Dagiti Matalek ken Agtintinnulong a Nagannak
◼ Nakalamlamiis iti maysa a patag ti bantay iti nasulinek a paset ti South Africa. Manipud iti naimeng nga opisinak nga adda iti maikatlo a kadsaaran, sipsiputak ti maysa a kayo nga awanen bulbulongna, nga ipallapallayog ti napigsa nga angin iti tiempo ti lam-ek. Iti puon ti maysa kadagiti sangana, adda kalakian a kalapati a maawagan iti laughing dove a mangay-aywan iti dua a sibong a tallo-aldawda pay laeng.
Sakbay a nagitlog ti kabaian, nagtinnulong ti agassawa a kalapati a nangaramid iti umokda—ti kalakian ti nangisangpet kadagiti babassit a sanga ket ti met kabaian ti nangurnos kadagita. Naglagda ti inaramidda nga umok ta uray no napigsa ti angin iti tiempo ti lam-ek, saan a naan-ano dayta ken ti dua nga itlog a linaonna. No rabii, ukopan dagita ti kabaian; no aldaw, ukopan met dagita ti kalakian. Kalpasan ti agarup dua a lawas, napessaanen dagiti itlog. Agarup dua pay a lawas kalpasanna, dadakkelton dagiti sibong ken napigsada metten nga agtayab.
Denggenyo! Mangngegyo kadi ti makaay-ayo a panagkukok, a kas man la agkatkatawa? Iti asideg a sanga, ti kabaian a laughing dove, a napno ti karabukobna iti taraon para kadagiti mabisinen a sibongna ket nagkukok tapno ipakaammona ti isasangpetna ken nakasaganan a makirinneliebo ken lakayna. Uray no kabaelanen dagiti sibong ti agtayab, ipapaayan pay laeng dagiti nagannakda iti taraon agingga a kabaelandan ti agbiag a bukbukodda.
Masansan a pagsidsiddaawak ti panagtitinnulong ken panagdidinnungngo dagita a kalapati a ti nainkasigudan a kababalinda ket di agmintis a matawid ti sumaruno a henerasion. Ipalagip kaniak dagita a napaliiwko ti mabasa iti Salmo 86:8: “Awan ti kas kenka . . . , O Jehova, awan uray aniaman nga ar-aramid a kas iti ar-aramidmo.”
Iti Nasantuan a Biblia, nga isu ti naisurat a Saona, ni Jehova a Dios impaayanna dagiti tattao a nagannak iti giya a kas iti kinamapangnamnamaan ti nainkasigudan a kababalin nga impaayna kadagiti kalapati. Kas pagarigan, idagadag ti Biblia kadagiti inna nga “ayatenda dagiti annakda.” (Tito 2:4) Kinunana met kadagiti amma: “Dikay ruroden ti annakyo, no di ket itultuloyyo a padakkelen ida iti disiplina ken panangiturong-panunot ni Jehova.” (Efeso 6:4; 1 Timoteo 5:8) Sigurado la ketdi nga ipatpateg ti Dios dagiti nagannak a mangan-annurot kadagita.