PAKASARITAAN TI BIAG
Inyun-unak ni Jehova iti Amin a Desisionko
ITI maysa a naariwanas a bigat idi 1984, sumrekak idin iti trabaho manipud iti komportable a balaymi iti maysa a subdibision dagiti babaknang iti Caracas, Venezuela. Iti dalanko, pampanunotek ti maysa a nabiit pay nga artikulo iti magasin a Pagwanawanan maipapan iti opinion kadatayo dagiti kaarrubatayo. Bayat a kumitkitaak kadagiti malabsak a balay, pinampanunotko: ‘Ania ngata ti panagkita kaniak dagiti kaarrubami? Maysa a naballigi nga executive iti banko? Wenno maysa a ministro ti Dios nga agtrabtrabaho iti banko tapno masuportaranna ti pamiliana?’ Saanak a naragsakan iti posible a sungbat isu a nangaramidak iti desision tapno mabaliwan dayta.
Nayanakak idi Mayo 19, 1940, iti ili ti Amioûn, Lebanon. Sumagmamano a tawen kalpasanna, immakar ti pamiliami iti siudad ti Tripoli. Idiay a dimmakkelak iti maysa a nadungngo ken naragsak a pamilia nga am-ammo ken ay-ayatenna ti Dios a ni Jehova. Siak ti buridek iti lima nga agkakabsat, tallo a babbai ken dua a lallaki. Para kadagiti nagannakko, sumegunda laeng ti panagbirok iti pagbiag. Nakapokus ti pamiliami iti panagadal iti Biblia, pannakigimong, ken panangtulong iti dadduma a mangam-ammo iti Dios.
Adda sumagmamano a napulotan a Kristiano iti kongregasionmi. Ti maysa ket ni Michel Aboud, a mangidadaulo idi iti aw-awagantayo iti panagadal iti libro. Isu ti damo a nangipakaammo idiay Lebanon iti kinapudno idi rugrugi ti 1920’s. Naammuanna dayta idiay New York. Malagipko la unay ti panangrespeto ken panangtulongna iti dua nga agkabannuag a naggraduar iti Gilead School—da Anne ken Gwen Beavor. Nagbalinda a nasinged a gagayyemmi. Adu a dekada kalpasanna, naragsakanak a nakakita ken Anne idiay United States. Di nagbayag kalpasanna, nakitak met ni Gwen, nga asawa idin ni Wilfred Gooch ken agserserbidan iti Bethel iti sanga nga opisina idiay London, England.
PANANGASABA IDIAY LEBANON
Manmano la idi ti Saksi idiay Lebanon idi ubingak. Ngem sigagagar nga impakaammomi iti sabsabali dagiti ammomi iti Biblia. Inaramidmi dayta uray no busbusorendakami ti dadduma a lider ti relihion. Adda dagiti pasamak a diak malipatan.
Maysa nga aldaw, mangaskasabakami idi ken manangko a Sana iti maysa nga apartment building. Immay ti maysa a padi bayat a makisarsaritakami iti maysa a residente. Adda la ketdi nangayab kenkuana. Ininsulto ti padi ni manangko. Nakaunget ket induronna ni manangko iti agdan isu a nasugatan. Adda timmawag iti polisia, ket immayda tapno masigurado a matulongan ni manang. Impanda ti padi iti presinto ti polis, ket natakuatanda nga adda paltogna. Dinamag kenkuana ti hepe ti polisia: “Aniaka a talaga? Lider ti relihion wenno lider ti gang?”
Ti sabali pay a pasamak a diak pulos malipatan ket idi nangarkila ti kongregasionmi iti maysa a bus a paglugananmi a mapan iti naiputputong nga ili tapno mangasabakami sadiay. Nagmayat ti panangasabami agingga a naammuan ti padi idiay ti ar-aramidenmi isu a nangummong kadagiti mangriribuk kadakami. Inatakedakami ken binatobatodakami pay ketdi, isu a nasugatan ni Tatang. Malagipko a daradara idi ti rupana. Nagkaduada ken Nanang a nagsubli iti bus, ket simmarunokami met a madandanagan. Ngem diak pulos malipatan ti imbaga ni Nanang bayat a daldalusanna dagiti sugat ni Tatang: “Jehova, pangngaasim ta pakawanem ida. Dida ammo ti ar-aramidenda.”
