Tinungpalda ti Karida!

KAYAT ni Antonio, nga addan iti maudi a tawenna iti haiskul, ti mangipaay iti di pormal a pammaneknek kadagiti kaklasena. Isu nga insingasingna iti maestrana iti history nga ipabuyana ti video a Jehovah’s Witnesses Stand Firm Against Nazi Assault. Nupay saan a mamati, immanamong ti maestra nga ipabuyana ti video iti sumaganad nga aldaw.

Kastoy ti insalaysay ni Antonio: “Idi damo, buybuyaen ti maestra ti video a buyogen ti panagpannakkel; ngem idi nabigbigna a dagiti agdindinamag a historiador ti mangisalsalaysay iti pakasaritaan dagiti Saksi ni Jehova kadagiti kampo konsentrasion, inimutektekanna a naimbag. Idi nalpasen, nagyaman kaniak iti panangisingasingko iti video.”

Bayat ti simmaganad a leksion, pinadas ti maestra a deskribiren ti trabaho dagiti Bibelforscher, kas pangawag idi kadagiti Saksi ni Jehova idi a tiempo idiay Alemania; ngem nabigbigna a nasaysayaat no bay-anna ni Antonio a mangdeskribir. Inlawlawag ni Antonio ti paset dagiti Saksi iti kagimongan ken ti dadduma kadagiti doktrinada. Nagturpos babaen ti panagkunana: “Nalawag nga awan magunggona dagiti tattao iti napateg a mensahe nga idanonmi no dida umimdeng kadakami, no ikanalbuogda nga irikep dagiti ridawda iti sanguananmi, wenno dida basaen dagiti publikasionmi.”

Immanamong amin dagiti kaklase ni Antonio iti kastoy a kapanunotan, ket nangisingasing ti maestra iti resolusion iti klase. Iti damo a gundaway, masapul nga umimdengda kadagiti Saksi ken awatenda dagiti publikasionda. Nabayag bassit a nagsasaritaan ti klase ti maipapan iti video. Agasenyo ti ragsak ni Antonio iti simmaganad a sumagmamano nga aldaw idi nakitana ti sumagmamano a padana nga estudiante a dimteng iti klase nga addaan kadagiti publikasion ti Watchtower ken nangngegna ti tunggal maysa kadakuada nga agkuna a nakaisem: “Makitam, tinungpalko ti karik!”