No Saan nga Agtudo

BABAEN TI KORESPONSAL TI AGRIINGKAYO! IDIAY BRAZIL

ITAY napan a tawen, ti nakaro a tikag ti nangdadael iti kaaduan a paset ti makin-amianan a daya ti Brazil. Sigun iti magasin a Veja, ginasut a ribu a nordestinos, kas pangawag kadagiti umili iti makin-amianan a daya a paset ti pagilian, ti agbibiag idin “nga awanan gaway iti saanna a panagtudo.” Ti tikag ti nangdadael kadagiti mula a pagay, utong, ken mais, a nakaigapuan ti nasaknap a bisin​—ti kakaruan iti 15 a tawen. Iti dadduma a lugar, kimmiddit uray ti suplay ti mainum a danum.

Saanen a kabarbaro ti tikag kadagiti taga Brazil. Idi 1877, iti kakaruan a tikag iti pagilian, 500,000 kadakuada ti natay gapu iti bisin. Iti daydi a tiempo, ti emperador ti Brazil a ni Dom Pedro II, inkarina nga ipamuspusan ti problema iti tikag uray no kasapulan nga ilakonan ti kaudian a saniata iti koronana tapno maaramidna laeng dayta! Daytat’ nasurok a 100 a tawenen ti napalabas; ngem adda pay laeng ti problema agingga kadagitoy nga aldaw. Kabayatan ti tikag itay napan a tawen, adda dagiti pattapatta nga inapektaranna ti aginggat’ sangapulo a milion a tattao nga agnanaed iti 1,209 a siudad iti makin-amianan a daya ti Brazil.

Siaayat a Nagtignay Dagiti Pada a Saksi

Idi a dagiti damag maipapan iti tikag ket nakagteng iti sanga nga opisina ti Watch Tower Society idiay Brazil, dagus nga adda naaramid a pamuspusan. Naibaon dagiti agdaldaliasat a pannakabagi kadagiti nakaro ti pannakaapektarna a lugar iti estado ti Bahia, Ceará, Paraíba, Pernambuco, ken Piauí tapno tingitingenda ti kinakaro ti problema. Naduktalan dagiti agdaldaliasat a manangaywan a ti 900 a Saksi ken mayad-adalan iti Biblia nga agnanaed kadagidiay a lugar ket agkasapulan unay iti tulong. Ubi laengen ti pagtaraon ti dadduma kadakuada; innapuy laeng ti kanen ti dadduma. Adda pamilia nga awan kanenda ket gatas laengen ti pammigat, pangaldaw, ken pangrabiida. Adda Kristiano a sister nga addaan kanser ti napilitan a nangilako iti kamana tapno makagatang iti bassit taraon. Adda pamilia a buklen ti innem ti nangipagarup a daydin ti maudi a pannanganda idi dimteng ti tulong manipud kadagiti Kristiano a kakabsatda.

Dagus a naorganisar dagiti komite ti saranay a mangibunong kadagiti taraon ken suplay. Sipaparabur a nagidonar dagiti Saksi a taga Recife ken dadduma pay a kabangibang a siudad kadagidiay agkasapulan. Ngem idi ad-adu pay ti kasapulan a saranay, timmulong metten dagiti Kristiano a taga Rio de Janeiro kadagiti kakabsatda. Iti las-ud ti apagbiit a tiempo, nakaidonar dagiti Saksi iti 34 a tonelada a taraon ken binayadanda ti gastos ti pannakaitulod dagiti suplay iti 2,300 a kilometro nga agturong idiay Recife.

Kadagiti kabesera dagiti estado ti Piauí ken Paraíba, innem a tonelada a taraon ti dagus a naurnong. Nausar ti maysa a Kingdom Hall iti siudad ti Fortaleza kas temporario a pagipempenan kadagiti naidonar a taraon. Ngem adda problema. Kasano a maitulod dagiti Saksi ti taraon iti destinasionna? Maysa a lalaki a saan a Saksi ni Jehova ti siaasi a nangipausar iti trakna. Ngem matambangan ken masamsam idi dagiti komboy a mangitulod kadagiti taraon ken suplay. Makadanon ngata dagiti naidonar a banag iti destinasionda? Determinado dagiti Saksi a mangammo. Buyogen ti naan-anay a pammati ken Jehova a minanehoda ti trak a nakailuganan ti taraon nga agturong iti lugar. Sitatalged a naidanon dagiti suplay ket naawat a buyogen ti panagyaman.

Ragsak iti Panangted ken Panangawat iti Tulong

Dagiti Saksi a nairaman iti pannakaorganisar ti panangsaranay ket naragsakan iti gundaway a matulonganda ti kakabsatda. Kastoy ti kinuna ti maysa a panglakayen iti kongregasion nga agnanaed idiay São Paulo: “Itay napalabas nga adda bisin, saankami a naawis a mangidonar iti taraon. Anian a yamanmi ta naawiskami ita a gundaway!” Kastoy ti insurat dagiti Saksi idiay Fortaleza: “Maragsakankami unay a timmulong kadagiti kakabsatmi, tangay sigurado nga ammomi a naparagsakmi ti puso ni Jehova. Pulos a diminto malipatan ti kunaen ti Santiago 2:15, 16.” Kastoy ti mabasa kadagita a bersikulo ti Biblia: “No ti kabsat a lalaki wenno kabsat a babai adda iti lamolamo a kasasaad ket agkurang iti taraon nga umdas a maipaay iti aldaw, ngem ti maysa kadakayo kunaenna kadakuada: ‘Mapankayo a sitatalna, aginudo ken agbussogkayo,’ ngem dikay ited kadakuada dagiti masapsapul a maipaay iti bagida, ania ti pagimbagan dayta?”

