Panangtingiting Kadagiti Estoria

AGDUDUMA ti reaksion dagiti tattao kadagiti moderno-aldaw nga estoria maipapan iti pannakakita kadagiti anghel. Umuna, dakamatentayo dagidiay mamati. Ikalinteganda a tangay nakaad-adu ken nakasaksaknap dagita nga estoria, sigurado a pudno dagitoy. Maikadua, adda dagidiay agpangpangadua. Ipatuldoda nga awan ti natibker a pammaneknek a mangsuportar kadagita a panamati. Ikalinteganda a ti nasaknap a panamati dina pagbalinen a pudno ti maysa a banag. Ngamin, mamati idi dagiti tattao kadagiti sirena. Maikatlo, adda met dagidiay neutral. Iti panangyebkasna iti kastoy a neutral a panangmatmat, kastoy ti kuna ti libro nga Angels​—Opposing Viewpoints: “Kuna ti adu a tattao a nakakitadan kadagiti anghel. Saan a mapaneknekan dagitoy a pannakakita; mapapati a pudno dagitoy uray awan ti pammaneknek. Nupay kasta, uray dagiti agpangpangadua saanda a mapaneknekan nga ulbod dagitoy, ket manmano ti nangpadas.”

Adu a tattao ti umanamong a mapagtalkan ti Biblia a gubuayan iti impormasion maipapan iti lubong dagiti espiritu.a Matulongannatayo a mangtingiting kadagiti moderno-aldaw nga estoria maipapan kadagiti anghel. Kas nalabit pagaammom, patalgedan ti Biblia kadatayo a dagiti anghel ket pudno, mannakabalin, nadayag nga espiritu a parparsua. Aglaon ti Biblia kadagiti salaysay maipapan kadagiti anghel a nagipadamag ken nangispal kadagiti adipen ti Dios iti pannakadangran.​—Salmo 104:1, 4; Lucas 1:26-33; Aramid 12:6-11.

Ipamatmat met ti Biblia nga adda dagiti dakes nga anghel. Dagitoy nga espiritu a parsua allilawen ken iyaw-awanda dagiti tattao, nga iyadayoda dagitoy iti Dios. (2 Corinto 11:14) Adda ngarud naimbag a rason a mamakdaar ti Biblia: “Dikay patien ti tunggal naipaltiing nga ebkas, no di ket subokenyo dagiti naipaltiing nga ebkas tapno makitayo no nagtaudda iti Dios.” (1 Juan 4:1) Kas pagarigan, sakbay a mamatitayo kadagiti padto ti agkunkuna nga isu ket mammadto, nainsiriban a tingitingentayo ti ibagbagana no maitunos iti Sao ti Dios, a mabalin a kunaenna nga itantandudona. Sigurado nga inanamaentayo a dagiti moderno-aldaw nga estoria maipapan kadagiti panagparang ti anghel makapagtalinaedda iti kasta met la a pannakasukimat. Kasano ngarud a dagiti moderno-aldaw nga estoria maipapan kadagiti pannakakita iti anghel maipadpad kadagiti nailanaden iti Kasuratan?

Ulbod ti Pagarup ti Adu Maipapan Kadagiti Anghel

Rugiantayo babaen ti pananglawlawag kadagiti dua a nasaknap nga ulbod a pagarup maipapan kadagiti anghel. Maisupadi iti nalatak a pammati, dagiti anghel saanda a nagbiag idi a kas tattao. Nabayagen nga addada idiay langit sakbay a pinarsua ti Dios ti biag ditoy daga. Kuna ti Biblia nga idi “inkabil [ti Dios] dagiti pamuon ti daga . . . , amin dagiti annak a lallaki [dagiti anghel] ti Dios dimmir-ida gapu iti rag-o.”​—Job 38:4-7.

Sabali pay a moderno a pagarup ket dagiti anghel nalulok ken manangpanuynoy iti kinadakes. Imbes ketdi, salimetmetan dagiti matalek nga anghel dagiti nalinteg a pagalagadan ti Dios ken agtignayda sigun iti panangiturongna. Agserbida iti Dios, saan a kadagiti tattao.​—Salmo 103:20.

