Manipud Kadagiti Agbasbasa

Ubbing​—Nasapa Unay nga Agmataengan? Nagsayaat ti pannakaisurat ti serye a “Dagiti Ubbing​—Nasapa Unay Kadi ti Panagmataenganda?” (Abril 22, 2003) Dayta ti nakatulong tapno maawatak no apay nga adda sumagmamano a problemak. Nalidayak idi ubingak, isu nga umanamongak a nainsiriban ti saan a panangdagdag iti panagmataengan dagiti ubbing.

S. M., Japan

Ti serye talaga a tinukayna ti pusok. Napadakkelak iti agsolsolo ti nagannakna a pagtaengan. Masansan idi a diak makaturog iti rabii agsipud ta mangmangngegko ti panagsangit ni nanangko gapu kadagiti problemana. No saan a gapu iti kongregasion Kristiano, diak ammon no ania ti nagmamaayak. Pagyamanan kadagiti naayat a panagreggetyo a mangtaraon kadakami iti naespirituan.

D. B., Estados Unidos

Sangapulo ket maysa ti tawenko, ket kayatko a dumakkelak koman a dagus. Impakita daytoy a serye, a rumbeng nga ipategko ti kinaubingko bayat nga ubingak pay.

G. M., Estados Unidos

Umasping ti pakasaritaak iti nailanad iti artikulo a pakasaritaan ni Carmen ken ti adingna. Nupay saanak a pimmanaw idiay balaymi, a kas iti inaramidda, naaddaanak kadagiti abusado nga agsiuman ken naliway nga ina. Gapu ta agdrogdrogada, kapilitan a siak ti nangpadakkel kadagiti adiek a lallaki, sipud idi sangapulo pay laeng ti tawenko! Siempre, nagproblemaak. Agnanayon nga agyamanak ken Jehova gapu iti tulong a maaw-awatko iti adun a tawen.

D. S., Estados Unidos

Hedgehog Siak ti kangrunaan a mangtartarawidwid iti British Hedgehog Preservation Society, isu a naragsakanak a nangbasa iti nagpintas nga artikulo a “Makatudok a Hedgehog iti Away.” (Abril 22, 2003) Nagpintas ken umiso ti pannakaisuratna​—saan a kas iti adu nga artikulo iti dadduma a publikasion.

F. V., Britania

Pagyamanan unay iti magasin nga Agriingkayo! Sangkaibaga ni nanangko a basaek dagiti magasin. No dadduma, apaman a rinugiakon, agbasaak nga agingga iti maysa nga oras wenno nasurok pay. Adu ti magustuak nga artikuloda kas iti “Makatudok a Hedgehog iti Away.” Sangapulo ket lima ti tawenko. Itultuloyyo ti nagsayaat a trabahoyo!

K. G., Estados Unidos

Panangampon Pagyamanan iti naintiempuan nga artikulo nga “Agimtuod Dagiti Agtutubo . . . Apay a Nagbalinak nga Ampon?” (Abril 22, 2003) Gapu iti kasasaad ti balasangko, kapilitan nga impaamponna ti anakna, ket makonsiensiaak unay gapu itoy. Dimteng daytoy nga impormasion iti umiso a tiempo. Impatulodko ti artikulo iti balasangko.

E. D., Guyana

Nakapagsuratak tapno agyamanak kadagiti naintiempuan nga artikulo maipapan iti panangampon iti Abril 22 ken Mayo 22 a ruar. Nabiit pay a nangamponkami ken ni lakayko iti maladaga a lalaki. Usarenminto dagitoy dua nga artikulo a tumulong kenkuana tapno maammuan ken maawatanna a kasta unay ti panagayat kenkuana ni Jehova a Dios, ken dakami a dadakkelna.

S. R., Estados Unidos

Pagyamanan unay iti artikulo maipapan iti panangampon. Uppat a pulo ket piton ti tawenko ngem kaskasdi a marigatanak a mangakseptar a maysaak nga ampon. Dagiti nangampon kaniak​—a raraemek ken ay-ayatek unay​—dida naipaay ti ayat ken dungngo a kalkalikagumak. Didak pulos inarakup wenno inungnguan uray no kiddawek idi dayta isu a narigatanak. Nupay kasta, makaliwliwa ken makapabang-ar unay daytoy nga artikulo.

D. H., Estados Unidos