Manipud Kadagiti Agbasbasa
Pannaturog Ti serye nga “Umdas Aya ti Pannaturogmo?” (Marso 22, 2003) ket naintiempuan unay kaniak. Alimbasagenak idi gapu iti kellaat a panagsakit ti balasangko. Kalpasan ti lima wenno innem nga aldaw, napanak iti asideg nga ospital, ket babaen iti agas, makaturogak itan. Nupay kasta, insingasing dagiti artikuloyo a no aldaw, rumbeng nga agehersisioak, saan a sakbay a maturogak. Ikagumaak nga iyaplikar a dagus ti pammagbagayo.
T. M., Japan
Nabiit pay a napaksuyanak. Ineksamennak ti doktor ti pamiliami ket imbagana a kurang la ngamin ti turogko no rabii ken adda met epekto ti agas a tomtomarek para iti kissiwko. Nagduaduaak ti panangdayagnosna. Ngem makalawas kalpasanna, naawatko dagiti artikuloyo maipapan iti pannaturog. Inungpotko a binasa ket kalpasan ti panangsungbatko iti pannubok iti panid 9, naamirisko a husto ti doktorko. Ikagkagumaak itan nga iyaplikar dagiti singasing ti artikulo. Pagyamanan iti naintiempuan nga impormasion.
M. B., Estados Unidos
Dagiti Niog Kayatko nga iyebkas ti panagyamanko gapu iti artikulo a “Maysa Kadagiti Kaaduan ti Pakausaranna a Nuez Ditoy Daga.” (Marso 22, 2003) Nabiit pay a nagpasiarak idiay Mexico, ket nakitak a mismo a pudno gayam a nagadu ti pakausaran ti niog! Nakitak ti dandani amin a pakausaranna a nailista iti artikulo. Ti maysa pay a pakausaranna isut’ panangala kadagiti nabilag ken nalap-it nga iit iti bulbulongna sa mareppet ti 10 agingga iti 15 kadagitoy. Nagsayaat dayta a pagbugaw iti ngilaw!
D. S., Estados Unidos
Gapu iti daytoy nga artikulo, nalagipko ni lolak nga agar-aramid idi kadagiti tasa manipud iti sabut ti niog idi dekada 1930. Adu kadagiti kaarrubana ti nagaramid iti kalapawda babaen ti kayo ti niog, ket inatepanda dagita iti nagango a bulong ti niog. Kayatyo ti agyaman kadakayo gapu kadagita a makaisuro nga artikulo.
M. B., Estados Unidos
Panagpasuso Nariroak iti ababa a padamag a “Dagiti Pagimbagan ti Panagpasuso” iti “Panangmatmat iti Lubong.” (Marso 22, 2003) Talaga nga umanamongak a mabalin a nakapuy ti sistema ti imiunidad dagidiay saan a napasuso. Saanak a napasuso isu a masansan nga agtrangkasoak. Ngem ti panangdakamat iti panagadal a mangipamatmat a nasarsaririt dagidiay napasuso ngem kadagiti saan a napasuso ket mangipakita iti di pannakaseknan iti rikna dagiti kas kadakami.
C. B., Italia
Sungbat ti “Agriingkayo!”: Saanmi a panggep a sairen ti asinoman. Impadamagmi laeng dagiti naammuan ti maysa a panagadal dagiti Danes maipapan iti panagpasuso. Ti panangipablaak iti kasta nga impormasion ket makatulong kadagiti nagannak ita a mangaramid kadagiti desision a naibasar iti pannakaammo maipapan iti panangpadakkelda iti anakda.
Proverbio Dagiti Africano Kanayon a masdaawak iti nadumaduma nga artikulo iti Agriingkayo! Agarup 40 a tawenen nga agbasbasaak iti dayta ket talaga a nagustuak ti artikulo a “Proverbio Dagiti Akan—Pagsarmingan Kadagiti Pagalagadan ti Kagimongan.” (Marso 22, 2003) Tinulongannak a mangapresiar no kasano kapateg ti nasayaat a kababalin iti pannakilangentayo iti padatayo a tattao. Insuratko ti sumagmamano a proverbio tapno adda pasaray pagreperensiaak.
D. Z., Estados Unidos
Ita pay laeng a nakabasaak iti kasta a makaay-ayo, makalinglingay, ken makaisuro nga artikulo maipapan kadagiti proverbio. Makaparagsak ti agbasa kadagiti kostumbre ti sabali a kultura. Kalpasan ti tunggal proverbio, nagsardengak ket pinadasko nga anagen. Namin-adu a naiduma ti pagarupko iti agpayso a kaipapananna!
J. K., Alemania