Ti Panangmatmat ti Biblia
Dakes Kadi ti Uminum iti Arak?
“TI ARAK ket managuy-uyaw, ti makabartek nga inumen naariwawa, ket ti tunggal maysa a maiwawa babaen iti dayta saan a masirib.” Ipakpakita kadi daytoy a teksto a nailanad iti Biblia idiay Proverbio 20:1 a dakes ti uminum iti arak? Kasta ti kuna ti dadduma. Kas kanayonan a pammaneknek, dakamatenda dagiti salaysay ti Biblia a mangipakita kadagiti dakes nga aramid a resulta ti nalabes a panaginum iti arak.—Genesis 9:20-25.
Adda pay dagiti makadidigra a resulta ti nalabes a panaginum iti arak—dagiti sakit a kas iti cirrhosis ti dalem, nakalkaldaang nga aksidente, pannakaibus ti kuarta, pannakaabuso ti pamilia, ken pannakadangran ti sikog. Nalabit a gapu kadagita a nagdakes a resulta, “insuro ti adu a relihion a dakes ti uminum iti arak,” kuna ti The World Book Encyclopedia. Ngem dakes kadi ti uminum iti arak? Iparit kadi ti Biblia ti panaginum iti amin a kita ti arak ken uray no bassit laeng?
Ania ti Kuna ti Biblia?
Agpayso a mamakdaar ti Biblia maipapan kadagiti makadangran nga epekto ti nalabes a panaginum iti arak. Kastoy ti ibalbalakad ti Efeso 5:18: “Dikay agbarbartek iti arak, nga iti dayta adda kinagaramugam.” Kasta met a kastoy ti balakad ti Proverbio 23:20, 21: “Dika makikadua kadagiti nakaro ti panagin-inumna iti arak, kadagidiay a nabuklis a mannangan iti lasag. Ta ti managbarbartek ken buklis kumurapaydanto.” Kuna ti Isaias 5:11: “Asi pay dagidiay bumangbangon a nasapa iti bigat tapno makasapulda laeng iti makabartek nga inumen, isuda nga agmenmenmen agingga iti adalemen a kinasipnget ti rabii tapno paggil-ayaben ida ti mismo nga arak!”
Dakamaten met ti Biblia ti ragsak ken pagimbagan ti panaginum iti kalkalainganna. Kas pagarigan, kuna ti Salmo 104:15 a ti maysa kadagiti sagut ti Dios ket ti “arak a mamagrag-o iti puso ti mortal a tao.” Kuna met ti Eclesiastes 9:7 a ti gunggona iti panangaramidmo kadagiti nasayaat a trabaho ket “kanem ti taraonmo buyogen ti panagrag-o ket inumem ti arakmo buyogen ti naimbag a puso.” Gapu ta ammo ni Pablo a makaagas ti panaginum iti arak, kastoy ti imbagana ken ni Timoteo: “Dika uminumen iti danum, no di ket agusarka iti bassit nga arak maigapu ita rusokmo ken kadagiti masansan a panagsaksakitmo.” (1 Timoteo 5:23) Nadakamat iti Biblia a makatulong ti arak tapno maibturan ti maysa ti pakarigatanna.—Proverbio 31:6, 7.
Nalawag a saan nga iparit ti Biblia ti panaginum iti arak. Nupay kasta, ti nalabes a panaginum ken ti panagbartek ti pudno a kondenarenna. Gapuna, binalakadan ni Pablo dagiti Kristiano a manangaywan, ministerial nga adipen, ken babbaket a saanda nga uminum “iti adu nga arak,” ken binagbagaanna ni Timoteo nga uminum iti “bassit nga arak.” (1 Timoteo 3:2, 3, 8; Tito 2:2, 3) Maipalagip kadagiti amin a Kristiano a “dagiti managbarbartek” “didanto tawiden ti pagarian ti Dios.”—1 Corinto 6:9, 10.
