Ti Kasayaatan a Lumba iti Biagko

Kas insalaysay ni Karl-Erik Bergman

Pagay-ayatko ti tumaray iti napaspas. Nainkasigudan a nalaingak a tumaray isu a dayta idi ti kapatgan iti biagko.

IDI 1972, iti edad a 17, nakimiembroak iti gunglo dagiti atleta. Di nagbayag, naamirisko nga adu pay ti nasken nga aramidek sakbay a lumatakak nga atleta. Saan nga umdas ti saguday tapno agbalinak a kampeon iti dayta a tay-ak. Ngem nakasaganaak nga agporsegi.

Idi 22 ti tawenko, nagbalinak a miembro ti grupo dagiti tumataray a mangibagi iti Finland. Iti simmaganad a tawen, kadagiti amin nga atleta iti pagilianmi, siak ti kapaspasan a tumataray iti distansia a 100 a metro. Ngem gapu ta nadangran ti pennet ti mukodko ken dagiti masel iti likud ti luppok ken gurongko, diakon maaramid ti kabaelak koma. Ngem kasta unay ti essemko iti panagtaray isu a nagbalinak a coach kadagiti nalaing nga atleta. Idi 1982, implanok ti mapan idiay California, U.S.A. tapno agadalak iti unibersidad. Iti dayta a nasaysayaat ti klimana a lugar, maitultuloyko ti karerak iti isports. Gimmatangak payen iti tiketko iti eroplano.

Ti Nangbalbaliw iti Biagko

Iti maysa a rabii idi dandanin ti nakaeskediul nga ipapanko idiay California, adda nagtuktok iti ridaw. Linukatak ket nakitak ti dua a babbai a Saksi ni Jehova. Kalmado ken natanangda, dagiti galad a makaay-ayo para iti maysa nga atleta. Pinastrek ken pinatugawko ida. Nalawlawaganak iti panagsasaritami ket sakbay a pimmanawda, imbatiandak iti libro a napauluan Mabalinyo ti Agbiag nga Agnanayon iti Paraiso a Daga.a Binasak a dagus ket idi naguduakon, naamirisko a pudno ti linaonna. Nagsubli dagiti babbai ket dinamagko no kasanoak nga agbalin a maysa kadagiti Saksi ni Jehova. Kinunada a masapul nga agadalak iti Biblia.

Nagpayadalak iti Biblia ken rinugiakon ti tumabuno kadagiti gimong dagiti Saksi iti Kingdom Hall-da iti lugarmi a Vantaa. Napaneknekak a naibasar iti Biblia ti isursuroda. Gapu kadagiti maad-adalko a kinapudno iti Biblia, in-inut a nagbalbaliwen dagiti kapanunotak maipapan iti no ania a talaga ti napateg iti biag. Isu a napanak iti travel agency tapno isublik ti tiketko ken mapasublik met ti imbayadko. Ti dadduma iti kuarta ket inggatangko iti amerikanak nga usarek iti gimong ken bag a pangikargaak iti Bibliak ken kadagiti naibasar-Biblia a literatura. Nabautisaranak kas maysa a Saksi ni Jehova iti kombension idiay Helsinki idi 1983.

Nakipagadal ti Dadduma nga Atleta

Bayat nga umad-adu ti maad-adalko iti Biblia, iranranudko met dayta kadagiti gagayyemko. Idi damo, masmasdaawda. Kinapudnona, nagwaras payen ti sayangguseng nga agbagtitak isu a likliklikandakon. Kalpasan ti panagbautisarko, regular latta nga agehersisioak babaen iti panagtaray tapno agtalinaedak a nasalun-at isu a pasaray agkikitakami kadagiti padak nga atleta. Iti pannakisarsaritak kadakuada, nakitada a nupay nagbalbaliwak, saanak nga agbagtit.

Idi agangay, adu kadakuada ti nakaamiris a ti ibagbagak ket nainkalintegan ken napateg nga usigenda. Nadlawda a diakon agsasao iti dakes ken simmingpetakon. Sumagmamano ti nayat nga agadal iti ad-adu pay maipapan iti Biblia. Maragragsakanak a mangipakaammo kadakuada a ti biag ti maysa a Kristiano ket inyarig ti Biblia iti salip dagiti atleta. Makiramramantayo iti lumba a manggun-od iti gunggona a biag nga awan inggana.—2 Timoteo 2:5; 4:7, 8.

Kinapudnona, ti panangaramid iti makaay-ayo iti Namarsua ti mangyeg iti makagunggona ken naragsak a biag, saan ket a ti panangabak kadagiti salip dagiti atleta. Gapu iti pannakisarsaritak iti dadduma nga atleta, natignay ti sumagmamano kadakuada a mangusig manen kadagiti kalatda. Impapuso ti dadduma kadakuada dagiti kinapudno iti Biblia a namagbalbaliw iti biagko. Makaparagsak ta adu kadakuada ti sireregta metten nga agserserbi iti Dios a kas iti kinaregtada idi iti tay-ak ti isports.

