Panagdroga​—Adda Solusionna!

“NAKAAD-ADU a Naipuslit a Cocaine ti Nasarakan Kadagiti Bote ti Arak.” Inlawlawag ti artikulo ti periodiko a kastat’ paulona, no kasano a kinompiskar dagiti polis ti Johannesburg, South Africa, ti maipatulod a nagkargaan iti 11,600 a bote ti arak iti Abagatan nga America. Nailaok iti arak ti 150 agingga iti 180 a kilo a cocaine. Mapapati a daytoy ti kadakkelan a nakompiskar a cocaine a naipuslit iti pagilian agingga iti daytoy a tiempo.

Nupay kasla ipamatmat dayta a nakompiskar a naballigi ti pannakidangadang iti panagdroga, iti kinaagpaysuanna, makompiskar laeng dagiti polis ti agarup 10 agingga iti 15 a porsiento kadagiti maiparit a droga iti intero a lubong. Nakalkaldaang ta kaasping laeng daytoy ti panangtadaw ti maysa a hardinero iti nagbiit nga agtubo a ruot ngem saan a nairamutan.

Ti dakkel a ganansia manipud iti droga lapdanna ti panangikagumaan ti gobierno a manglapped iti panangpataud ken panaglako kadagitoy. Napattapatta nga adu a milion a doliar ti gatad ti mainegosio a droga iti kada tawen, idiay Estados Unidos laeng. Gapu iti kasta a kadakkel ti kuarta, di ngarud pakasdaawan a nalaka laeng nga agkunniber dagiti polis ken opisial ti gobierno, uray pay dagiti nangato ti saadda.

Impadamag ni Alex Bellos iti linawas a periodiko a The Guardian Weekly iti Brazil a sigun iti panagimbestigar ti parlamento, “tallo a kongresista, 12 a diputado ken tallo a mayor ti naisurat . . . iti listaan ti nasurok a 800 a tattao a nairaman kano iti organisado a krimen ken panagnegosio iti droga idiay Brazil.” Karaman met iti listaan “dagiti polis, abogado, negosiante, mannalon, ken agtartaraken iti animal iti 17 kadagiti 27 a probinsia.” Maipapan kadagitoy a naduktalan, kinuna ti maysa a propesor iti politika iti Brasília University: “Dagitoy a natakuatan akusarenda ti amin a paset ti kagimongan ti Brazil.” Nalabit, kasta met laeng ti maibaga iti adu a kagimongan a sadiay nasaknap a maus-usar ti droga. Ti parikut ket saan a nainget dagiti alagaden maipapan iti kaadda ti magatang ken gumatang (supply and demand) iti droga.

Gapu ta saan unay a naballigi ti panangiparit ti linteg, itandudo ti dadduma a pagbalinen a legal ti panaglako ken panagusar iti sumagmamano a droga. Pampanunoten ti kaaduan a mapalubosan koma dagiti tattao a maaddaan iti bassit tapno usarenda a personal. Patienda a daytoy ket nalaklaka a kontrolen ti gobierno ket maksayan ti nagdakkel a ganansia dagiti apo-apo iti sindikato ti droga.

Nagballigi ti Dadduma

Nalabit maisardeng dagiti adikto ti panagdrogada no maikkat nga umuna ti epekto ti droga ket kalpasanna mapasayaat ti salun-atda. Ngem nakalkaldaang ta no agsubli ti adikto iti gagangay a lugarna, masulisog manen nga agdroga. Kastoy ti inlawlawag ti mannurat a ni Luigi Zoja maipapan iti daytoy: “Imposible a basta maikkat ti kababalin no saan a naan-anay a mabalbaliwan ti panagpampanunot ti pasiente.”

Ti nadakamat itay iti umuna nga artikulo a ni Darren, nabalbaliwan ti ‘panagpampanunotna’ isu a nagbalbaliw ti panagbiagna. Inlawlawagna: “Maysaak idi nga ateista, ngem idi agangay, nupay agdrogaak manipud agsapa agingga iti rabii, nabigbigko nga adda la ketdi Dios. Bayat ti dua wenno tallo a bulan, pinadasko nga isardeng ti agdroga, ngem di impalubos ti gagayyemko. Nupay nagdrogaak pay laeng, sakbay a maturogak, rinugiak ti regular nga agbasa iti Biblia. Manmanon a makikaduaak kadagiti gagayyemko. Maysa a rabii, nakadrogakami iti kakuartok. Dinakamatko ti Biblia kenkuana. Kabigatanna, tineleponuanna ni manongna a maysa kadagiti Saksi ni Jehova. Inturongnakami iti maysa a Saksi nga agnanaed iti siudad nga ayanmi, ket nakipagkitaak kenkuana.

