Ti Panangmatmat ti Biblia
Pudno a Pammati—Ania Dayta?
“NO AWAN TI PAMMATI ISU DI MABALIN NGA AY-AYWEN UNAY, TA TI UMADANI ITI DIOS MASAPUL A PATIENNA NGA ISU ADDA KEN ISU AGBALIN A MANANGGUNGGONA KADAGIDIAY SIPAPASNEK A MANGSAPSAPUL KENKUANA.”—HEBREO 11:6.
ANIA ti pammati? Ti pammati ket ilawlawag ti dadduma kas narelihiosuan a panamati iti Dios nga awanan iti natibker nga ebidensia maipapan iti kaaddana. Dinepinar ti Americano a periodista a ni H. L. Mencken ti pammati kas ti “di nainkalintegan a panamati iti kaadda ti di nakappapati.” Daytoy kadi ti pudno a pammati a nadeskribir iti Biblia? Napateg a maawatantayo a naimbag no ania ti pammati agsipud ta kas ti nadakamat iti ngato, ‘no awan ti pammati di mabalin nga ay-aywen ti Dios.’
Kuna ti Biblia: “Ti pammati isu ti kinasigurado kadagiti banag a namnamaentayo.” (Hebreo 11:1, The New Testament in the Language of Today) No kasta, naibasar ti pammati iti umiso a pannakaammo, kadagiti kinapudno a mabalin a pakaibasaran dagiti umiso a desision. Saan laeng a ti panamati ti kalikagumanna no di ket ti rason iti panamati.
Tapno iyilustrar: Nalabit adda gayyemmo a mabalinmo a kunaen: “Mapagpiarak dayta a tao. Agtalekak iti saona. Ammok a tulongannak no adda problemak.” Mabalin a saanmo a maibaga ti kasta iti tao a naam-ammom iti maysa wenno dua pay la nga aldaw, di ngamin? Masapul nga isu daydiay namin-adun a napaneknekanna ti kinamapangnamnamaanna. Kasta met koma ti narelihiosuan a pammati, a mangpataud iti namnama ken panamati a naibasar iti natibker, mapangnamnamaan nga ebidensia.
Pammati Wenno Kredulidad?
Kinapudnona, kaaduan a nakaibasaran ti pammati kadagitoy nga aldaw isu ti kredulidad—kayatna a sawen, ti sidadaan a panamati nga awan ti nabileg a pakaibasaran wenno rason. Masansan a naibasar ti kredulidad iti agbaliwbaliw nga emosion wenno an-anito. Saan a nabileg ti nakaibatayan daytoy a pammati agsipud ta awan ti natalged a nakaibasaranna tapno mapapati.
Ti kredulidad isut’ mangtignay iti maysa tapno agkonklusion a dagus a mabalin a maikontra iti kinapudno nga isursuro ti Biblia. Gapuna, mamakdaar ti Biblia maibusor iti awan nakaibasaranna a pammati: “Ti nanengneng patienna amin a sao; ngem ti manakem a tao matmatanna a nalaing ti papananna.” (Proverbio 14:15) Insurat ni apostol Pablo: “Siguraduenyo dagiti isuamin a bambanag; kumpetkayo a siiirut iti nasayaat.” (1 Tesalonica 5:21) Saan nga itandudo ti Biblia ti kredulidad. Iparegtana ketdi ti pammati a naibasar iti ebidensia.
Nasken a mailasintayo ti pudno a pammati manipud iti kredulidad. Mabalin a relihioso ti maysa a tao ngem saan a pudno ti pammatina. Kinuna ni Pablo: “Ti pammati saan nga ik-ikutan ti isuamin a tattao.” (2 Tesalonica 3:2) Ngem ik-ikutan ti dadduma a tattao ti pammati a naibasar iti Biblia, ket talaga nga impluensiaanna ti biagda.
Ti Pudno a Pammati Isinggalutna ti Tao iti Dios
Ti pammati ket nayarig iti kawar nga addaan kadagiti agnanaig a panagkompiansa ken panagtalek a mangisinggalut iti tao iti Dios. Ngem masapul a mapatanor daytoy a kita ti pammati; saan a naisigud dayta kadatayo. Kasanom a mapatanor ti pudno a pammati? Ilawlawag ti Biblia: “Ti pammati sumaruno iti banag a nangngeg. Kalpasanna ti banag a nangngeg ket babaen iti sao maipapan ken Kristo.”—Roma 10:17.
No kasta, masapul a mangiwayaka iti panawen a manggun-od iti pannakaammo maipapan iti Dios ken kadagiti pannursuro ti Anakna a ni Jesu-Kristo. Kasapulan ti panagregget iti pananggun-od iti daytoy a pannakaammo. (Proverbio 2:1-9) Masapul nga ikagumaam nga ammuen no ania ti ibagbaga ti Biblia tapno makombinsirka a mapagpiaran dayta.
Ngem adda pay nairaman iti pudno a pammati malaksid iti kaadda ti pannakaammo wenno panamati a pudno ti maysa a banag. Iramanna met ti puso—ti pagtaudan ti motibo. Kuna ti Roma 10:10: “Buyogen iti puso ti maysa alagadenna ti pammati.” Ania ti kaipapanan daytoy? Bayat nga agmennamennaka kadagiti nadiosan a banag, a patpatanorem ti panangapresiar kadagitoy, palpalubosam ti mensahe ti Biblia nga umukuok iti pusom. Tumanor ti pammati ken pumigpigsa bayat a magutugotka nga agtalek kadagiti kari ti Dios ken bayat a makitkitam ti ebidensia a bembendisionannaka.—2 Tesalonica 1:3.
Anian a nagpateg ti maaddaan iti pudno a pammati! Matulongantayo a mangsaranget kadagiti narikut a kasasaad buyogen ti panagkompiansa iti Dios, nga agtalektayo iti pannakabalinna a mangiwanwan kadatayo ken iti kinamasindadaanna a mangipaay kadagiti kasapulantayo. Kanayonanna, impatuldo ti Anak ti Dios a ni Jesu-Kristo ti maysa kadagiti agpaut a pagimbagan ti pammati: “Ti Dios inayatna ti lubong iti kasta unay isu nga intedna ti bugbugtong nga Anakna, tapno tunggal maysa a mangalagad iti pammati kenkuana saan koma a madadael no di ket maaddaan iti agnanayon a biag.” (Juan 3:16) Agnanayon a biag—anian a nakaskasdaaw a sagut kadagidiay addaan iti pammati!
Ti pammati iti kari ti Dios a gunggonaanna dagiti adipenna ti mangipaay iti maysa a tao iti baro a panangmatmat iti biag. Kuna ti Hebreo 11:6 a ti pudno a pammati iramanna ti panamati iti kabaelan ti Dios a gunggonaan ‘dagidiay sipapasnek a mangsapsapul kenkuana.’ Nalawag ngarud a ti pudno a pammati ket saan a kredulidad. Ket napatpateg pay dayta ngem iti basta panamati nga adda Dios. Ramanenna ti panangakseptar iti pannakabalin ti Dios nga agserbi kas mananggunggona kadagidiay sipapasnek nga agsapsapul kenkuana. Pudno ken naimpusuan kadi a kayatmo a maam-ammo ti Dios? No wen, manggun-odka ngarud iti umiso a pannakaammo iti Saona, ti Biblia, ket magunggonaanto ti pammatim.—Colosas 1:9, 10.
[Picture Credit Line iti panid 26]
Drawings of Albrecht Dürer/Dover Publications, Inc.