Idi Pinadas ti Bantay ti Kumamang iti Baybay
BABAEN TI KORESPONSAL TI AGRIINGKAYO! IDIAY VENEZUELA
ITI nagbaetan ti baybay ken ti Caracas a kabesera a siudad ti Venezuela, adda 2,000 a metro a bantay a napanaganan iti El Ávila. Iti deppaar nga amianan, adda akikid, adut’ umilina a kosta. Adda sadiay ti kadakkelan nga eropuerto ti Venezuela, ket tapno makapan dagiti turista manipud eropuerto agingga iti Caracas, masapul a lumasatda iti maysa nga usok a naaramid iti uneg a mismo ti bantay.
Kalpasan ti namin-adu a bumayakabak a panagtudona idi napalabas a Disiembre, saanen a maagsep ti El Ávila ti ad-adu pay a danum. Kas man la bimtak dagiti sikiganna bayat a nagayus ti pinullo a ribu a metro kubiko a danum manipud iti bantay. Inladawan ti maysa a tao a kas man la pinadas ti bantay ti kumamang iti baybay. Dagiti balbalay—manipud kalapaw agingga kadagiti mansion—ket linapunos ti napigsa nga ayus ti danum, a nangyanud iti pitak, batbato, ken kaykayo. Nayanud met dagiti kama, refrigerator, telebision, ken uray pay dagiti tattao. Imbaga ti maysa a lakay nga impagarupna a panungpalan idin ti lubong.
Idi agangay, simmardeng ti tudo, isu a nangrugin nga immes-es ti layus. Sigun iti maysa a pattapatta, 50,000 a tattao ti mabalin a natay, ket 400,000 ti naawanan iti balbalay. Adda ngarud naimbag a rason a naawagan daytoy a “ti kakaruan a natural a didigra iti pakasaritaan ti Venezuela.”
Pannakaispal ken Patay
Idi Disiembre 15, naranaan ni Juan Carlos Lorenzo ken ni tatangna ti iyaadalem ti dua a karayan. Dimsaagda iti luganda ket nakikaduada iti 35 a tattao iti uneg ti maysa a pasdek. Ngem di nagbayag, pimmigsa ti tudo ket bigla a naglayus. Nakapagkamang ti amin iti atep. Kabayatanna, naitupa iti pasdek dagiti dadakkel a bato ken puon ti kayo. Di nagbayag, narakrak dagiti diding iti umuna ken maikadua a kadsaaran, isu a dagiti adigi ken atep laengen ti nabati. Nagunggon ti nakapuy a pasdek bayat a nagtultuloy ti pannakaitupa ti adu a bambanag.
Dimteng ti maysa a helikopter, ngem saan a makapagdisso iti narukopen a pasdek. Bayat a pimmanaw, nagsinnangit a nagpinnakada ni Juan Carlos ken ti tatangna, tangay impagarupda a kanibusananda idin. Pagammuan ta adda simmangpet a dua a helikopter. Saggaysa a naaon ti amin nga adda iti atep bayat a sisisigo a pinagtalinaed dagiti piloto ti helikopterda iti ngatuen ti atep. Apaman a nakapanawen dagiti helikopter, narba ti pasdek gapu iti pegges ti danum. Apag-isu a nakapanawda!
Rinibu ti nagbakuit—dadduma iti babassit nga eroplano, adda dagiti babaen ti kalsada, ken kadagiti bilog ti militar a nadisenio a tumakdang. Nagpipila iti atiddog dagiti tattao—imbaklay ti dadduma dagiti ubbing—a naigiya babaen iti tali tapno makaluganda kadagiti bilog. Nupay nakaitugot ti dadduma kadagiti personal nga alikamenda, adu ti nagbakuit a dagiti laeng insuotda a kawes ti naitugotda.