“Nagsaritakami agingga iti alas 11:00 ti rabii, ket pinabalonannak iti adu a katulongan iti panagadal iti Biblia. Rinugiak ti nakipagadal iti Biblia kenkuana ket insardengkon ti agdroga ken agsigarilio. Kalpasan ti agarup siam a bulan, nabautisaranak kas maysa kadagiti Saksi ni Jehova.”

Saan a nalaka nga isardeng ti panagdroga. Impudno ni Michael, a nadakamat iti immuna nga artikulo, dagiti rigat a napasaranna idi insardengna ti agdroga kalpasan ti 11 a tawen a panagdrogana: “Awan ti ganasko a mangan isu a kimmuttongak. Nariknak met a kaslaak matudtudok iti dagum, agkaling-etanak, ken kasla adda lawag a nanglawlaw kadagiti tattao. Kasta unay ti gartemko nga agdroga manen, ngem babaen ti panagkararag ken Jehova ken panagadal iti Biblia, natulonganak nga agtalinaed a nadalus.” Umanamong dagitoy a dati a durogista a nasken nga idianda a naan-anay dagiti dati a kakaduada.

No Apay a Di Naballigi ti Panangikagumaan ti Tao

Ti panagdroga ket maysa laeng a paset ti dakdakkel a sangalubongan a parikut. Maap-apektaran ti intero a lubong iti nakaro a kinadakes, kinaranggas ken kinauyong. Kastoy ti kuna ti Biblia: “Ti intero a lubong adda iti pannakabalin daydiay nadangkes.” (1 Juan 5:19) Dinakamat ni apostol Juan dayta a “nadangkes” idiay Apocalipsis 12:9: “Gapuna naitapuak ti dakkel a dragon, ti kadaanan a serpiente, daydiay naawagan iti Diablo ken Satanas, a mangyaw-awan iti intero a mapagnaedan a daga; isu naitapuak iti daga, ket dagiti anghelna naitapuakda a naikanunong kenkuana.”

Malaksid iti pagkapuyanna, masapul a sarangten pay ti tao daytoy nabileg a kabusor. Ni Satanas ti makagapu a nagbasol ti tao idi punganay. Isut’ determinado a mangdadael iti sangatauan tapno umadayoda iti Dios. Ti panagdroga ti sangatauan ket nabatad a paset ti taktikana. Makapungtot unay agsipud ta “ammona nga ababan ti periodo ti tiempona.”​—Apocalipsis 12:12.

Ania ti Solusion ti Dios?

Ipalgak ti Biblia ti naayat a probision ti Namarsua a mangsubbot iti sangatauan manipud iti managbasol a kasasaadda. Idiay 1 Corinto 15:22, naibaga kadatayo: “No kasano a ken Adan matmatay ti amin, kasta met nga iti Kristo mapagbiagto ti amin.” Situtulok nga immay ni Jesus ditoy daga kas perpekto a tao ket indatonna ti naindagaan a biagna tapno masubbot ti sangatauan manipud kadagiti epekto ti basol ken ipapatay.

Ti pannakaammo iti gapu ti ipapatay agraman ti solusion dagiti parikut ti sangatauan ti nangtignay ken nangpabileg iti adu a mangisardeng iti pannakaadiktoda iti droga. Ngem saannatay laeng a tulongan ti Biblia a mangtaming a saggaysa iti parikut a nainaig iti droga iti kaaldawantayo. Saritaenna ti tiempo, kalpasan a manungpalen ti impluensia ni Satanas, nga agpatingganton a naan-anay ti amin a parikut iti lubong agraman ti panagdroga.

Deskribiren ti libro nga Apocalipsis ti “maysa a karayan ti danum ti biag, nalitnaw a kas kristal, nga agay-ayus manipud iti trono ti Dios ken iti Kordero.” (Apocalipsis 22:1) Daytoy a simboliko a karayan iladawanna dagiti probision nga impaay ti Dios babaen ken Jesu-Kristo a mangisubli iti sangatauan iti perpekto a biag iti paraiso a daga. Deskribiren ti Apocalipsis dagiti narangpaya a kayo ti biag iti igid ti karayan ket kunana: “Ti bulbulong dagiti kayo agpaayda iti pannakaagas dagiti nasion.” (Apocalipsis 22:2) Dagidiay a simboliko a bulong iladawanda dagiti makaagas a probision a mangisubli iti sangatauan iti naespirituan ken pisikal a kinaperpekto.

