Manipud Managbasatayo

Panangampon Pagyamanan kadagiti serye a “Panangampon​—Dagiti Rag-o, Dagiti Karit.” (Mayo 8, 1996) Maysaak a naampon, ket diak pulos nga ammo no kasano a pakisaritaan daytoy a tema kadagiti nangampon kaniak. Makaparagsak ngarud a maawat daytoy a ruar ti Agriingkayo! Dagitoy pay laeng ti artikulo a nakapikapik unay iti pusok.

F. R. M., Brazil

Naamponak, ket nabiit pay nga inkeddengko no aniat’ maaramidak maipapan kadagiti agpayso a nagannak kaniak. Nupay nabaelak nga ammuen dagiti kangrunaan nga impormasion maipapan kadagiti nagannak kaniak, naammuak met a tinarakennak ni inangko iti tallo a bulan sakbay nga impaamponnak. Daytat’ nakasairan unay ti riknak! Dinamagko ti bagik, ‘Apay a naaramidna dayta?’ Bueno, ti kahon a “Birokennakto Ngata ti Anakko?” ti nangilawlawag kaniak iti rikna ti maysa nga ina. Anian ti intulong kaniak dayta a bassit nga artikulo tapno makadaer!

C. S., Estados Unidos

Makaparagsak a makapasair dagiti artikulo para kaniak. Impaamponko ti barok 23 a tawenen ti napalabas. Inaramidko dayta agsipud ta ammok a diak idi kabaelan a biagen. Inaldaw a pampanunotek, ‘Komusta ngatan isuna? Ania ngatan ti biagna? Makitakto ngata manen?’ No dadduma, manglapunos daytoy a panangsidir ti konsiensia. Ngem talaga nga agyamanak ken Jehova iti ayat ken asina.

S. F., Estados Unidos

Nupay adda bukodmi nga anak a lalaki, pampanunotenmi ken ni lakayko a mangamponkami iti balasitang. Ti artikulo ti timmulong kadakami a manganag kadagiti pagimbagan ken pagdaksan ken tumulongto kadakami nga agdesision.

J. G., Estados Unidos

Iti panagkunak ket namalakadkayo a maibusor iti rigat ti panangampon. Ngem anianto ti pagbalinan dagita nga ubbing no mailaksidda? Ita, adda sumagmamano a parikutmi iti amponmi. Ngem ania a kita ti parikut ti ipaay dagita nga ubbing iti kagimongan no saanda a pulos nga umawat iti ayat ken kinatalged ti maysa a pamilia?

D. M., Alemania

Isakitmi dagiti ubbing a napaidaman iti panangaywan dagiti nadungngo a nagannak. Naisurat dagiti artikulo, saan a tapno mangupay iti panangampon kadagiti “naalikuteg” nga ubbing, no di ket tapno paregtaen dagiti agassawa a ‘mangpatta-patta iti magastos’ iti panangaramid iti dayta, iti realistiko a pamay-an. (Idiligyo iti Lucas 14:28.) Rumbeng nga amirisen dagiti nagannak nga agpangpanggep a mangampon no agpayso nga addaanda iti emosional, espiritual, wenno pinansial a kasapulan a mangipaay iti kasapulan dagita nga ubbing. Rumbeng a tingitingenda met dagiti posible nga epekto ti panangampon kadagiti dadduma nga ubbing nga adda iti pagtaengan.​—ED.

Adda lima nga amponmi, a nainayon iti tallo nga impasngaymi nga annak. Napasaranmi ti kasta unay a rag-o nga insuratyo ken ti sanaangna. Amin dagiti annakmi ti managdaydayaw ken Jehova malaksid iti anakmi a lalaki. Kalpasan nga inamponmi idi agtawen iti 16, minolestiana ti tallo a babbalasangmi. Saan nga impakaammo ti ahensia ti panangampon maipapan iti kinataona. Gapuna, rumbeng nga ammuen ti maysa ti adu nga impormasion maipapan iti kinatao ti maysa no mabalbalin sakbay nga agplano a mangampon​—nangnangruna no pangpanggepen ti maysa nga amponen ti dakkelen nga ubing. Nagsayaat ti pannakaisurat ken nalawag ti panangipresentar dagiti artikuloyo iti agsumbangir a dasig ti isyu.

P. B., Estados Unidos

Maladingitanak unay a mangammo a dadduma a nangampon ti naaddaan iti kasta a negatibo a kapadasan. Nangamponkami ken ni lakayko iti dua a nagpipintas nga ubbing, ket bin-ig a rag-o ti inyegda iti biagmi. Kanayon a prangkakami kadakuada maipapan iti pannakaamponda. Tinulonganmi ida a mangtarus a saan ida nga ‘impadawat’ dagiti inna a nangipasngay kadakuada no di ket inyurnosda ti pannakaaywanda agsipud ta dida kabaelan idi a tiempo ti mangbiag iti anak. Masansan nga ibaga kadakami dagiti tattao nga anian a yaman dagiti annakmi ta inamponmi ida. Nupay kasta, ti kinapudno ket dakami dagiti nainggasatan.

B. M., Estados Unidos