Panangsaranay
Iti sanga nga opisina dagiti Saksi ni Jehova idiay Venezuela, nangrugi a dagus ti panangsaranay apaman a naipadamag ti didigra. Nupay kasta, nakarugrugit wenno nalayusen dagiti kalsada. Kalpasan ti sumagmamano nga aldaw, nalukatan ti maysa a benneg ti haywey tapno mausar a pang-emerhensia, isu a napalubosan a lumasat dagiti lugan ti Saksi a napno kadagiti medikal a suplay ken nagluganan dagiti kualipikado a personel. Kinuna idi agangay ti maysa nga opisial: “Ammo ti gobierno a dagiti Saksi ni Jehova ti maysa kadagiti kaunaan a timmulong ken nangibakuit kadagiti tattao iti dayta a lugar.”
Inyurnos dagiti Saksi ti panagsapul kadagiti agkasapulan iti tulong. Nayurnos ti pagluganan dagiti agbakuit nga agpa-Caracas, nga adu kadagitoy ti awan man la ti naitugotda. Adda dagiti disso iti siudad a nayurnos a pagurnongan, tapno maiwaras ti taraon, kawes, ken agas kadagiti tattao nga agkasapulan. Ngem saan la a taraon ken kawes ti kasapulan ti kaaduan kadakuada. Kasapulanda unay ti pagnaedan. Siraragsak a pinadagus ida dagiti Kristiano a kakabsatda.
Uray idi nabayagen a napalabes ti didigra, addaan pay laeng dagiti tattao iti gagayyem ken kakabagian a makipagnanaed kadakuada. Dagiti Saksi idiay Puerto Cabello a da Joel ken Elsa ket agnanaed iti bassit nga apartment. Makabulan kalpasan ti bagyo, kaskasdi nga adda pay la 16 a tattao a makipagnanaed kadakuada. Adu ti naawanan iti panggedan, saan laeng a pagtaengan. Awanen dagiti lugar a dati a pagtartrabahuanda.
Nakalkaldaang ta dandani saanen a mailasin ti dati a napnot’ tao a pagayuyangan ken sangladan. Nailumlom ti dadduma a lugan iti kapitakan, idinto ta ti dadduma ket naipadeg iti diding, naisalat kadagiti poste, wenno naibalandra kadagiti ridaw wenno tawa. Ti naurnong a timmangken a pitak—agingga iti tallo a metro iti dadduma a lugar—ti makagapu a ngimmato unay dagiti eskinita ta bayat a magna ti maysa a tao iti dayta, kataytayagna dagiti makinngato a kadsaaran wenno uray ti atep dagiti malabsanna a pasdek!
Imbaga ti dadduma a taga Venezuela nga adda napateg a leksion a naadalda iti didigra—ti dida panagtalek kadagiti material a banag. (Lucas 12:29-31) Adu ti nangapresiar iti pammagbaga ni Jesu-Kristo: ‘Isardengyo ti agurnong maipaay iti bagbagiyo kadagiti gameng iti daga, sadiay nga ibusen ti sanga ken lati, ken sadiay a serken ken takawen dagiti mannanakaw. Imbes ketdi, agurnongkayo maipaay iti bagbagiyo kadagiti gameng idiay langit, sadiay a saan nga ibusen ti sanga wenno uray lati, ken sadiay a saan a serreken ken takawen dagiti mannanakaw. Ta no sadino ti ayan ti gamengmo, addanto met sadiay ti pusom.’—Mateo 6:19-21.
[Mapa/Dagiti Ladawan iti panid 16, 17]
(Para iti aktual a pannakaurnosna, kitaem ti publikasion)
VENEZUELA
Caracas
Lugar ti didigra
COLOMBIA
[Ladawan iti panid 17]
Ni Rubén Serrano agraman ti narba a balayna
[Dagiti ladawan iti panid 18]
1. Inurnong dagiti boluntario idiay Caracas dagiti naited a tulong
2, 3. Inikkat ti Maiquetía Congregation ti pito a pie a timmangken a pitak iti Kingdom Hall-da
4. Dagitoy a Saksi nadadael ti balbalayda ket kalpasanna nagboluntarioda a mangibangon iti baro a balbalay para kadakuada ken kadagiti sabsabali
5. Maysa kadagiti dandanin malpas a balay idiay San Sebastián de los Reyes