Naminsan, pinasiarmi dagiti kabagianmi iti ilimi. Nairana nga adda iti balay ni lolomi ti maysa a nalatak a lider ti relihion—maysa nga obispo. Ammona a Saksi ni Jehova dagiti nagannakko. Uray innem pay laeng ti tawenko idi, kayatnak nga ibabain. Dinamagna, “Hoy, sika, apay a saanka pay a nabuniagan?” Imbagak nga ubingak pay ken masapul nga ad-adu pay ti maammuak maipapan iti Biblia ken bumileg ti pammatik sakbay nga agpabautisarak. Dina nagustuan ti insungbatko, ket imbagana ken Lolo nga awan ti daydayawko.
Ngem manmano laeng ti kasta a saan a nasayaat a kapadasan. Nainggayyeman ken managpadagus ti kaaduan nga umili ti Lebanon, isu nga adu ti nakasabaanmi ken nayadalanmi iti Biblia.
IMMAKARKAMI ITI SABALI A PAGILIAN
Idi ages-eskuelaak pay, adda baro a taga-Venezuela a bimmisita idiay Lebanon. Nakigimong iti kongregasionmi ken nagam-ammoda ken manangko a Wafa. Idi agangay, nagkasarda ken nagyanda iti Venezuela. Kadagiti surat ni manang Wafa, kinombinsirna ni Tatang nga umakar ti intero a pamiliami iti Venezuela gapu ta mailiw unay kadakami. Idi agangay, nakombinsirnakami nga umakar sadiay!
Simmangpetkami iti Venezuela idi 1953 ken nagyankami idiay Caracas, iti asideg ti palasio ti presidente. Gapu ta ubingak pay, maragragsakanak a makakita a lumabas ti presidente a nakalugan iti nangina a kotsena. Ngem saan a kaskarina kadagiti nagannakko ti ag-adjust iti baro a pagilian, lengguahe, kultura, taraon, ken klima. Ngem idi nakapag-adjust-dan, adda nakas-ang a napasamak.
Manipud kannigid: Ni Tatang. Ni Nanang. Siak idi 1953 idi immakar ti pamiliami iti Venezuela
DIMTENG TI TRAHEDIA
Nagsakit ni Tatang. Kasla karkarna dayta ta kanayon met idi a napigsa ken nasalun-at. Dimi malagip a nagsakit. Di nagbayag, nadayagnos nga adda pancreatic cancer-na, isu a naoperaan. Ngem makapaladingit ta natay kalpasan ti makalawas.
Nagrigat nga ilawlawag ti marikriknami. Trese pay la idi ti tawenko. Naklaatkami ken kasla nagtupak ti langit kadakami. Marigatan idi ni Nanang a mangakseptar nga awanen ni Tatang. Nabigbigmi a masapul nga akseptarenmi ti napasamak ket naaramidanmi dayta iti tulong ni Jehova. Idi agtawenak iti 16, naggraduarak iti haiskul idiay Caracas, ket talaga a kayatko a suportaran ti pamiliak.
Ni manang Sana ken ni lakayna a Rubén a dakkel ti impluensiada iti naespirituan a panagrang-ayko
Kabayatanna, nakiasawa ni manang Sana ken Rubén Araujo a naggraduar iti Gilead School ken nagsubli iti Venezuela. Nagdesisionda nga umakar idiay New York. Idi nagdesision ti pamiliami nga agadalak iti unibersidad, napanak idiay New York tapno makidagusak kada manang Sana ken manong Rubén. Dakkel ti naitulongda iti naespirituan nga irarang-ayko. Adu met dagiti nataengan iti naespirituan a kakabsat iti Brooklyn Spanish a kongregasionmi. Maragsakanak ta naam-ammok ti dua kadakuada, da Milton Henschel ken Frederick Franz, nga agpada nga agserserbi iti Brooklyn Bethel.