Ti maysa ket ni Yvonne, a nalaing a tumataray iti distansia a 800 a metro. Iti kasta a distansia, isu ti kapartakan a tumataray a babai iti Finland ken iti intero nga Scandinavia. Sibaballigi nga inrepresentarna ti Finland kadagiti salip dagiti atleta iti Europa. Kas resulta ti panagsarsaritami, naamiris ni Yvonne nga awan mamaay ti panagbalin a nalatak iti daytoy a lubong. Naammuanna ti isursuro ti Biblia a daytoy a lubong ket aglabas ken suktan ti Dios iti maysa a baro a lubong.—1 Juan 2:17.

Di nagbayag, ni Yvonne ket nakipagadalen iti Biblia. Iti dayta a tiempo, ar-armen isuna ni Jouko a nalaing a tumataray ken kameng ti grupo dagiti tumataray a mangibagi iti Finland. Kinapudnona, inrepresentarnan ti pagilian kadagiti salip iti Europa ken iti intero a lubong. Idi agangay, immakar da Yvonne ken Jouko idiay Estados Unidos tapno itultuloyda ti karerada iti tay-ak ti isports.

Bayat nga addada sadiay, intultuloy ni Yvonne ti panagadalna iti Biblia. Nakipagadal met ni Jouko ngem kayatna laeng ti agsapul iti kamali tapno agsardeng ni Yvonne a makipagadal. Nupay kasta, in-inut nga immukuok iti puso ni Jouko dagiti kinapudno iti Biblia. Nagkallaysa da Yvonne ken Jouko ket idi agangay, indedikarda ti biagda iti Dios, ken imparangarangda dayta babaen ti panagpabautisarda iti danum. Ita, agpadadan a payunir kas awag kadagiti Saksi ni Jehova nga amin-tiempo a manangaskasaba.

Narugiak met nga iyadalan iti Biblia ni Barbro, a kampeon iti 400 a metro a pasalip iti tinnarayan para kadagiti babbai iti Finland. Iti kallabes, inrepresentarna ti Finland kadagiti pasalip iti Europa. Immakar ni Barbro idiay Sweden, agraman ti pole-vaulter a lakayna a ni Jarmo. Sadiay nga intuloy ni Barbro ti nakipagadal iti Biblia ket nakipagadal met ni Jarmo. Agpadada nga agbirbirok iti panggep ti biag. Apaman a naadalda dagiti kinapudno iti Biblia, nagpabautisarda idiay Sweden. Idi agangay, nagbalin ni Jarmo a physiotherapist, ket nakaregregtada nga agassawa iti trabaho a panangasaba. Agserserbi ni Jarmo kas panglakayen iti kongregasion Kristiano.

Ti maysa pay ket ni Heidi nga agtutubo pay laeng ken nalaing a tumataray. Kas coach-na, napaliiwko ti panaginteresna kadagiti banag maipapan iti Dios. Isu a naminsan, kinasaritak mainaig iti isursuro ti Biblia maipapan iti Pagarian ti Dios ken dagiti bendision nga iyeg dayta iti daga. Sinaludsodko, “Mamatika kadi a masagraptayo dagitoy a bendision nga inkari ti Dios?”—Salmo 37:11, 29; Mateo 6:9, 10.

“Wen,” insungbatna. Kayatna ti agadal iti Biblia isu a kinasaritak ti maysa a Saksi a babai a tumulong kenkuana. Kalpasan ti sumagmamano a tawen, ni Heidi ket nagpabautisar met iti danum kas simbolo ti panagdedikarna iti Dios. Isu ket nagbalin a balasang a makaay-ayo ken managayat iti Dios ket idi agangay, nagkallaysakami. Nakasaysayaat a katakunaynay ta kanayon a natibker ti determinasionna nga agserbi iti Dios—a no dayta ket naipamaysa iti isports, adayo koma ti madanonna kas nalaing nga atleta.

Ni adingko a Peter pagaayatna met ti isports. Idi damo, kagurana ti panagadalko iti Biblia. Ngem inikkak iti libro nga Agbiag nga Agnanayon. Kalpasanna, imbagana kaniak: “Rinugiak a binasa ti libro ngem diak maawatan ti dadduma. Mabalin kadi a tulongannak?” Nakisaritaak iti maysa a Saksi a mangyadal kenkuana ket uppat a bulan kalpasanna, nabautisaran. Nangasawa idi agangay ket agserserbi itan ti asawana kas payunir.