No dadduma, adda makaparegta a mensahe nga inragpin dagiti Saksi a nagidonar iti suplay kadagiti pakete ti taraon. Kastoy ti nailanad iti maysa a mensahe: “Laglagipenyo ti kari a masarakan iti Salmo 72:16 nga asidegen nga addanto panaglaplapusanan ti taraon iti baro a lubong ti Dios.” Siempre, agyamyaman unay dagiti Saksi a naapektaran iti bisin iti kinaasi ti kakabsatda. Buyogen panangapresiar a nagsurat ti maysa a Saksi a ti pamiliana ket nakaawat iti kasapulan unay a tulong: “Matmatanmi a sangapamiliaan daytoy nga aramid kas nabatad a panangipakita iti ayat ti naasi a Dios ken Amatayo a ni Jehova, ken ti naayat a pannakaseknan ti organisasionna kadakami a miembrona. Daytoy ti ad-adda a nangpasinged kadakami kenkuana ken iti ilina.”

Manayon a Solusion

Naimbag laengen ta adu ti danum iti makin-amianan a daya ti Brazil; adda ti kas man la baybay ti kaaduna a danum ti tamnay iti uneg ti daga, agraman ti aglaplapusanan a danum kadagiti reservoir. No posible la koma a magun-odan ti amin dagitoy a gubuayan ti danum, nabunga koma ti agrikultura ti daga.

Asidegen a marisut a permanente ti problema a nakariribukan unay idi ni Emperador Dom Pedro II. Dumteng dayta nga aldaw inton ti Pagarian ti Dios nga iturayan ni Jesu-Kristo ti mangrisutto iti amin a problema ti daga, agraman ti bisin. Iti kasta, makitanto ti natikag a daga ti kaitungpalan ti padto ni Isaias: “Iti let-ang pumsuakto dagiti dandanum, ken barbaresbes iti tay-ak a langalang. Ket ti sumilsilap a darat agbalinto a libtong, ken ti mawaw a daga agbalinto nga ub-ubbog ti danum.”​—Isaias 35:1, 2, 6, 7.

[Kahon/Dagiti ladawan iti panid 15]

“Aramidentayo Koma ti Naimbag Kadagiti Isuamin”

Kastoy ti imbalakad ni apostol Pablo kadagiti kapammatianna: “Aramidentayo koma ti naimbag kadagiti isuamin, ngem nangnangruna kadagidiay nainaig kadatayo iti pammati.” (Galacia 6:10) Ti nabiit pay a tikag idiay Brazil ti nangted iti gundaway kadagiti Saksi ni Jehova a mangyaplikar iti dayta a balakad iti praktikal a pamay-an. Impakitada ti naayat a pannakaseknan saan laeng a kadagiti kapammatianda no di ket uray iti sabsabali. Kas resultana, dadduma a tattao a bumusbusor idi iti trabaho dagiti Saksi ni Jehova ti nangtingiting manen iti panangmatmatda kadakuada.

Maysa a lalaki ti saan unay a maragsakan idi damo iti pannakiadal ni baketna iti Biblia kadagiti Saksi ni Jehova. Idi agangay, inranuden ni baketna dagiti kabarbaro a patpatienna kadagiti sabsabali. Idi kimmaro unay ti bisin, dimteng dagiti Saksi iti lugarda ket insangpetanda ti agassawa iti taraon. Nasdaaw unay ti lalaki ta uray la inkeddengna nga aramidennan ti inkarina idi a pulos a dina aramiden​—ti makigimong iti Kingdom Hall iti lugarda. Nupay adda pay laeng ti sumagmamano a panagduaduana maipapan iti pannakaipaltiing ti Biblia, inawaten daytoy a lalaki a dati a bumusbusor ti panagadal iti Biblia iti pagtaengan.

Iti maysa pay a lugar, kastoy ti impadamag dagiti Saksi: “Nasdaawkami ta nagbiit a dimteng dagiti mangsaranay a suplay. Ad-adu ti naidonar a taraon ngem ti ninamnamami. Isu a kalpasan ti panangasikasomi kadagiti kasapulan ti kakabsatmi ken dagiti pamiliada, nagibunongkami iti taraon kadagiti estudiante iti Biblia, kadagiti kabagianda, agraman kadagiti kaarruba dagiti Saksi ni Jehova.”

Nangted dagiti Saksi nga agnanaed iti maysa a purok kadagiti nabalkut a taraon iti dadduma a kaarrubada. Kastoy ti kinuna ti maysa nga agyamyaman a bumalay: “Ar-aramidenyo ti insuro ni Kristo; mangtedkayo ngem dikay mangnamnama iti aniaman a subadna.”

[Ladawan iti panid 14]

Dagiti epekto ti tikag

[Picture Credit Line iti panid 13]

UN/DPI Photo by Evan Schneider