Ti panagbautisarko idi 1957
Idi dandanin malpas ti umuna a tawenko iti unibersidad idiay New York, pinanunotko no ania ti ar-aramidek iti biagko. Binasak ken pinanunotko a naimbag dagiti artikulo ti magasin a Pagwanawanan maipapan kadagiti Kristiano a nagsayaat dagiti kalatda. Nakitak ti kinaragsak dagiti payunir ken Bethelite a kakongregasionko ket kayatko a kasdiayak met. Ngem saanak pay idi a nabautisaran. Di nagbayag, naamirisko ti kinapateg ti panangidedikarko iti biagko ken Jehova. Ket simmaruno nga inaramidko ti napateg a desision a panagpabautisar idi Marso 30, 1957.
NAPAPATEG A DESISION
Kalpasan a nagbautisarak, pinanunotko ti sabali pay a desision—ti sumrek iti amin-tiempo a ministerio. Kayatko la unay ti agpayunir, ngem kasla narigat. Kasanok a mapaggiddan ti panagpayunir ken panageskuela iti unibersidad? Namin-adu a sinuratak ti pamiliak iti Venezuela tapno ilawlawagko ken Nanang ken kadagiti kakabsatko ti desisionko nga agsardeng nga ageskuela, agsubliak iti Venezuela, sa agpayunirak.
Nagsubliak idiay Caracas idi Hunio 1957. Ngem nakitak a saan a nasayaat ti kasasaad ti pamiliak. Masapul nga adda agtrabaho iti pamiliami para kadagiti kasapulanmi. Kasano a makatulongak? Adda trabaho a nai-offer kaniak iti maysa a banko, ngem talaga a kayatko ti agpayunir. Dayta ti rason a nagsubliak. Determinadoak a paggiddanen dagita. Iti sumagmamano a tawen, nagtrabahoak iti full-time iti maysa a banko ken nagpayunirak. Okupadoak unay ngem nakaragragsakak!
Nanayonan met ti ragsakko idi naam-ammok ken nagkasarkami ken Sylvia, maysa a napintas a kabsat a taga-Germany a mangay-ayat unay ken Jehova. Immakar iti Venezuela a kaduana dagiti nagannakna. Idi agangay, naaddaankami iti dua nga annak, ti baromi a ni Michel (Mike), ken ti balasangmi a ni Samira. Siak metten ti nangaywan ken nanangko ket nakipagyan kadakami. Nupay masapul nga agsardengak kas payunir tapno maasikasok ti pamiliak, nagtalinaed latta kaniak ti espiritu ti kinapayunir. Kada bakasion, ag-auxiliary pioneer-kami ken Sylvia agingga a kabaelanmi.
SABALI PAY A NAPATEG A DESISION
Ages-eskuela pay laeng dagiti annakmi idi nariknak ti dinakamatko iti rugi daytoy nga artikulo. Aminek a nakanamnam-ay ti biagko ken raraemendak dagiti katrabahuak iti banko. Ngem kayatko a kangrunaan a maam-ammodak kas adipen ni Jehova. Sangkapanunotko dayta iti daydi nga aldaw. Isu a nagsaritaanmi nga agassawa ti pinansial a kasasaadmi. No isardengko ti trabahok iti banko, makaawatak iti lump sum. Gapu ta awan ti utangmi, nakitami a makaanay ti kuartami a mangsuporta kadakami iti napaut a tiempo no pasimplienmi ti biagmi.
Saan a nalaka dayta a desision, ngem naan-anay a sinuportarannak ti dungdungnguek nga asawa ken ni nanangko. Makapagpayunirak manen isu a maragragsakanak! Nakasaganaak idin nga agpayunir ngem pagammuan ta adda damag a nangsorpresa kadakami.