Agtultuloy ti Lumba

Sakbay pay a nagbautisarak, determinadoakon nga agbalin a misionero. Di nagbayag kalpasan ti panagbautisarko, nagpayunirak. Ammok a no addaka iti lumba ti biag, nasken nga ipakatmo amin a kabaelam. Nangipasakami nga agassawa iti aplikasion iti Gilead, ti pagadalan dagiti agbalin a misionero a Saksi ni Jehova. Adda dayta idiay New York, ket idi 1994, naayabankami nga ageskuela. Kalpasan ti panagturposmi, naidestinokami nga agserbi idiay Latvia, a Russian ti pagsasao ti kaaduan.

Naupay dagiti tattao gapu iti pannakasinasina ti Soviet Union. Napadpadakes ken naiparit idi ti Biblia, ngem natakuatanmi nga adu ti interesado a mangammo iti linaonna. Ti panagsursuro iti Russian ti maysa kadagiti karirigatan a karit a naipasango kaniak. Ngem kalpasan ti innem a tawen a panagserbimi kas misionero iti Latvia, nadutokanak kas agdaldaliasat a manangaywan nga agbisita ken mangparegta kadagiti kongregasion dagiti Saksi ni Jehova. Daytoy ti agtultuloy nga ar-aramidek a kaduak ti matalek nga asawak.

Iti panaglabas ti tiempo, adun ti natulongak a rumang-ay iti lumba ti biag, “ti pudpudno a biag” iti baro a lubong ti Dios. (1 Timoteo 6:19) Ti coach masapul a maawatanna dagiti atleta tapno maaramidda ti amin a kabaelanda. Nasken a tulonganna ida a mangparang-ay iti paglainganda ken mangparmek kadagiti pagkapuyanda. Rumbeng a paregtaenna ida nga agporsegi tapno maaramidda ti kasayaatan.

Nasdaawak a nakaammo nga adu gayam ti pagpadaan ti Kristiano ken ti atleta kas impaganetget ni apostol Pablo iti umuna a suratna kadagiti taga-Corinto. Ti naballigi nga atleta saanna la a basta arapaapen ti mangabak no di ket kanayon a naipamaysa ti atensionna iti panagsanayna. Mangikeddeng kadagiti realistiko a kalat sa mangaramid kadagiti sistematiko a pamay-an tapno maragpatna dagita. No mapukaw iti panunotna ti kalatna ken sumardeng a mangragpat kadagita, agbalin nga awan kaes-eskan ti amin a nagbannoganna. Masapul a kasta met ti pannakaipamaysa ti pudno a Kristiano.

Ti naballigi nga atleta surotenna met ti sistematiko a pannakasanayna, ken agtalinaed a disiplinado no maipapan iti taraon. Kasta met ti pudno a Kristiano. Dina ipauneg dagiti imoral a sursuro, wenno kas iti kinuna ni apostol Pablo, saan a makiraman iti “lamisaan dagiti sairo.” Imbes ketdi, ipaunegna dagiti nasustansia a naespirituan a taraon nga ipapaay ti Dios babaen ti Biblia a Saona. (1 Corinto 10:21) No met rumsua dagiti pakarigatan, positibo latta ti naballigi nga atleta. Admitirenna dagiti kamalina ken aturenna dagita. “Ti wagas a panagtarayko di mapagduaduaan; . . . no di ket disdisnogek ti bagik,” insurat ni Pablo, tapno saan nga agbalin a di naanamongan.—1 Corinto 9:24-27.

Kanayonkami latta nga agehersisio ken baketko tapno agtalinaedkami a nasalun-at. Ngem dimi ipalubos a daytoy ti makalapped iti panagserbimi ken Jehova, ti nangparsua kadagiti tattao iti nakaskasdaaw a pamay-an. (Salmo 139:14) Naipamaysa ti panunotmi iti pananggun-od iti gunggona a “pudpudno a biag” iti baro a lubong ti Dios.—1 Timoteo 4:8.

Kalpasan a dineskribirna ti “ulep dagiti saksi” sakbay ti panawen dagiti Kristiano, imparegta ni apostol Pablo: “Ikkatentayo met ti tunggal dadagsen ken ti basol a silalaka a mangsagud kadatayo, ket buyogen ti panagibtur tarayentayo ti lumba a naikabil iti sanguanantayo.” (Hebreo 12:1) Awanen ti nasaysayaat pay ngem iti panagtaraytayo iti dayta a lumba agsipud ta umawat iti agnanayon a bendision ti amin a makaturpos iti dayta a lumba.—2 Timoteo 4:7, 8.

[Footnote]

[Ladawan iti panid 14]

Idi ngalay ti dekada 1980, siak ken ni Heidi a kaduami ni Yvonne iti ngato ken ni Jouko iti baba a nakaubba iti anakda

[Ladawan iti panid 15]

Dakami ken Heidi bayat a mangaskasabakami

[Ladawan iti panid 15]

Iti kombension dagiti Saksi ni Jehova idiay Helsinki idi 2009. Da Yvonne ken Jouko iti kannigidmi ken da Jarmo ken Barbro iti kannawanmi

[Picture Credit Line iti panid 12]

Naipablaak iti Aamulehti 8/21/1979