Interesado Dagiti Anghel iti Naespirituan a Pagimbagantayo

Mairaman kadagiti agdama nga estoria maipapan kadagiti anghel, nagadu dagiti salaysay maipapan iti panangispal. Iti maysa kadagiti kaaduan a malako a libro, mabasatayo ti maipapan iti balasitang a siiinayad nga inyadayo ti di makita nga ima manipud iti maur-uram a balay. Saritaen ti maysa pay a libro maipapan iti dua nga estudiante iti kolehio a napupok iti kotseda gapu iti bagyo a niebe. Kellaat a nagparang ti maysa a trak ket ginuyodna dagitoy nga impan iti natalged a lugar, ngem awan ti makita a nagdalanan ti trak! Iti maysa pay a lugar, ibaga ti sabali nga estoria ti maipapan ken Ann, nga addaan iti kanser. Tallo nga aldaw sakbay a mayospital tapno maopera, adda natayag nga estranghero nga immay iti balayna. Inyam-ammona ti bagina a ni Thomas ket imbagana nga isut’ imbaon ti Dios. Intayag ni Thomas ti imana, ket narikna ni Ann ti napudot, puraw a lawag a simmarut iti bagina. Idi simmangpet tapno agpaopera, nasdaaw dagiti doktor. Awanen ti kanserna!

Mangpataud dagitoy nga estoria iti nalawag a saludsod a, No tunggal maysa ket addaan iti anghel de la guardia, apay a naispal ti dadduma a tattao, idinto ta adu ti saan a naispal? Minilion ti natayen kadagiti sakit, gubat, bisin, ken dagiti natural a didigra. Sigurado nga adu dagiti sipapasnek a nangikararag iti tulong. Apay a dagitoy ket saan nga inispal ti maysa nga anghel de la guardia?

Masungbatan ti Biblia daytoy a saludsod. Ipatuldona a saan a mangidumduma ti Dios. (Aramid 10:34) Kasta met, nupay interesado dagiti nasungdo nga anghel ti Dios iti pisikal a pagimbagantayo, ad-adda nga interesadoda iti naespirituan a pagimbagantayo. Dinakamat ni apostol Pablo daytoy babaen ti saludsod: “Saanda [dagiti anghel] aya nga espiritu amin a maipaay iti publiko a panagserbi, a naibaon tapno agserbida kadagidiay agtawidto iti pannakaisalakan?” (Hebreo 1:14) Ti pisikal a tulong mangipaay kadagiti temporario a gunggona, ngem ti naespirituan a tulong makaipaay kadagiti agnanayon a gunggona.

Kasla awan kaimudingan ti adu nga estoria maipapan kadagiti anghel. Makuna a tulongan dagiti anghel ti nabannogen nga ina a mangsukat kadagiti abbong ti kama, mangipalagip iti makitienda a gumatang iti posporo, ken tumulong kadagiti tsuper nga agsapul iti pagparadaan. Kastoy ti kuna ti agay-ayek-ek nga agtutubo a babai idiay Scotland: “Nagparadaak iti maiparit a pagparadaan idiay St Mary’s Street iti tallo a lawas a napalabasen ket kiniddawko iti anghel de la guardiak a paraburanna iti ayat ken panangngaasi. No adda umasideg a mangiwanwanwan iti trapiko, maringbawanda iti ayat ta baybay-andan ti kotsek. Saanak pay a natiketan a pulos.” Di pakasdaawan a ti moderno-aldaw nga anghel de la guardia ket ipadis ti dadduma iti naparabur a gayyem wenno iti Santa Claus nga agpaay kadagiti nataengan.

Saan a Labsingen Dagiti Matalek nga Anghel ti Sao ti Dios

Dagiti libro maipapan kadagiti anghel napnoda iti adu a pagsasao ken balakad a maipagarup a naggapu iti lubong dagiti espiritu. Kas pagarigan, kuna ti maysa a libro a naglaon kadagiti pannursuro nga inyallatiw ni Miguel arkanghel iti maysa a babai a taga Colorado, E.U.A. Kastoy ti nairaman kadagiti “sasao” ni Miguel: “Amin a dalan agturong iti Dios. Amin a pammati, amin a lawag ti kinapudno agturong iti Dios.” Maisupadi iti dayta, kinuna ni Jesus nga adda laeng dua a narelihiosuan a dalan ken maysa laeng kadagitoy ti agturong iti anamong ti Dios ken iti biag nga agnanayon. Ti sabali agturong iti di pannakaanamong ken iti agnanayon a pannakadadael. (Mateo 7:13, 14) Nalawag a saan a mabalin a pudno dagitoy a dua.

