Ti Panangmatmat ti Biblia

Rumbeng Kadi nga Agkararagtayo Kadagiti “Santo”?

Ibilang da Marie ken Theresa ti bagida kas “napeklan a Katoliko.” Agpada a mamatida kadagiti “santo.” Mamati ni Marie a mabalinna ti agkararag kadakuada tapno agpatulong. Kanayon met nga agkararag ni Theresa iti “santo” a patron ti purokda ken iti “santa” a nakaipasurotan ti naganna.

KAS kada Marie ken Theresa, minilion iti intero a lubong ti agkarkararag kadagiti “santoda” tapno agkiddaw iti bendision. Sigun iti New Catholic Encyclopedia, “dagiti santo ti mangibabaet kadagiti tattao,” ken “‘nasayaat ken makagunggona’ ti agkararag kadakuada tapno magun-odan . . . dagiti parabur ti Dios.”

Ngem ania ti panangmatmat ti Dios iti dayta? Makaay-ayo ngata kenkuana ti panagkararag kadagiti “santo” tapno ibabaetdatayo? Ammuentayo ti kuna ti Biblia.

Rumbeng Kadi nga Umararawtayo Kadagiti “Santo”?

Iti Biblia, awan ti nadakamat a matalek nga agdaydayaw iti Dios a nagkararag iti “santo.” Apay? Kuna ti New Catholic Encyclopedia nga “idi laeng maikatlo a siglo a nalawag a nabigbig ti kinapateg ti panangibabaet dagiti santo,” agarup 200 a tawen kalpasan ti ipapatay ni Kristo. No kasta, dayta a sursuro ket saan a nagtaud ken Jesus ken kadagiti napaltiingan a nagsurat iti Biblia a nangisalaysay iti ministeriona. Apay a kasta ti makunatayo?

Isursuro ngamin ti Biblia a ti Dios laeng ti rumbeng a pagkararagantayo, nga aramidentayo dayta iti nagan ni Jesu-Kristo. “Siak ti dalan ken ti kinapudno ken ti biag,” kinuna ni Jesus. “Awan ti umay iti Ama malaksid no baeten kaniak.” (Juan 14:6) Dagita a nalawag a sasao ket maitunos iti insuro ni Jesus a nailanad iti Mateo 6:9-13. Iti panangilawlawagna maipapan iti kararag, imbaga ni Jesus kadagiti pasurotna: “Agkararagkayo, ngarud, a kastoy: Amami nga adda iti langlangit, masantipikar koma ti naganmo. . . . ” (Mateo 6:9) Nabatad a ti laeng nailangitan nga Amatayo ti rumbeng a pagkararagantayo. Daytoy a kinapudno ket naibasar iti maysa a napateg a prinsipio ti Biblia.

Panagkararag—Maysa a Kita ti Panagdayaw

Sigun iti The World Book Encyclopedia, “ti kararag ket tumukoy kadagiti napakumbaba a sasao ken kapanunotan agpaay iti Dios, didiosen, wenno dadduma pay a banag a madaydayaw. . . . Iti dandani amin a relihion iti lubong, ti kararag ket napateg a kita ti panagdayaw.” (Dakami ti nangyitaliko.) Isaludsodmo iti bagim, ‘Rumbeng kadi nga agparintumengtayo tapno agkararag ken agdayaw iti sabali malaksid iti Namarsua kadatayo ken nangted iti biagtayo?’ (Salmo 36:9) Imbaga ni Jesus: “Dagiti pudno a managdaydayaw agdayawdanto iti Ama buyogen ti espiritu ken kinapudno, ta, pudno unay, ti Ama sapsapulenna dagiti kasta nga agdayaw kenkuana.” (Juan 4:23) Kuna pay ti Biblia a ti Namarsua kadatayo kalikagumanna ti ‘naipamaysa a debosiontayo.’—Deuteronomio 4:24; 6:15.

