Manipud Kadagiti Agbasbasa

Baro a Disenio ti Agriingkayo! Idi rabii, nalpasko a binasa ti Enero 2006 a ruar ti Agriingkayo! Talaga a magustuak ti baro a diseniona! Ti Agriingkayo! ket ad-addan nga agpaay iti panagadal ta pagpanunotenna ti agbasbasa iti dayta. Iti panangbasak iti intero a linaonna, naamirisko nga iwanwanwan ni Jehova ti espiritual nga irarang-aytayo.

B. N., Canada

Agtawenak iti 16. Dagiti baro a disenio ti Agriingkayo! ti dakkel a makatulong kadakami nga agadal iti Biblia. Adda agsasaruno a saludsod iti dadduma nga artikulo a makatulong iti agbasbasa a mangutob iti binasana. Magusgustuak nga usaren ti Agriingkayo! kadagiti leksionko idiay eskuelaan. Sapay koma ta itultuloyyo ti agipablaak kadagiti kasta a nagsayaat ken makatulong nga impormasion agpaay kadakami.

S. N., Namibia

Pinabilegnak ti Pammatik—Panangibtur iti ALS (Enero 2006) Kalpasan a nabasak ti kapadasan ni Jason Stuart, kasla awanen ti kaimudingan ti amin a problemak. Naamirisko nga ap-apresiaren ni Jehova ti panagserbitayo kenkuana sigun iti kasasaadtayo. Apresiarek ti asawa ni Jason gapu iti panagsakripisio ken panagtalekna ken Jehova. Diakto pulos malipatan daytoy a kapadasan ken daytanto ti tumulong kaniak a mangsaranget kadagiti problema a tumaud iti masanguanan.

C. R.S., Peru

Nakasangitak kalpasan a nabasak ti pakasaritaan ni Jason, saan laeng a gapu ta natukay ti riknak idi nabasak dagiti rigatna no di ket kas maysa kadagiti Saksi ni Jehova, ipagpannakkelko unay ta adda kapammatiak a kas kenkuana. Natarusak iti artikulo ti kinapateg ti panagsagana a mangsango kadagiti pakasuotan, yantangay mabalin a dumteng iti asinoman kadatayo ti “tiempo ken ti di mapakpakadaan a pasamak.”—Eclesiastes 9:11.

T. A., Hungary

Naulilaak iti ina gapu iti ALS isu a natukayak iti kapadasan ni Jason. Ti ulidanna pinaregtanak nga agtultuloy a mangaramid iti kabaelak iti ministeriok. Ikarkararagko nga itultuloy koma ni Jehova a pabilgen daytoy a kabsat ken ti asawana.

L.Z.G., Paraguay

Pinagpanunotnak ti kinapinget ni Jason iti personal a panagadalna idi nasalun-at pay laeng, isu a natibker ti espiritualidadna a mangpabpabileg itan kenkuana. Dayta ti nangpabileg iti determinasionko nga agbalin a napingpinget iti personal a panagadalko iti Biblia.

Y. M., Japan

Agimtuod Dagiti Agtutubo—Apay a Dangdangrak ti Bagik? (Enero 2006) Kas maysa nga agtutubo, nasumokko ti agdroga ken aginum, ngem ti panangdangranko iti bagik ti kakaruan a parikut a parparmekek. Kanayon a marigatanak a mangisardeng iti dayta, isu a dagiti artikulo a kas iti daytoy ti nangpabileg kaniak nga agibtur. Pagyamanan unay.

E. C., Estados Unidos

Dangdangrakon ti bagik sipud pay idi balasitangak. Agtawenak itan iti 56. Uppat a tawenen nga insardengko ti ugalik a mangdangran iti bagik, ngem no dadduma, nakaro dagiti problemak isu a kayatko manen nga aramiden dayta. Daytoy nga artikulo ti nangtukay iti kaunggan ti pusok. Pinaturedna dagiti kas kaniak a mangsaranget iti inaldaw a panagbiag.

Dina insurat ti naganna, Netherlands

Agtawenak iti 17 ket kayatko ti agyaman kadakayo gapu iti daytoy nga artikulo. Problemak ti panangdangranko iti bagik. Nabiit pay a sinugatko manen ti bagik. Kalpasanna, inasitgak ni nanangko ken kiniddawko nga agkararagkami a dua. Iti laksid daytoy a problemak, naammuak nga ipatpategnak ni Jehova. Dakkel ti naitulong ti artikuloyo ket agyamanak iti Dios gapu iti dayta!