Makapainteres ta sigun iti Biblia, adda nakainaigan ti panagbartek iti kinabuklis, nga ibilinna a rumbeng a maliklikan dagita nga agpadpada. (Deuteronomio 21:20) No kaipapanan dayta a rumbeng a ditay pulos uminum iti aniaman nga arak, saan kadi nga ipasimudaagna met koma a dakes met ti pannangan uray iti bassit laeng a taraon? Imbes ketdi, ti panagbartek ken kinabuklis ti ibagbaga ti Biblia a dakes—saan ket a ti kalkalainganna a pannangan ken panaginum.
Ania ti Inaramid ni Jesus?
Nangibati ni Kristo iti “pagwadan tapno sisisinged a suroten[tayo] dagiti addangna,” kinuna ni apostol Pedro. “Saan a nakaaramid iti basol.” (1 Pedro 2:21, 22) Isu nga ania ti panangmatmat ni Jesus no maipapan iti arak? Bueno, ti umuna a milagro nga inaramidna idi ket pinagbalinna nga arak ti danum. Ania a kita nga arak ti pinataud ni Jesus? “Ti mangiwanwanwan iti padaya” pinadayawanna ti nobio gapu iti dayta nga arak a milagro a napataud. Kinunana: “Tunggal sabali a tao iruarna nga umuna ti nasayaat nga arak, ket inton mabarteken dagiti tattao, ti nakapkapuy. Inlasinmo ti nasayaat nga arak agingga ita.”—Juan 2:9, 10.
Ti panaginum iti arak ket paset ti pannakarambak ti Paskua, ken nagusar ni Jesus iti arak idi inyussuatna ti Pangrabii ti Apo. Bayat nga inyawatna ti kopa ti arak kadagiti adalanna, kinunana kadakuada: “Uminumkayo manipud iti dayta, dakayo amin.” Gapu ta ammona nga umad-adanin ti ipapatayna, innayonna: “Manipud ita saanakto a pulos uminumen iti aniaman itoy a nagtaud iti ubas agingga iti dayta nga aldaw inton uminumak iti baro a kaduakayo idiay pagarian ni Amak.” (Mateo 26:27, 29) Wen, ammo dagiti tattao a ni Jesus ket imminum iti arak.—Lucas 7:34.
Ania ti Rumbeng nga Aramidentayo?
Nupay saan nga iparit ti Biblia ti panaginum iti arak, dina kaipapanan a nasken nga uminumtayo iti dayta. Adu ti rason tapno liklikantayo dayta. Kas pagarigan, ti maysa a dati nga alkoholiko ammona dagiti peggad ti panaginum iti uray maysa laeng a tagay. Ti masikog mabalin a liklikanna ti uminum gapu iti amak a di la ket ta madangran ti sikogna. Ken gapu ta ammona a ti arak ket mangdadael iti kinasimbeng ken kinasiglat, ti maysa a drayber liklikanna ti mangaramid iti aniaman a mamagpeggad iti biagna wenno iti biag ti sabsabali.
Saan a kayat ti maysa a Kristiano nga itibkol ti siasinoman a mangkondenar iti panaginum gapu iti konsiensiana. (Roma 14:21) Nainsiriban a liklikanna ti uminum no mapan mangasaba. Makapainteres ta iti sidong ti Linteg ti Dios iti nagkauna nga Israel, maiparit kadagiti papadi ti “uminum iti arak wenno makabartek nga inumen” no ar-aramidenda ti annongenda. (Levitico 10:9) Kasta met a kadagiti lugar a maiparit ti uminum iti arak, ti maysa a Kristiano ket agtulnog iti linteg.—Roma 13:1.
Nupay personal a banag ti panagdesision no ti maysa ket uminum wenno saan, wenno no kasano ti kaadu ti inumenna, iparparegta ti Biblia ti panaginum iti kalkalainganna. Kunana: “Uray no mangmangan wenno umin-inum wenno agar-aramidkayo iti aniaman pay a banag, aramidenyo ti amin a bambanag a maipaay iti dayag ti Dios.”—1 Corinto 10:31.
NAPANUNOTYO KADI?
◼ Ania ti pakdaar ti Biblia mainaig iti panaginum iti arak?—1 Corinto 6:9, 10.
◼ Ni Jesu-Kristo kadi ket imminum iti arak?—Lucas 7:34.
◼ Ania ti mangiwanwan kadagiti pudno a Kristiano no iti pannangan ken panaginum?—1 Corinto 10:31.