NARAGSAK A SORPRESA!
Ti maikatlo nga anakmi a ni Gabriel ket naragsak a sorpresa
Maysa nga aldaw, kinompirma ti doktor a masikog ni Sylvia. Nasorpresakami a dua! Nakaragragsakkami; ngem pinampanunotko ti desisionko nga agpayunir manen. Kabaelak pay ngata? Di nagbayag, nakapag-adjust-kami met laeng ken sinegseggaanmi ti pannakayanak ti buridek nga anakmi. Ngem kasano ngayen ti planok nga agpayunir?
Kalpasan a nagsaritaanmi dagiti kalatmi, nagdesisionkami nga ituloymi ti orihinal a planomi. Naipasngay ti anakmi a ni Gabriel idi Abril 1985. Nag-resign-ak iti banko ken nag-regular pioneer-ak manen idi Hunio 1985. Idi agangay, naaddaanak iti pribilehio nga agbalin a miembro ti Branch Committee. Ngem saan nga iti Caracas ti ayan ti sanga nga opisina, isu nga ag-commute-ak iti agarup 80 a kilometro (50 mi) iti dua wenno tallo nga aldaw kada lawas.
IYAAKAR MANEN
Adda ti sanga nga opisina iti ili ti La Victoria, isu a nagdesision ti pamiliami nga umakar sadiay tapno as-asidegkami iti Bethel. Dakkel a panagbalbaliw dayta para kadakami. Agyamanak unay iti pamiliak ta nagdakkel ti naitulongda. Situtulok ni manang Baha a mangaywan ken nanangmi. Addan asawa ni Mike, ngem adda pay laeng iti podermi da Samira ken Gabriel. Isu a ti iyaakar idiay La Victoria kaipapananna a panawanmin dagiti gagayyemda iti Caracas. Masapul met nga ag-adjust ti dungdungnguek a ni Sylvia iti bassit nga ili manipud iti nakairuamanna a dakkel a siudad. Masapul nga iruammi amin ti agyan iti basbassit a balay. Wen, talaga a dakkel a panagbalbaliw ti iyaakarmi idiay La Victoria manipud Caracas.
Ngem nagbaliw manen ti situasion. Nangasawa ni Gabriel ken simmina ni Samira. Kalpasanna, naawiskami ken Sylvia nga agbalin a Bethelite idi 2007, maysa a pribilehio a tagtagiragsakenmi agingga ita. Ti inauna nga anakmi a ni Mike ket agserserbi kas panglakayen ken payunirda a dua ken Monica nga asawana. Panglakayen met ni Gabriel, ken agserserbi idiay Italy a kaduana ti asawana a ni Ambra. Payunir met ni Samira ken agserserbi kas remote volunteer iti Bethel.
Manipud kannigid: Siak ken ni baketko a Sylvia iti sanga nga opisina iti Venezuela. Ti inauna nga anakmi a ni Mike ken ti asawana a ni Monica. Ti balasangmi a ni Samira. Ti anakmi a ni Gabriel ken ti asawana a ni Ambra
DIAK BALBALIWAN DAGITI NAGBALIN A DESISIONKO
Wen, adu ti napapateg a desision nga inaramidko iti biagko ngem awan ti pagbabawyak. Diak pulos balbaliwan dagita a desisionko. Apresiarek unay ti adu a pribilehio a naawatko iti panagserbik ken Jehova. Iti panaglabas dagiti tawen, nakitak no kasano kapateg a pagtalinaeden ti nasinged a pannakigayyemko ken Jehova. Dadakkel man wenno babassit dagiti desisiontayo, ipaayannatayo ni Jehova iti ‘talna a mangartap iti amin a pannakaawat.’ (Fil. 4:6, 7) Maragragsakankami ken Sylvia iti sagrado a panagserbimi iti Bethel ket mariknami a nabendisionan dagiti desision nga inaramidmi iti biagmi, ta kanayon nga inyun-unami ni Jehova.