No Apay a Pinanawak ti Sirko

Kas insalaysay ni Marcelo Neím

NAIPASNGAYAK idiay Montevideo, Uruguay. Nupay managbuteng iti Dios dagiti nagannakko, saanda a kameng ti aniaman a relihion. Natay ni nanangko gapu iti maysa nga aksidente idi agarup uppat ti tawenko, isu a dagiti kakabagiak ti nangpadakkel kaniak ket inkagumaanda nga iyukuok kaniak dagiti nasayaat a prinsipio. Idi agtawenak iti 20, inkeddengko ti mapan iti nadumaduma a pagilian tapno agpasiarak ken ammuek ti nadumaduma a kulturada.

Idiay Colombia, nangrugiak nga agtrabaho kas maysa a katulongan kadagiti sirko. Napaliiwko no kasano karagsak dagiti agpabpabuya no agpalakpak dagiti agbuybuya isu a kayatko idi ti agbalin a maysa kadakuada. Isu a nagensayoak nga agbisikleta, a nagusarak iti babassit agingga kadagiti babbabassit a bisikleta. Idi agangay, kabaelakon ti agpabuya babaen ti panagbisikletak iti 12 la a sentimetro ti kaatiddogna—maysa kadagiti kabassitan a bisikleta iti lubong. Apag-isu laeng dayta iti dakulapko. Nangrugin a limmatakak iti kaaduan a paset ti Abagatan nga America. Idi agtawenak iti 25, simmangpetak ditoy Mexico ket nagtrabahoak iti nadumaduma a sirko.

Naan-anay a Nagbalbaliw ti Biagko

Nagustuak ti biag iti sirko. Karaman iti dayta ti masansan a panagbiahe, panagnaed kadagiti kasayaatan nga otel, pannangan kadagiti kanginaan a restawran. Ngem para kaniak, saan a makapnek ti biagko ken awan ti namnamak iti masanguanan. Maysa a malem, nagbalbaliw ti biagko. Ti para anunsio iti mabuya iti sirko intedna kaniak ti naawatna a libro a napauluan iti Apocalipsis—Ti Nadayag a Tampokna Asidegen!a Kalpasan ti pabuya, binasak dayta agingga iti parbangon. Nupay diak unay maawatan ti linaon dayta a libro, nagustuak ti panangilawlawagna maipapan iti eskarlata ti marisna nga atap nga animal ken ti balangkantis iti Apocalipsis. (Apocalipsis 17:3–18:8) Kalpasanna, bayat a daldalusak ti ginatangko a lugan, nakasarakak iti sabali pay a libro a napauluan iti Mabalinyo ti Agbiag nga Agnanayon iti Paraiso a Daga* nga immaldit dagiti isu met la a managipablaak. Nalaklaka a maawatan dayta, ket dagus a naamirisko a masapul a mangasabaak. Isu a dagus nga inranudko ti naammuak iti siasinoman a naam-ammok.

Iti panaglabas ti tiempo, naamirisko a nasken a makiumanak kadagiti Saksi ni Jehova. Naisurat iti libro a Tampok ti Apocalipsis ti numero ti telepono ti babai a Saksi a nangipaima iti dayta a libro iti gayyemko. Isu nga inawagak dayta a numero ket inawisnak ni tatangna iti maysa a kombension dagiti Saksi ni Jehova idiay Tijuana, Mexico. Nasdaawak iti ayat a naipakita sadiay isu a nakombinsirak a dayta ti pudno a relihion. Sadinoman ti papanan ti sirko, nakigimongak iti Kingdom Hall iti dayta a lugar ken nangalaak kadagiti literatura nga ibunongko iti nadumaduma a lugar.

Adda maysa a pasamak nga ad-adda a nangkombinsir kaniak nga umiso ti ar-aramidek. Inawisdak dagiti Saksi a tumabuno iti Memorial ti ipapatay ni Kristo ket inlawlawagda a nasken a tabunuan dayta dagiti Kristiano. Ngem daydi ti umuna a rabii ti panagpabuyami iti sirko isu nga impagarupko a diak makatabuno. Sipapasnek a nagkararagak ken ni Jehova maipapan iti dayta, ket adda nakaskasdaaw a napasamak. Dua nga oras sakbay ti pabuya, nagawan ti koriente! Gapu iti dayta, natabunuak ti Memorial ket nakasubliak a dagus tapno agpabuya. Para kaniak, nalawag a sinungbatan ni Jehova ti kararagko.

Naminsan, agibumbunongak kadagiti polieto bayat a makipilpilaak iti banko. Nakitanak ti maysa a Kristiano a panglakayen ket kinomendaranna ti kinaregtak. Pinaregtanak a mangasaba iti organisado a pamay-an, babaen ti panangiwanwan ti kongregasion. Siaayat nga inlawlawagna a nasken a balbaliwak ti panagbiagko tapno maaramidko dayta. Idi pangpanggepekon ti agbalbaliw, adda naitukon kaniak a trabaho iti sirko idiay Estados Unidos a nangato ti pasueldona. Agpangpangaduaak. Kayatko ti mapan idiay Estados Unidos, ngem no awatek dayta, diak sigurado no makapagtultuloyak iti irugrugikon a wagas ti panagbiag. Daydi ti immuna a naipasango kaniak a pannubok, ket diak kayat a paayen ni Jehova. Nupay nasdaaw dagiti katrabahuak iti desisionko, pinanawak ti sirko, nagbalinak a kameng ti maysa a kongregasion, impapukisko ti atiddog a buokko, ken binalbaliwak ti dadduma pay nga estilo ti panagbiagko tapno makapagserbiak ken Jehova.

Makapnek a Biag a Diak Pagbabawyan

Idi 1997, di nagbayag kalpasan ti panagbautisarko kas maysa a Saksi ni Jehova, adda naipasango kaniak a maikadua a pannubok—sabali manen a gundaway tapno makapanak idiay Estados Unidos. Iti daytoy a gundaway, naawisak nga agpabuya iti maysa a nalatak a programa iti telebision idiay Miami nga awan pulos ti gastuek. Ngem kayatko ti agpabautisar tapno matungpalko ti dedikasionko ken Jehova. Isu a diak inawat dayta a tukon, a nakasdaawan unay dagiti pannakabagi dayta a programa.

Damdamagen ti dadduma no pagbabawyak ti panangpanawko iti biagko idiay sirko. Kas sungbatko, ti pannakigayyem ken panagayatko ken Jehova ket diak pulos isukat iti dati a panagbiagko. Nupay ti baro a karerak kas amin-tiempo a Kristiano a ministro ket saan a mangipaay kaniak iti dayaw, kinalatak, ken kinabaknang iti daytoy a lubong, nagbalin a makapnek ti biagko. Addaanakon iti nakapatpateg a namnama nga agbiag iti paraiso a daga ken mangabrasa ken ni nanangko inton panagungar.—Juan 5:28, 29.

[Footnote]