Iti “baro nga espiritualidad,” sadino ti pagsaadan “dagiti anghel” no maipapan iti panagasawa ken moralidad? Iti maysa a libro maammuan ti agbasa ti maipapan ken Roseann, a nangibagaan ti “anghel” de la guardiana: “Adu a tattao ti kasaritam, ket ti wagas ti panagbiagmo saanen a ti pannakikabbalaymo iti [asawam]. Isut’ ay-ayatem ken ay-ayatennaka, ngem tiempon ti panagsinayo.” Nakidiborsio. Ngem, kunaen ti Biblia a guraen ti Dios ti panangisina nga awan dagiti umno a pakaibatayanna. (Malakias 2:16) Isalaysay ti sabali nga estoria ti maipapan iti agkabkabbalay nga agpada a naasawaanen, a mamatida a maragragsakan dagiti anghel a makaim-imatang iti ar-aramidenda ken salsalikubkobenda ida iti naisangsangayan nga aglawlaw. Ngem kuna ti Biblia: “Dika makikamalala.”​—Exodo 20:14.

Saan kadi a dagitoy a moderno-aldaw a mensahe balbaliwanda ti Biblia? Saan, di agbalbaliw ti Sao ti Dios. Insurat ni apostol Pablo kadagiti dadduma idi umuna a siglo: “Agsiddaawak ta naipanawkayo a sidadaras unay manipud iti Daydiay nangayab kadakayo babaen ti di kaikarian a kinamanangngaasi ni Kristo nga agturong iti sabali a kita ti naimbag a damag. Ngem saan a sabali dayta; adda laeng dagiti sumagmamano a mangpatpataud iti riribuk kadakayo ken kayatda a ballikugen ti naimbag a damag maipapan iti Kristo. Nupay kasta, uray no dakami wenno ti maysa nga anghel manipud langit ideklarana kadakayo kas naimbag a damag ti maysa a banag a nalablabes ngem iti indeklarami kadakayo kas naimbag a damag, isu mailunod koma.”​—Galacia 1:6-8.

“Panangawag Kadagiti Amin nga Anghel!”

Rumbeng kadi nga awagantayo dagiti anghel a tumulong a mangtaming kadagiti parikut ken peggad iti biag? Daytoy ti topiko ti adu a libro. Adtoy ti dua a pagarigan. Naibaga nga ipakita ti libro nga Ask Your Angels kadagiti agbasbasa no ‘kasano a maaddaanda iti pannakabalin dagiti anghel tapno mapasubli ti napukaw a katataoda ken maragpat dagiti kalatda.’ Ti kaasping dayta a libro isu ti Calling All Angels!: 57 Ways to Invite an Angel Into Your Life.

Ngem, pulos a di iparegta ti Biblia nga awagantayo dagiti anghel. Imbatad ni Jesus daytoy iti modelo a kararag. Kinunana: “Agkararagkayo, ngarud, a kastoy: ‘Amami nga adda iti langlangit . . .’” (Mateo 6:9) Kasta met, insurat ni apostol Pablo: “Iti amin a banag babaen ti kararag ken araraw agraman panagyaman maipakaammo koma dagiti dawdawatyo iti Dios.”​—Filipos 4:6.

Iti Nagan Dagiti Anghel

“Ti baro nga espiritualidad” ipaganetgetna ti kinapateg ti panangammo iti nagnagan dagiti anghel. Ipaay dagiti nalatak a libro ti maipagarup a nagnagan ti rinibu nga anghel. Apay? Saan a tapno pennekenna ti awan serserbina a panaginteres; maawaganda tapno sukonen dagitoy. Daytoy ket mainaig unay iti panagsalamangka. Kunaen ti Encyclopedia of Angels a mairaman iti ritual, dagiti aruaten iti panagsalamangka, ken dagiti panagdawdawat, “ti panagusar ‘kadagiti nagan nga addaan pannakabalin,’ wenno nagnagan dagiti espesipiko nga espiritu, pataudenda dagiti nabibileg a panagpigerger a mangipalubos iti panaginnuman ti pisikal a lubong ken ti lubong dagiti espiritu, tapno mabaelan ti mammadles . . . ti makiuman kadagiti espiritu.” Ngem, nalawag nga ibaga ti Biblia: “Dikayto . . . agaramid iti padpadles.”​—Levitico 19:26.