Usigem ti ulidan ti Kristiano a ni apostol Juan. Kalpasan a naawatna dagiti makapaamanga a sirmata a nailanad iti Apocalipsis a libro iti Biblia, ti masmasdaaw nga apostol ket ‘nagruknoy tapno agdaydayaw iti sanguanan dagiti saka ti anghel’ a nangipakita kenkuana kadagidiay a banag. Ania ti reaksion ti anghel? “Agannadka!” kinunana. “Dika aramiden dayta! Maysaak laeng nga adipen a padam ken pada ti kakabsatmo . . . Agdaydayawka iti Dios.” (Apocalipsis 22:8, 9) Impaganetget manen ti Biblia a ni laeng Jehova a Dios ti rumbeng a pagdayawantayo.

Maitunos iti nadakamaten, ti Dios laeng ti naawagan a “Managdengngeg iti kararag.” (Salmo 65:2) Kanayonanna, kas ti Mannakabalin-amin, isuna laeng ti addaan autoridad, pannakaammo, ken pannakabalin a mangsungbat kadagiti nainkalintegan a kiddaw babaen iti kararag. (Job 33:4) Uray ni Jesu-Kristo inadmitirna nga adda dagiti limitasionna. (Mateo 20:23; 24:36) Nupay kasta, naikkan ni Jesu-Kristo iti dakkel nga autoridad, agraman ti annongen nga agserbi kas Mangibabaet iti sangatauan.

Mannakaawat a Mangibabaet

Kuna ti Biblia maipapan ken Jesus: “Kabaelanna met nga isalakan a naan-anay dagidiay umadani iti Dios baeten kenkuana, agsipud ta isu kankanayon a sibibiag tapno agdawat maipaay kadakuada.” (Hebreo 7:25) Iti sabali a pannao, makapagserbi ni Jesus kas mannakaawat a Mangibabaet kadagidiay “umadani iti Dios baeten kenkuana.” Di kaipapanan daytoy a rumbeng nga agkararagtayo ken Jesus ket isun ti mangidanon iti kararagtayo. Imbes ketdi, kaipapananna nga agkararagtayo iti Dios iti nagan ni Jesus, kas panangbigbig iti autoridadna. Apay a ni Jesus ti kasayaatan a Mangibabaet?

Napadasan ngamin ni Jesus ti nagbalin a tao isu a maawatanna ti panagsagaba ti sabsabali. (Juan 11:32-35) Impakitana met ti panagayatna kadagiti tattao babaen ti panangpaimbagna kadagiti masakit, panangpagungarna kadagiti natay, ken panangipaayna iti naespirituan a tulong kadagiti amin nga immasideg kenkuana. (Mateo 15:29, 30; Lucas 9:11-17) Kasta met, pinakawanna dagiti basol. (Lucas 5:24) Makapagtalektayo ngarud a no agbasoltayo, “addaantayo iti katulongan iti Ama, ni Jesu-Kristo, daydiay nalinteg.”—1 Juan 2:1.

Rumbeng nga ikagumaantayo a tuladen ti ayat ken asi ni Jesus. Saantayo nga autorisado nga agserbi kas mangibabaet ngem mabalintayo nga ikararagan ti sabsabali. Kinapudnona, ayat koma ti mangtignay kadatayo a mangaramid iti kasta. “Ikararaganyo ti maysa ken maysa,” insurat ni Santiago. “Ti araraw ti nalinteg a tao, no agtigtignay dayta, aduan iti puersa.”—Santiago 5:16.

Naammuan da Marie ken Theresa dagita nga agkakapateg a kinapudno babaen ti panangsukimatda a mismo iti Biblia. Aw-awisendaka dagiti Saksi ni Jehova a mangaramid met iti kasta. Kas kinuna ni Jesus, “dagidiay agdaydayaw kenkuana masapul nga agdayawda a buyogen ti espiritu ken kinapudno.”—Juan 4:24.

NAPANUNOTMO KADIN?

● Sigun ken Jesus, siasino laeng ti rumbeng a pagkararagantayo? —Mateo 6:9.

● Agserserbi ni Jesus kas ania?—Hebreo 7:25.

● Rumbeng kadi nga ikararagtayo iti Dios ti pagimbagan ti sabsabali?—Santiago 5:16.