Ti Panangmatmat ti Biblia

Maysa Kadi a Persona ti Nasantuan nga Espiritu?

ANIA ti nasantuan nga espiritu ti Dios? Iti panglukat a sasao ti Biblia, dakdakamatenna ti nasantuan nga espiritu—a naipaulog met kas ti “aktibo a puersa ti Dios”—nga “agtigtignay idi nga agsublisubli iti rabaw ti dandanum.” (Genesis 1:2) Iti salaysay maipapan iti pannakabautisar ni Jesus, nupay nadeskribir ti Dios nga adda iti “langlangit,” nagparang ken Jesus ti nasantuan nga espiritu a “bumabbaba a kasla kalapati.” (Mateo 3:16, 17) Ni Jesus dinakamatna met ti nasantuan nga espiritu kas maysa a “katulongan.”—Juan 14:16.

Gapu kadagitoy ken kadagiti dadduma pay a teksto iti Biblia, adda dagiti mangipagarup a maysa a persona ti nasantuan nga espiritu, no kasano a ti Dios, ni Jesus, ken dagiti anghel ket espiritu a persona. Kinapudnona, adun a siglo nga isursuro ti dadduma kadagiti kadakkelan ti impluensiada a relihion iti Kakristianuan a maysa a persona ti nasantuan nga espiritu. Iti laksid daytoy nabayagen a doktrina, mariro latta ti adu a miembro ti simbaan, ken ti dadduma ket saan pay ketdi nga umanamong kadagiti lider ti relihionda. Kas pagarigan, sigun iti nabiit pay a surbey, mamati ti 61 a porsiento kadagidiay napagsaludsodan a ti espiritu ti Dios ket “maysa a pagilasinan ti kaadda wenno pannakabalin ti Dios ngem saan a maysa a sibibiag a persona.” Ngem ania ti ibagbaga ti Biblia?

Ti Ibagbaga ti Biblia

Kapilitan a patien ti maysa a napasnek nga agbasbasa iti Biblia a naiduma ti nasantuan nga espiritu manipud kadagiti opisial a panangdeskribir ti simbaan maipapan iti dayta kas maysa a persona. Usigem dagiti sumaganad a salaysay ti Biblia.

1. Idi a ni Maria, ti ina ni Jesus, sinarungkaranna ti kasinsinna a ni Elisabet, kuna ti Biblia a limmagto ti sikog ni Elisabet, “ket ni Elisabet napno iti nasantuan nga espiritu.” (Lucas 1:41) Nainkalintegan kadi a panunotentayo a ti maysa a persona ket ‘mapno’ iti sabali a persona?

2. Idi nasarita ni Juan a Mammautisar kadagiti adalanna ti maipapan ken Jesus kas daydiay sumuno kenkuana, kinuna ni Juan: “Siak, iti biangko, bautisarankayo iti danum . . . , ngem daydiay um-umay a sumaruno kaniak nabilbileg ngem siak, a kadagiti pallokana saanak a maikari a mangikkat. Bautisarannakayto dayta iti nasantuan nga espiritu.” (Mateo 3:11) Sigurado a saan a tuktukoyen ni Juan ti nasantuan nga espiritu kas maysa a persona idi nasaona ti panangbautisar kadagiti tattao babaen iti dayta.

3. Bayat a sarsarungkaran ni Pedro ti maysa nga opisial ti buyot ti Roma ken ti pamiliana, nasaona ti maipapan ken Jesus kas pinulotan ti Dios “iti nasantuan nga espiritu ken pannakabalin.” (Aramid 10:38) Di nagbayag kalpasanna, “bimmaba ti nasantuan nga espiritu” iti sangakabbalayan ti opisial ti buyot. Sigun iti salaysay, adu ti nasdaaw “agsipud ta ti awan bayadna a sagut ti nasantuan nga espiritu maiparparukpok met kadagiti tattao iti nasnasion.” (Aramid 10:44, 45) Dagiti termino a nausar ditoy ket saan manen a maitunos iti kapanunotan a maysa a persona ti nasantuan nga espiritu.

Gagangay a ti Sao ti Dios iladawanna a persona ti bambanag a saan a persona. Karaman kadagitoy ti sirib, pannakaawat, basol, ipapatay, ken ti di kaikarian a kinamanangngaasi. (Proverbio 8:1–9:6; Roma 5:14, 17, 21; 6:12) Kinuna a mismo ni Jesus a “ti kinasirib mapaneknekan a nalinteg babaen iti amin nga annakna,” wenno dagiti naimbag a resultana. (Lucas 7:35) Nalawag a ti sirib ket saan a maysa a persona nga addaan iti literal nga annak! Umasping iti dayta, saan a maysa a persona ti nasantuan nga espiritu gapu laeng ta iti sumagmamano a kasasaad, nailadawan dayta kas maysa a persona.

Ania ti Nasantuan nga Espiritu?

Iti Biblia, nadeskribir ti nasantuan nga espiritu ti Dios kas agtigtignay a pannakabalin ti Dios. Gapuna, ti umiso a patarus ti Hebreo a teksto iti Biblia tukoyenna ti espiritu ti Dios kas “aktibo a puersa ti Dios.” (Genesis 1:2) Ti intero a Biblia nalawag a patalgedanna daytoy a kapanunotan.—Mikias 3:8; Lucas 1:35; Aramid 10:38.

Maisupadi iti pammati ti kaaduan, ti Dios ket saan a kanayon nga agnanaed iti sadinoman a lugar. Imbes ketdi, agnanaed iti disso dagiti espiritu, iti ‘naipasdek a disso a pagnanaedan,’ wenno pagtaengan. (1 Ar-ari 8:39; 2 Cronicas 6:39) Nailanad met iti Biblia ti maysa nga espesipiko a lugar a pagnanaedan ti Dios ken ayan ti “tronona.” (1 Ar-ari 22:19; Isaias 6:1; Daniel 7:9; Apocalipsis 4:1-3) Nupay kasta, manipud iti ‘naipasdek a disso a pagnanaedanna,’ mabalinna nga usaren ti aktibo a puersana a mangdanon iti tunggal paset ti naespirituan ken pisikal a masakupanna.—Salmo 139:7.

Idi 1879, siuumiso nga inyilustrar ti eskolar ti Biblia a ni Charles L. Ives ti abilidad ti Dios a mangusar iti pannakabalinna manipud iti maysa a masnup a lugar. Kastoy ti insuratna: “Kas pagarigan, kunatayo, ‘Lukatam dagiti tawa, tapno sumrek ti init iti siledtayo.’ Saan a ti mismo nga init ti kayattayo a sawen, no di ket dagiti raya wenno silnag, nga agtaud iti init.” Umasping iti dayta, din kasapulan nga agdaliasat ti Dios kadagiti lugar a kayatna a pangusaran iti aktibo a puersana. Us-usarenna laeng ti nasantuan nga espirituna a dumanon agingga kadagiti kaadaywan a disso nga ayan dagiti parsuana. No maawatanyo no ania a talaga ti nasantuan nga espiritu—ti aktibo a puersa ti Dios—makapagtalekkayo a tungpalento ni Jehova dagiti karina.

NAPANUNOTMO KADIN?

◼ Isursuro kadi ti Biblia a maysa a persona ti nasantuan nga espiritu?—Aramid 10:44, 45.

◼ Ania ti nasantuan nga espiritu?—Genesis 1:2.

◼ Kasano kaadayo ti madanon ti nasantuan nga espiritu ti Dios?—Salmo 139:7.