Ipalgak ti Biblia ti nagan ti dua laeng a matalek nga anghel, da Miguel ken Gabriel. (Daniel 12:1; Lucas 1:26) Iti panangipaayna kadagitoy a nagan, ipakita ti Biblia a dagiti anghel ket naisalsaluminada nga espiritu a persona. Apay a saan a naited ti ad-adu a nagan? Mabalin a ti makagapu ket tapno malapdan ti panangitan-ok dagiti tattao kadagiti anghel iti di maiparbeng a dayaw​—banag a saan nga ikagkagumaan dagiti anghel a gun-oden. Isu nga idi kiniddaw ni Jacob iti maysa nga anghel nga ibagana ti naganna, nagkedked ti anghel. (Genesis 32:29) Kalpasanna, ti anghel a nagparang ken Josue saanna nga impakaammo ti naganna no di ket inyam-ammona ti bagina a kas “prinsipe ti buyot ni Jehova.” (Josue 5:14) Kasta met, idi dinamag ti tatang ni Samson ti nagan ti anghel, naibaga kenkuana: “Apay-apay saludsodem ti naganko, idinto nga isu ti nakaskasdaaw?” (Oc-ocom 13:17, 18) Tarigagayan dagiti matalek nga anghel ti Dios a dayawentayo ti Dios ken umawagtayo kenkuana, saan a kadakuada.

[Footnote]

[Blurb iti panid 6]

“Para kadagidiay makarikna a nainget unay ti Dios ken dagiti pagalagadanna, . . . ti panangiraman kadagiti anghel [iti Baro a Panawen] ti kombeniente . . . naasi, ken saan a mangukom. Ken nalaka a magun-odan ti amin a kas iti aspirin.”​—Magasin a Time

[Kahon iti panid 5]

Dagiti Moderno-Aldaw a “Pannakakita” Kadagiti Anghel ken Dagiti Ekstraterestrial

Adu a tattao itatta ti agkunkuna a nakakitadan kadagiti anghel ken nakasaritada idan. Kuna ti dadduma a nakiumandan kadagiti ekstraterestrial manipud iti sabali a lubong. Ti libro nga Angels​—An Endangered Species ilistana dagiti nagpapadaan dagitoy a salaysay, a kunaenna nga agpapada ti panangilawlawagda.b Ti sumaganad isu ti sumario ti dadduma a nagpapadaanda a nailista iti libro.

1. Agpadpada a naggapu dagiti anghel ken dagiti ekstraterestrial kadagiti sabali a lubong.

2. Agpadada nga adelantado a kita ti biag, naespirituan man wenno teknolohikal.

3. Ti mannakigayyem nga anghel wenno ekstraterestrial ket agkabannuag ken napintas ti langada, ken manangngaasida unay.

4. Agpadada a saan a marigatan iti pagsasao, a makisaoda a silalawag iti pagsasao ti dumdumngeg.

5. Agpadada a nalaing a tumayab.

6. Agpada a ti panagparang dagiti anghel ken dagiti ekstraterestrial ket mapakuyogan iti naraniag a lawag.

7. Agpadada nga agparang a gagangay a nakawesan a naan-anay iti nagayad wenno nakipet a tunika. Puraw wenno asul ti paboritoda a kolor.

8. Gagangay a kataytayagda dagiti tao.

9. Agpadada a maseknan iti kasasaad ti sangatauan ken ti planeta.

10. Ti pammaneknek maipapan iti pannakakita kadagiti ekstraterestrial ken dagiti anghel isu ti testimonia ti nakakita.

[Footnote]

[Ladawan iti panid 7]

Aglaon ti Biblia kadagiti pudno a salaysay maipapan kadagiti anghel a nagparang iti tattao