Ania ti Masakbayan ti Kristianidad?

TI NGATA lubong ket makombertento iti Kinakristiano, wenno mapukawto ti Kristianidad? Nagtalinaed kadi a nasin-aw ti Kristianidad kas gubuayan ti lawag iti nasipngetan a lubong, wenno kimmudrep daytan? Dagita ket salsaludsod a pakaseknantayo agingga ita.

Babaen ti simple nga ilustrasion, impakita ni Jesus a kalpasan unay nga immulana dagiti bin-i ti Kristianidad, bimmallaet ti maysa a kabusor nga isu ni Satanas. (Mateo 13:24, 25) Gapuna, saan laeng a basta maysa a panagbalbaliw iti kagimongan ti namagbalbaliw iti Kristianidad bayat ti immuna a sumagmamano a siglo kalpasan ti ministerio ni Jesus. Dayta ket gannuat ti kabusor, gannuat ni Satanas. Ita, ap-apitenen dagiti relihion ti Kakristianuan dagiti epekto ti panangpanuynoyda kadagiti datin a biddut iti napalabas.—2 Corinto 11:14, 15; Santiago 4:4.

Nalimed nga Iraraut iti Kristianidad

Impakpakauna ni Jesus nga addanto dagiti mangballikug kadagiti sursurona. Kinunana: “Ti pagarian ti langlangit nagbalin a kas iti maysa a tao a nagimula iti nasayaat a bin-i iti talonna. Bayat a matmaturog dagiti tattao, immay ti kabusorna ket nagimula met kadagiti dakes a ruot iti nagbabaetan dagiti trigo, ket pimmanaw.” Idi a dagiti adipen impakaammoda iti nagmula ti dakes a napasamak sada kiniddaw ti pammalubosna a maikkat dagiti dakes a ruot, kastoy ti di ninamnama a kinuna ti nagmula: “Saan; di la ket ta, bayat nga um-ummongenyo dagiti dakes a ruot, maparutyo dagiti trigo a maikuyog kadakuada. Bay-anyo nga agpadpadada a dumakkel agingga iti panagani; ket iti panawen ti panagani ibagakto kadagiti managani, Umuna nga ummongenyo dagiti dakes a ruot ket reppetenyo ida iti pinungpungngo tapno puoranyo ida, kalpasanna inkay urnongen dagiti trigo iti kamaligko.”—Mateo 13:24-30.

Kas inlawlawag mismo ni Jesus, isuna ti iladladawan ti tao a nagmula iti trigo, ket dagiti pudno a Kristiano ti iladladawan dagiti bin-i nga immulana. Ti kabusor a nangimula kadagiti dakes a ruot kadagiti trigo iladawanna “ti Diablo.” Dagiti dakes a ruot iladawanda dagiti dakes ken apostata a tattao a siuulbod a mangibagbaga nga adipen ida ti Dios. (Mateo 13:36-42) Nangipaay ni apostol Pablo iti kanayonan a detalye no ania ti mapasamak. Kinunana: “Ammok a kalpasan ti ipapanawko sumrekto iti nagtetengngaanyo dagiti manangirurumen a lobo ket saandanto a tratuen a sidudungngo ti arban, ket manipud kadakayo tumakderto dagiti tattao ket agsaodanto iti tiritir a bambanag tapno iyadayoda a pasuroten kadakuada dagiti adalan.”—Aramid 20:29, 30.

Naballikug ti Kristianidad

Pimmayso kadi ti inyilustrar ni Jesus ken impakpakauna ni Pablo? Wen. Dagiti ambisioso a tattao kinontrolda ti kongregasion nga impasdek ni Jesus ket inusarda dayta maipaay kadagiti personal a panggepda. Kinuna idi ni Jesus kadagiti adalanna: “Saankayo a paset ti lubong.” (Juan 15:19) Imbes a kasta, dagitoy a tattao nga agbibisin iti pannakabalin nakialiansada kadagiti agtuturay ken nangipasdekda kadagiti relihion a supsuportaran ti Gobierno isu a naaddaanda iti dakkel a bileg ken kinabaknang. Insuro dagitoy a relihion ti “tiritir a bambanag.” Kas pagarigan, insuroda kadagiti tattao a dayawenda ti Gobierno ken isakripisioda ti biagda iti gubat maipaay iti gobiernoda. Gapuna, dagiti agkunkuna a Kristiano nakipasetda kadagiti Krusada ken pinapatayda dagiti dida kapammatian. Nakigubatda met ken pinapatayda dagiti mismo a kapammatianda. Sigurado a saanda nga inyaplikar ti Nakristianuan a neutralidad ken ti panagayat iti padada a tao.—Mateo 22:37-39; Juan 15:19; 2 Corinto 10:3-5; 1 Juan 4:8, 11.

