Ti Panangmatmat ti Biblia

Ania a Talaga ti Kaipapanan ti Kinaulo iti Urnos ti Panagasawa?

ITI adu a pagilian, gagangay kadagiti kasar nga agkari ti nobia a pagtulnoganna ti asawana. Kaskasdi, adu a babbai ti saan nga umanamong iti ideya a ti lalaki ti masapul nga agserbi kas pannakauloda. Usigenyo ti pannursuro ti Biblia iti daytoy a banag. Makitayonto a natimbeng ken praktikal ti isursuro ti Biblia.

Ti Kinaulo Kas Inyurnos ti Dios

Ti simple a panangiladawan ti Biblia maipapan iti kinaulo ket masarakan iti Efeso 5:22-24: “Dagiti babbai agpasakupda koma kadagiti assawada a kas iti Apo, agsipud ta ti lalaki isu ti ulo ti asawana a kas met ti Kristo isu ti ulo ti kongregasion . . . Iti kinapudnona, no kasano a ti kongregasion agpaspasakup iti Kristo, kasta met koma dagiti babbai kadagiti assawada iti amin a banag.” Kas “ulo ti asawana,” ti lalaki ti mangidaulo iti pamilia, ket agtulnog ken raemen ti babai ti kinaulo ni lakayna.​—Efeso 5:33.

Saan a naan-anay ti autoridad ti asawa a lalaki yantangay isu ket masapul nga agpasakup met iti Dios ken ni Kristo. Awan ti karbenganna a mangpilit iti asawana a manglabsing kadagiti linteg ti Dios wenno mangikompromiso iti sinanay-Biblia a konsiensiana. Ngem nupay saan a naan-anay ti autoridadna, inikkan ti Dios iti karbengan a mangaramid kadagiti napapateg a pangngeddeng nga agpaay iti pamilia.​—Roma 7:2; 1 Corinto 11:3.

Ibilin ti Biblia nga usaren ti lalaki ti kinaulona a mangyun-una iti pagimbagan ti asawana imbes a ti bukodna a pagimbagan. Kuna ti Efeso 5:25: “Assawa a lallaki, itultuloyyo nga ayaten dagiti assawayo, no kasano a ti Kristo inayatna met ti kongregasion ken inyawatna ti bagina a maipaay iti dayta.” Kas panangtuladna iti nagsayaat nga ulidan ni Kristo mainaig iti ayat, saan koma nga usaren ti lalaki ti kinaulona tapno laeng maaramidna ti kaykayatna.

Maysa pay, ibilin ti Biblia iti lalaki a makipagtaeng iti asawana “maitunos iti pannakaammo.” (1 Pedro 3:7) Ramanen daytoy saan laeng a ti pannakaammona iti pisikal ken emosional a nagdumaan ti lalaki ken babai. Maawatanna koma dagiti kasapulan ti asawana.

“Isu Kaasmangmo”

Ngem masapul kadi nga agulimek lattan ti babai kas panagpasakup iti asawana? Usigenyo ni Sara, nga inusar ti Biblia a pagarigan ti panagtulnog iti asawana a ni Abraham. (1 Pedro 3:5, 6) Nagpasakup ken Abraham iti amin a banag, dadakkel man ken babassit, kas iti situtulok a panangpanaw iti nanam-ay a pagtaengan ken agakar-akar nga agnaed kadagiti tolda, uray iti di ninamnama a panangisagana iti taraon. (Genesis 12:5-9; 18:6) Ngem mainaig iti nakapatpateg a banag, adda dagiti gundaway nga inyebkasna ti panangmatmatna a naiduma ken Abraham. Napasamak daytoy idi kayatna a papanawen ni Agar, a kamalala ni Abraham, ken ti inauna nga anakna a ni Ismael, manipud iti sangakabbalayanda. Imbes a tubngarenna ni Sara, imbaga ti Dios kenni Abraham nga ‘imdenganna ti timekna.’ Kabayatanna, ni Sara nagtultuloy a nagpasakup ken Abraham babaen ti panagur-urayna kenkuana nga agtignay imbes nga isu a mismo ti mangpapanaw kada Agar ken Ismael.​—Genesis 21:8-14.

Ipakita ti ulidan ni Sara nga adda nadayaw nga annongen ti babai, nga isu ket ‘kaasmang’ ti asawana imbes a kasla aniniwan lattan ni lakayna. (Malakias 2:14) Kas kaasmang ti lalaki, makaipaay ti babai iti agkakaimbag nga ideya a makatulong kadagiti desision ti pamilia. Adda met autoridadna iti uneg ti pamiliada, kas iti panagbadyet ken panangasikaso iti sangakabbalayanda. Ngem kas ulo ti pamilia, ti koma matinong ti asawa a lalaki ti masurot.​—Proverbio 31:10-31; 1 Timoteo 5:14.

Panagraem iti Namunganay

Pinarsua ni Jehova a Dios ti lalaki ken babai, ken inyurnosna ti panagasawa kas sagrado a panagtiponda. (Genesis 2:18-24) Inlawlawagna met dagiti annongen ti asawa a lalaki ken babai a mangyeg kadakuada iti kasta unay a rag-o.​—Deuteronomio 24:5; Proverbio 5:18.

Kas Namunganay iti panagasawa, kalintegan ken kabaelan ni Jehova ti mangipasdek kadagiti pagalagadan iti panagasawa. Maay-ayo ken tulongan ti Dios dagiti pagassawaan a mangtungpal kadagiti annongenda ken mangannurot iti urnos ti Dios mainaig iti kinaulo, saan laeng a gapu ta praktikal dayta no di ket kas panangipakita iti panagraem iti autoridad ti Dios.

NAPANUNOTYO KADIN?

◼ Asino ti nangipasdek iti perpekto nga ulidan ti kinaulo?​—Efeso 5:25.

◼ Adda kadi inkeddeng ti Dios a limitasion ti autoridad ti asawa a lalaki?​—1 Corinto 11:3.

◼ Ania ti panggep ti panagasawa ken ti urnos ti kinaulo?​—Proverbio 5:18.

[Ladawan iti panid 28]

Makaparagsak ken makapnek kadagiti agassawa no maipakat ti kinaulo a maitunos iti ulidan ni Kristo