N. M., Czech Republic

“Imposible!” Dayta ti reaksionko idi nakitak daytoy nga artikulo. Agtawenak iti 18. Nabayagen a dangdangrak ti bagik. Ti ut-ot ti tumultulong a mangep-ep iti emosionko. Masansan a kayatko a dangran ti bagik, ket diak ammo no kasano a pengdan dayta a riknak. Nasdaawak unay idi nakitak daytoy nga artikulo. Nakasangitak ken nagyamanak ken Jehova. Iti organisasion laeng ni Jehova ti pakasarakan iti kasta a liwliwa!

A. P., Russia

Idi agtawenak iti 14, rinugiak nga iliwliwag ti sakit ti nakemko babaen ti panangdangranko iti bagik. Naminsan, nayospitalak payen gapu iti dayta. Dakkel ti naitulong kaniak ti panagsuratko iti diary tapno makontrolko dagiti pagannayasak. No masulisogak met a mangdangran iti bagik, awagak ti maysa a mannakaawat a gayyem. Makatulong a nangnangruna ti panagkararag. Ket no mariknak a saanak a maikari nga agkararag, dagiti gagayyemko ken dagiti Kristiano a panglakayen ti mangikararag kaniak. Narigat a parmeken ngem nasursurok a daeran dayta ken aw-awatek ti amin a magun-odak a tulong tapno diakton dangran manen ti bagik.

N. W., Alemania

Ti ladawan iti umuna a panid daytoy nga artikulo ket maysa a babai a mangparparut iti buokna, sa dinakamat ti artikulo ti maipapan ken “Sara,” a mangparparut iti buokna tapno madusana ti bagina. Ti balasangko ket addaan iti sakit a maawagan iti trichotillomania, maysa a kasasaad a ti panangparut iti buok ti maysa kadagiti sintomasna. Kaasping dayta ti obsessive-compulsive disorder (wenno mangpakapuy a kasasaad a mailasin babaen ti di makontrol a makariribuk a kapanunotan ken tigtignay). Sumken gapu ta dina makontrol dayta, saan a gapu ta kayatna a dangran ti bagina. Nupay parutenna ti buokna, saan a pangrugrugian dayta ti sakit a panangsugat iti bagi.

M. H., Estados Unidos

Sungbat ti “Agriingkayo!”: Nangrugi a nausar ti termino a trichotillomania idi arinunos ti maika-19 a siglo a tuktukoyenna ti adda depektona a kababalin. Ti sintomas dayta ket isu ti di makontrol a pagannayasan a panangparut iti buok. Kas iti maitutop nga iyilustrar ti inusarmi a ladawan, parparuten ti dadduma ti buokda kas pamay-an tapno madangran ti bagida. Nupay kasta, saan a kaipapanan dayta nga amin nga addaan iti di makontrol a pagannayasan a mangparut iti buokda ket isuda ti kita dagiti mangdangdangran iti bagida a dinakamatmi iti dayta nga artikulo. Kas iti impatuldo ti nagsurat kadakami nga agbasbasa iti daytoy a magasin, no dadduma, dayta nga ugali ket ad-adda a nainaig iti sakit nga obsessive-compulsive disorder.

Iti aniaman a kasasaad, ilawlawag ti dadduma nga eksperto a masapul a maikabilangan ti pakaigapuan ti trichotillomania tapno ti panangagas ket maibagay kadagiti kasapulan ti mismo nga agsagsagaba iti dayta a sakit. Mabalin ngarud a nainsiriban no agpadoktor dagidiay addaan iti daytoy a sakit tapno madayagnos ken maiplano ti pannakaagasda.

Ania ti Sungbatmo? (Enero 2006) Naragsakanak unay iti daytoy baro nga artikulona! Dakami a mismo ti mangisursuro kadagiti appokomi babaen ti programa a home schooling, isu a nagsayaatto a nayon daytoy ti inaldaw a panagbasada iti Biblia ken dagiti artikulo ti Agriingkayo! a basbasaenda kas paset ti naituding nga adalenda. Pagyamanan iti kasta unay a pannakaseknanyo kadagiti ubbing.

B. E., Estados Unidos

Mamagpanunot daytoy baro nga artikulona ngem no mabirokak ti sungbat, talaga a maragsakanak! Idi rabii, agpatnag a binasak daytoy a panid ket makapainteres unay! Inton dumakkelak, kayatko ti tumulong nga agaramid iti daytoy a magasin tapno matulongak dagiti sabsabali a maaddaan iti pannakaammo maipapan ken Jehova!

D. H., Estados Unidos

Agtawenak iti walo. Us-usaren ti pamiliami daytoy a panid iti sangapamiliaan a panagadalmi. Magustuanmi ti panagsukimat a nasken nga aramidenmi. Medio narigat ti paset nga “Asinoak?” ngem magustuanmi, agsipud ta pagpanunotennakami. Sapay koma ta itultuloyyo nga ipablaak dagitoy a nagsayaat nga artikulo.

C. W., Estados Unidos