Ti Panangmatmat ti Biblia

Panagulbod​—Maikalintegan Aya?

“NO DADDUMA, SAANEN A MASAPUL NGA AGPALAWAGKA PAY NO AGULBODKA BASSIT.”

KASTA ti kapanunotan ti adu maipapan iti panagulbod. Saan kano a dakes ti agulbod no la ket ta saan a pagdaksan ti sabali a tao. Pagparangenda pay ketdi a nainkalintegan dayta, depende iti kasasaad. Kunada a ti kakaisuna a linteg a nasken a suroten isu ti makunkuna a linteg ti ayat. Iti sabali a pannao, kas inlawlawag ti autor a ni Diane Komp, “saan a bale nga agulbodka basta umiso ti motibom ken umiso ti panggepmo.”

Gagangay ditoy lubong ita ti kasta a panangmatmat. Maklaat dagiti tao kadagiti eskandalo maipapan iti panagulbod dagiti nalatak a politiko ken dadduma pay a panguluen ti lubong. Gapu ta naimpluensiaanda iti kastoy a kasasaad, adu ti agannayas a di mangibaga iti pudno. Kadagiti dadduma, nagbalin pay ketdin nga opisial a pagalagadan ti panagulbod. “Tinangdanandak nga agulbod. Siak ti mangab-abak kadagiti sales contest ket tinawen a makaawatak iti pammadayaw no agulbodak. . . . Kasla daytoy ti kapatgan iti retail sales training iti uray sadinoman,” inreklamo ti maysa a salesclerk. Adu ti mangipagarup nga awan ti pagdaksan ti bassit a panagulbod. Pudno aya daytoy? Adda aya dagiti gundaway a maikalintegan dagiti Kristiano ti panagulbod?

Ti Nangato a Pagalagadan ti Biblia

Siiinget a kondenaren ti Biblia ti aniaman a panagulbod. ‘Dadaelento [ti Dios] dagidiay agsao iti ulbod,’ kuna ti salmista. (Salmo 5:6, NW; kitaenyo ti Apocalipsis 22:15.) Iti Proverbio 6:16-19, adda pito a banag a kuna ti Biblia a karimon ni Jehova. Nairaman a nadakamat ti “naulbod a dila” ken “natiri a saksi nga agbalikas iti ulbod.” Apay? Agsipud ta kagura ni Jehova ti dakes nga ibunga ti kinaulbod. Dayta ti maysa a makagapu nga inawagan ni Jesus ni Satanas a managulbod ken mammapatay. Gapu iti panagulbodna, nailunod ti sangatauan iti ladingit ken ipapatay.​—Genesis 3:4, 5; Juan 8:44; Roma 5:12.

Ti nainget a panangmatmat ni Jehova iti panagulbod ket naipasimudaag iti napasamak kada Ananias ken Safira. Inrantada ti nagulbod kadagiti apostol tapno pagparangenda a naparparaburda ngem iti agpayso. Inggagara ken naiplano ti inaramidda. Gapuna, kinuna ni apostol Pedro: “Nagulbodka, saan a kadagiti tattao, no di ket iti Dios.” Gapu iti daytoy, pinapatay ida ti Dios.​—Aramid 5:1-10.

Sumagmamano a tawen kamaudiananna, binagbagaan ni apostol Pablo dagiti Kristiano: “Dikay pagulbodan ti maysa ken maysa.” (Colosas 3:9) Nasken daytoy a pammagbaga nangnangruna iti kongregasion Kristiano. Kinuna ni Jesus a ti ayat a naibatay iti prinsipio ti pakailasinan dagiti pudno a pasurotna. (Juan 13:34, 35) Tumanor ken rumabuy laeng ti kasta a napudno nga ayat no naan-anay nga agpiar ken agtalekda iti maysa ken maysa. Narigat nga ayaten ti maysa a tao no ditay makapagtalek a ti pudno laeng ti ibagana kadatayo.

Nupay makondenar amin a panagulbod, adda panagulbod a mas serioso ngem iti dadduma. Kas pagarigan, mabalin nga agulbod ti maysa a tao tapno saan a mabainan wenno gapu ta mabuteng. Adda met daydiay agulbod tapno mangranggas wenno mangpasakit. Gapu iti dakes a motibona, pagdaksan ti dadduma ti kasta a naulbod a tao ken mailaksid pay ketdi iti kongregasion no di agbabawi. Yantangay saan nga amin a panagulbod ket nairamut iti dakes a motibo, agannadtayo a ditay mangkondenar lattan no di ket siertuentayo no apay a nagulbod ti maysa a tao. Masapul nga ikonsiderartayo ti motibo ken dagiti kasasaad a mangpalag-an iti inaramidna.​—Santiago 2:13.

“Naannad a kas Kadagiti Serpiente”

Siempre, ti panagbalin a napudno dina kayat a sawen a masapul nga ibagatayo amin nga ammotayo iti asinoman nga agsaludsod kadatayo. Namallaag ni Jesus iti Mateo 7:6: ‘Dikay ited ti nasantuan kadagiti aso, wenno ipurruak dagiti perlasyo iti sanguanan dagiti baboy tapno dida . . . agbuelta ken pisangpisangendakayo.’ Kas pagarigan, adda dagiti banag a di rumbeng a maammuan dagiti tao a dakes ti panggepda. Ammo dagiti Kristiano nga agbibiagda iti naranggas a lubong. Gapuna, binagbagaan ni Jesus dagiti adalanna nga agbalinda a “naannad a kas kadagiti serpiente” bayat nga agtalinaedda a “nasingpet a kas kadagiti kalapati.” (Mateo 10:16; Juan 15:19) Adda dagiti tiempo a saan nga imbaga ni Jesus ti amin a kinapudno, nangruna no pagdaksanna wenno dagiti adalanna ti panangibagana iti dayta. Ngem uray kadagita a gundaway, saan a nagulbod. Imbes ketdi, nagulimek wenno binaliwanna ti saritaan.​—Mateo 15:1-6; 21:23-27; Juan 7:3-10.

Dagiti matalek a lallaki ken babbai a nadakamat iti Biblia, kas kada Abraham, Isaac, Rahab, ken David, nainsiriban ken naannad met ti pannakilangenda kadagiti posible a kabusor. (Genesis 20:11-13; 26:9; Josue 2:1-6; 1 Samuel 21:10-14) Imbilang ti Biblia dagiti kasta a lallaki ken babbai kas natulnog ken matalek a managdaydayaw. Maikarida a tuladen.​—Roma 15:4; Hebreo 11:8-10, 20, 31, 32-39.

Mabalin nga adda dagiti gundaway a kasla panagulbod ti kalakaan a solusion. Ngem nasayaat a tuladen dagiti Kristiano ita ti inaramid ni Jesus ken surotenda ti konsiensiada a sinanay ti Biblia nangnangruna no maipasangoda kadagiti narikut a kasasaad.​—Hebreo 5:14.

Idagadag kadatayo ti Biblia nga agbalintay koma a napudno ken mapagpiaran. Dakes ti panagulbod, ket surotentay koma ti balakad ti Biblia a: “Sawenyo ti kinapudno tunggal maysa kadakayo iti kaarrubana.” (Efeso 4:25) No aramidentay dayta, agtalinaed a nadalus ti konsiensiatayo, maparayray ti talna ken ayat iti kongregasion, ken agtultuloy a maidaydayawtayo “ti Dios ti kinapudno.”​—Salmo 31:5, NW; Hebreo 13:18.

[Ladawan iti panid 20]

Natay da Ananias ken Safira gapu iti panagulbodda