Nalawag, dagiti relihion a sinigsiglon a mangibagbaga a Kristianoda irepresentarda ti palso a Kristianidad. Dayta ti mangilawlawag no apay nga agtultuloy ti pannakabingbingay dagiti relihion kadagiti babassit a sekta, relihion a makiramraman iti politika, ken relihion a di mangikabkabilangan kadagiti linteg ti Dios, kas naammuantayon kadagiti immuna nga artikulo. Dagiti kasta a dakes a bunga ket saan a patpatauden ti pudno a Kristianidad no di ket patpatauden ti palso a Kristianidad, nga immula ti Diablo. Ania ti mapasamakto iti palso a relihion? Kas impakita ni Jesus iti pangngarigna, saan a basta aglumen dayta gapu iti kinaawan ti suporta. Masentensiaan ken madadaelto.

Dagiti Pudno a Kristiano a Rumanraniag iti Kasipngetan

Nupay kasta, sakbay a maurnong ken madadael dagiti “dakes a ruot” ti palso a Kristianidad, ipasimudaag ti pangngarig ni Jesus nga adda pay masapul a mapasamak. Sinigsiglon a nakalanglangto dagiti “dakes a ruot” ti palso a Kinakristiano isu a dandani lineppesdan ti pudno a Kristianidad. Ngem ni Jesus inladawanna ti trigo kas naisina manipud kadagiti dakes a ruot bayat ti “panagani,” a kinunana a mangisimbolo iti “panungpalan ti sistema ti bambanag.” Kinunana pay: “Iti dayta a tiempo, dagiti nalinteg agsilnagdanto a siraraniag a kas iti init.” (Mateo 13:39-43) Ipakita ti ebidensia nga agbibiagtayon iti panungpalan ti sistema ti bambanag sipud idi Gubat Sangalubongan I, a napasamak nasurok a 90 a tawenen ti napalabas. (Mateo 24:3, 7-12) Napasamak kadi daytoy a paset ti naimpadtuan a pangngarig ni Jesus?

Dagiti pudno a Kristiano naisinadan manipud kadagiti “dakes a ruot” ti Kakristianuan. Dagiti Saksi ni Jehova ket ‘rumanraniag a kas iti init,’ a tumultulong kadagiti sabsabali a mangammo iti maipapan ken Jehova, ti pudno a Dios. Dagiti Saksi saanda a tagibassiten dagiti pagalagadan ti Dios. Imbes ketdi, dagiti tattao nga agbalin a Saksi kaaduanna a rumbeng a mangaramidda kadagiti dakkel a panagbalbaliw iti estilo ti panagbiagda tapno masurotda dagiti Nakristianuan a prinsipio iti Biblia.

Dagiti Saksi ni Jehova saanda nga aramiden a paglinglingayan dagiti gimongda. Imbes ketdi, mangitukonda iti libre a panagadal iti Biblia. Makilangenda met buyogen ti nasged nga ayat ken pannakigayyem, dagiti galad a nasursuroda babaen ti panagadalda iti Kasuratan. Patienda a ti Dios pagbalinenna a paraiso ti daga tapno pagnaedan dagiti naemma, kas iti immuna a panggepna. Ngem masapul a madalusan nga umuna ti lubong tapno maikkat dagiti dakes nga impluensia ti palso a relihion, nga impabigbig ti Biblia kas ti Babilonia a Dakkel. Sigun iti padto ti Biblia, asidegen nga aramiden ni Jehova dayta a dakkel a panagbalbaliw.—Mateo 5:5; Apocalipsis 18:9-10, 21.

Kalpasan a mawayawayaan ti natulnog a sangatauan manipud iti mangallilaw nga ar-aramid ti palso a relihion, ti pudno a Nakristianuan a panagdayaw pagkaykaysaennanton ti amin nga agbibiag ditoy daga. Anian a nagsayaat a masakbayan ti pudno a Kristianidad nga immula ni Jesus! Ti Paraiso a kasasaad a kas idi iti Eden ket maisublinto iti natalna a daga, nga awanton dagiti relihion a mamagsisinasina!

[Ladawan iti panid 7]

“Immay ti kabusorna ket nagimula met kadagiti dakes a ruot.”—Mateo 13:25

[Dagiti Ladawan iti panid 8, 9]

Sibabara a maawiskayo a tumabuno iti sadinoman a Kingdom Hall dagiti Saksi ni Jehova, a pakaituktukonan ti libre a panagadal iti Biblia

[Ladawan iti panid 9]

“Kalpasanna, inkay urnongen dagiti trigo iti kamaligko.”—Mateo 13:30