TULONG PARA ITI PAMILIA | PANANGPADAKKEL ITI ANNAK
No Dangdangran ti Anakmo ti Bagina
TI PROBLEMA
Naduktalam nga igaggagara ti anakmo a dangran ti bagina. Mabalin a mapanunotmo: ‘Apay nga ar-aramidenna dayta? Kayatna kadi ti agpakamatay?’
Mabalin a saan met. Ngem no dangdangranna ti baginaa, kasapulanna la ketdi ti tulong. Kasanom a matulongan? Umuna, ammuem ti makagapu iti kasta a makapadanag nga ar-aramidenna.
DAGITI MAKAGAPU
Uso la kadi dayta? Dangdangran ti dadduma nga agtutubo ti bagida gapu ta nadamagda a kasta ti ar-aramiden ti sabsabali. Ngem saan laeng a basta uso dayta. Ania ti nakaidumaanna? Kadawyanna nga ilimlimed ti maysa ti ar-aramidenna ken ibainna unay dayta. “Diak kayat idi a maammuan ti asinoman ti ar-aramidek,” kuna ti 20 anyos a ni Celia.b “Naglaingak a mangilemmeng kadagiti piglatko.”
Panagpapansin la kadi dayta? Nalabit kasta ti pamay-an ti dadduma. Ngem dagiti mangdangdangran iti bagida a nadakamat iti daytoy nga artikulo ket gagangay nga ilimedda ti ar-aramidenda ken dida us-usaren dagiti sugat wenno piglatda tapno agpapansin. Kaskasdi, kuna ti maysa a dati a mangdangdangran iti bagina a kayatna nga adda koma nakadlaw kadagiti sugatna tapno isu ket naasikaso ken nasapsapa a natulongan.
Apay ngarud nga adda dagiti mangar-aramid iti kasta? Komplikado dagiti makagapu, ngem daytoy ti talaga a rason: Ti maysa nga agtutubo ket gagangay a makarikna iti saem a narigatna a mayebkas. Iti librona a Cutting, ti eksperto kadagiti problema mainaig iti kasasaad ti isip a ni Steven Levenkron deskribirenna ti maysa a mangdangdangran iti bagina kas “daydiay mangibilang a ti pisikal nga ut-ot ket mabalin a pangep-ep iti nasaem a rikna.”
Ti mangdangdangran iti bagina ket gagangay a makarikna iti saem a narigatna a mayebkas
Kasanon no pabasolem ti bagim? Imbes a sangkapanunotmo nga amangan ta di umiso ti panangpadakkelmo iti anakmo isu a dangdangranna ti bagina, panunotem ketdi ti maaramidan ti nasayaat a panangpadakkel iti isasayaat ti kasasaadna.
TI MABALINMO NGA ARAMIDEN
Paregtaem ti anakmo nga ibagana kenka ti pakariribukanna. Makatulong dagitoy a singasing.
Liwliwaem. No ipudno ti anakmo a dangdangranna ti bagina, dimo ipadlaw a maklaatka. Kalmado ken makaliwliwa koma ti pannakisaritam.—Prinsipio ti Biblia: 1 Tesalonica 5:14.
Liklikam dagiti mangakusar a saludsod. Kas pagarigan, mabalinmo nga ibaga: “Ammok a saan a kanayon a nasayaat ti panagriknam iti bagim. Ania kadi ti kangrunaan a pakaup-upayam?” wenno “Ania ti mabalin a maitulongko no mariribukan wenno malmaldayka?” wenno “Ania ti kangrunaan nga aramidek tapno nasingsingedak kenka?” Denggem dagiti sungbatna a dika sumamsampitaw.—Prinsipio ti Biblia: Santiago 1:19.
Tulongam a mangkita kadagiti nasayaat a galadna. Dagiti mangdangdangran iti bagida ket masansan a sangkapanunotda dagiti pagkamalianda isu a mabalin a paregtaem ti anakmo a mangkita kadagiti nasayaat a galadna. Mabalinmo pay ketdi nga ipaisurat ti uray tallo a magustuanna iti bagina. “Idi insuratko dagiti paglaingak, nakitak nga addaanak gayam kadagiti nasayaat a galad,” kuna ti balasang a ni Briana.c
Paregtaem nga agkararag ken Jehova a Dios. Kuna ti Biblia: “Iyallatiwyo kenkuana ti isuamin a pakaringgoranyo, agsipud ta isu maseknan kadakayo.” (1 Pedro 5:7) “Inkagumaak nga ibaga ken Jehova ti amin a marikriknak,” kuna ti 17 anyos a ni Lorena, “nangruna no kayatko idi a dangran ti bagik. Dayta ti timmulong kaniak a nangaramid iti amin a kabaelak a sumardeng.”—Prinsipio ti Biblia: 1 Tesalonica 5:17.
a Ti panangdangran iti bagi ket ti inggagara a panangranggas iti bagi babaen man iti panangsugat, panangdunor, panangdanog wenno sabali pay a pamay-an.
b Nabaliwan dagiti nagan iti daytoy nga artikulo.
c Kaaduanna a ti panangdangran iti bagi ket maysa a sintoma ti depresion wenno sabali pay a sakit. Kadagita a kasasaad, mabalin a kasapulan ti panagpadoktor. Saan a mangyen-endorso ti Agriingkayo! iti aniaman a pamay-an ti panangagas. Siguraduen koma dagiti Kristiano nga aniaman ti pilienda a panangagas ket saan a maisalungasing kadagiti prinsipio ti Biblia.