Kamaudiananna, mawayawayaanto ti sangatauan, saan laeng nga iti panagdroga no di ket iti amin a dadduma pay a sakit ken problema a mangsapsaplit kenkuana iti daytoy dakes a sistema!

[Kahon/Ladawan iti panid 9]

Kasano Katalged ti Marihuana?

Adu a pagilian ti agpalplano a pagbalinenda a legal ti marihuana, a nangnangruna a mausar kas agas. Natakuatan a makabang-ar dayta iti panagrurusok gapu iti chemotherapy, ket nabatad a tulonganna dagiti agsagsagaba iti AIDS a mangparmek iti kinaawan ganasda a mangan. Maus-usar met daytan a pangep-ep iti ut-ot.

Nupay agsusupadi dagiti resulta ti panagsukisok, patalgedan dagiti eksperimento nga impadamag ti magasin a New Scientist ti sumagmamano kadagiti makadangran nga epekto ti marihuana.

Pinagdilig ti maysa a pannubok iti Harvard University ti maysa a grupo nga inaldaw a nagsigarilio iti marihuana ken ti maysa a grupo a manmano a nagsigarilio. Natakuatanda nga awan ti nagdumaan ti gagangay a pannubok iti kinalaingda. Nupay kasta, iti maysa a pannubok maipapan iti abilidad a makibagay iti baro a kasasaad, adayo a nababbaba ti marka dagidiay kanayon nga agsigsigarilio iti marihuana.

Iti las-ud ti 15 a tawen, sinubok ti sabali pay nga unibersidad ti maysa a grupo dagiti mannigarilio iti marihuana ken ti maysa a grupo dagiti mannigarilio iti saan a marihuana. Kaaduanna, tallo wenno uppat a sigarilio a marihuana ti maibus kada aldaw dagiti agmarmarihuana, idinto ta 20 a sigarilio wenno ad-adu pay ti maibus dagiti saan nga agmarmarihuana. Agpada ti bilang dagiti naguyek ken nagbrongkitis iti dua a grupo. Impakita dagiti eksamenasion iti bara nga agpada ti pannakadadael dagiti selula ti dua a grupo.

Nupay manmano nga agusar dagiti mannigarilio iti marihuana, natakuatan a ti maysa laeng a sigarilio a marihuana mangiruar iti mamitlo a tar ngem ti iruar ti sigarilio. Kastoy ti impadamag pay ti New Scientist: “Naun-uneg ti panagsul-oy dagiti mannigarilio iti marihuana isu a mabaybayag ti panangmedmedda iti panagangesda.”

Kanayonanna, natakuatan a dagiti selula ti resistensia iti bara dagiti mannigarilio iti marihuana ket nakapkapuy a manglaban iti bakteria iti 35 a porsiento ngem kadagiti selula dagiti mannigarilio iti saan a marihuana.

[Credit Line]

Rinetrato ti U.S. Navy

[Kahon iti panid 11]

“Nasaem a Pammabasol” Kadagiti Nagannak

Dinakamat ti maysa nga editorial iti periodiko ti South Africa a Saturday Star ti maipapan iti makapadanag nga iyaadu dagiti agdrogdroga nga agtutubo idiay South Africa sa nagkomento:

“Ti [panagdroga] dagiti annaktayo ket masansan a nasaem a pammabasol kadatayo a nagannak ken iti kaaduan iti kagimongan. Kanayon nga ikagumaantayo ti agsapul iti kuarta, nga ipampamaysatayo ti tiempo ken pigsatayo tapno rumang-ay ti material a kasasaadtayo. Bannogen dagiti annaktayo ti panunot ken bagitayo. Mangbusbostay kadi iti de kalidad a tiempo a kaduada? Nalaka laeng ti mangted iti kuarta kadakuada tapno didatay buriboren. Nalaklaka ti mangted ti kuarta ngem iti agimdeng kadakuada​—kadagiti pagam-amkan, namnama, pakadukotanda. Inton rabii, bayat nga agtugtugawtayo iti lamisaan iti restawran wenno agin-inana iti sanguanan ti TV, ammotay kadi ti ar-aramidenda?”

Wenno, ammotay kadi ti pampanunotenda?

[Ladawan iti panid 10]

Adu ti natignay a mangisardeng iti panagdrogada