas a pasilidad ti sanga idiay Zimbabwe, idiay makin-abagatan nga Africa, ket maysa laeng kadagiti adu a proyekto a nairingpas sipud idi nangrugi dagiti Saksi ni Jehova iti internasional a programa ti panangibangon idi Nobiembre 1985. Insalaysay ti Agriingkayo! nga Agosto 22, 1991, daytoy a programa iti maysa nga artikulo a napauluan “Baro a Banag iti Internasional a Panagbangon.”
Maipapan iti annongen dagiti babbai iti dayta a programa, impadamag ti Agriingkayo: “Adu kadakuada ti nasanay a mangigalut kadagiti pagpatibker a landok ken barut, mangipuesto ken mangmasilia iti baldosa, agraman ti panagliha ken panagpinta. Dadduma ti mangaywan kadagiti nasken a trabaho iti pagtaengan. Nagsayaat ngarud ti maitultulongda amin iti trabaho kadagiti lugar a pagibangbangonan iti intero a lubong.”
Kabayatan ti nabiit pay a programa ti dedikasion idiay Zimbabwe, dagiti nangiwanwan iti panangibangon a da George Evans ken James Paulson pinagdiligda ti annongen dagiti babbai iti panangibangon iti sanga idiay Zimbabwe ken ti annongen dagiti babbai idi naibangon ti kadaanan a tabernakulo idiay Israel. “Immayda, tunggal maysa a natignay ti pusona,” kuna ti Biblia maipapan kadagiti Israelita, “agpadpada nga immay, lalaki ken babbai.”—Exodo 35:21, 22.
Babaen ti panangusar da Kabsat Evans ken Paulson iti daytoy a salaysay ti Biblia, impaganetgetda ti kalidad ti nagapuanan dagiti babbai. Inadawda ti salaysay ti Biblia: “Amin dagiti babbai a nanakman dagiti puspusoda nagtibbida babaen kadagiti im-imada, . . . amin dagiti babbai a nasaririt ti pusoda.” Kinapudnona, dagiti babbai ket karaman kadagidiay situtulok a nagtrabaho. “Tunggal lalaki ken babai, a natignay ti pusoda a mangyeg a maipaay iti amin nga aramid, a ni Jehova imbilinna idi nga aramiden ni Moises.”—Exodo 35:25, 26, 29.
Maipapan iti proyekto ti sanga ti Zimbabwe, kastoy ti kinuna dagiti manangaywan iti panagibangon: ‘Inaramid dagiti babbai ti tunggal trabaho nga inaramid dagiti lallaki.’ Karaman daytoy ti panangigalut kadagiti landok ken panangpaandar iti dadakkel nga alikamen. Kinuna ni Kabsat Paulson a minantener dagiti babbai a nasileng, nadalus dagiti trak a pagbunag ken pagkiwar iti semento ken dadduma pay a dadakkel nga alikamen, a kaaduanna, saan a masansan nga ar-aramiden dagiti lallaki.
Talaga nga agyamantayo iti rinibu a babbai a makiramraman a kakadua dagiti lallaki iti sangalubongan a panagibangon kadagiti sanga nga opisina ken Kingdom Hall dagiti Saksi ni Jehova!
[Ladawan iti panid 26]
Sanga nga opisina idiay Zimbabwe