Kasano a Matulongandakayo Dagiti Pudno a Sasanto?

ITI Kasuratan, asino ti tuktukoyen ti Griego a sao a naipatarus a “santo”? “Iti porma a plural, kas tumukoy kadagiti manamati,” kuna ti An Expository Dictionary of New Testament Words, “tukoyenna amin dagita [dagiti manamati] ken saan laeng nga agaplikar kadagiti tattao nga addaan iti naisangsangayan a kinasanto, wenno dagidiay natay a nabigbig gapu kadagiti naidumduma a nasantuan nga aramidda.”

Gapuna, inawagan ni apostol Pablo dagiti amin a nagkauna a Kristiano kas pudno a sasanto. Kas pagarigan, idi umuna a siglo K.P., nagsurat ni Pablo “iti kongregasion ti Dios nga adda idiay Corinto, agraman iti amin a sasanto nga adda iti intero nga Acaya,” a probinsia ti Roma. (2 Corinto 1:1) Idi agangay, nagsurat ni Pablo “kadagidiay amin nga adda idiay Roma kas dagiti dungdunguen ti Dios, naayaban tapno agbalin a sasanto.” (Roma 1:7) Nalawag a saan pay a natay dagitoy a sasanto, wenno gapu iti naisangsangayan a kinaimbag ket naisalsaluminada a nangatngato ngem kadagiti dadduma a manamati. Kadagiti ania a makagapu a naibilangda kas sasanto?

Sinantipikar ti Dios

Ipakita ti Sao ti Dios a saan a dagiti tattao wenno maysa nga organisasion ti mangideklara a santo ti maysa a tao. Kuna ti Kasuratan: “[Ti Dios] insalakannatayo ken inayabannatayo iti nasantuan a panangayab, saan a gapu kadagiti aramidtayo, no di ket gapu iti bukodna a panggep ken di kaikarian a kinamanangngaasi.” (2 Timoteo 1:9) Ti maysa a santo ket masantipikar babaen ti panangayab ni Jehova, sigun iti di kaikarian a kinamanangngaasi ti Dios ken maitunos iti panggepna.

Dagiti sasanto iti kongregasion Kristiano ket paset ti “baro a tulag.” Ti naiparukpok a dara ni Jesu-Kristo ti mangpatalged iti daytoy a tulag ken mangsantipikar kadagiti naitulag. (Hebreo 9:15; 10:29; 13:20, 24) Gapu ta nadalusanda iti imatang ti Dios, buklenda ti ‘nasantuan a kinapadi ket mangidatonda kadagiti naespirituan a sakripisio a makaay-ayo iti Dios baeten ken Jesu-Kristo.’​—1 Pedro 2:5, 9.

Panangikararag ken Panangibabaet Dagiti Sasanto

Gapu iti pammati a makaipaay dagiti “sasanto” iti naisangsangayan a bileg kadagiti manamati, minilion ti agdayaw kadakuada babaen dagiti relikia wenno babaen ti panangkiddaw iti panangibabaetda. Isursuro kadi daytoy ti Biblia? Iti Sermonna iti Bantay, insuro ni Jesus kadagiti pasurotna no kasano ti umadani iti Dios, a kunkunana: “Agkararagkayo, ngarud, a kastoy: ‘Amami nga adda iti langlangit, masantipikar koma ti naganmo.’” (Mateo 6:9) Siuumiso a maiturong ti kararag ken ni Jehova a Dios laeng.

Iti panangikagumaanda a mangpaneknek a mangibabaet dagiti “sasanto,” adawen dagiti teologo ti Roma 15:30, a kastoy ti mabasatayo: “Bagbagaankayo, kakabsat, baeten ken Apotayo a Jesu-Kristo ken baeten ti ayat ti espiritu, nga iyagawayo ti bagbagiyo a bumuyog kaniak kadagiti kararag iti Dios maipaay kaniak.” Iparparegta kadi ni Pablo kadagidi a manamati nga agkararagda kenkuana wenno usarenda ti naganna no umadanida iti Dios? Saan. Nupay dagiti kararag a mayebkas maipaay kadagiti pudno a sasanto ket maiparparegta iti Biblia, awan ti bilin ti Dios nga agkararagtayo kadagita wenno babaen dagita a sasanto.​—Filipos 1:1, 3, 4.

Nupay kasta, nangdutok ti Dios iti Mangibabaet kadagiti kararagtayo. “Siak ti dalan ken ti kinapudno ken ti biag,” kinuna ni Jesu-Kristo. “Awan ti umay iti Ama malaksid no baeten kaniak.” Kinuna pay ni Jesus: “Aniaman ti dawatenyo iti naganko, aramidekto daytoy, tapno ti Ama maipadayag koma mainaig iti Anak. No dawatenyo ti aniaman a banag iti naganko, aramidekto dayta.” (Juan 14:6, 13, 14) Makapagtalektayo a sidadaan nga ipangag ni Jehova dagiti kararag a naipadalan iti nagan ni Jesus. Maipapan ken ni Jesus, kuna ti Biblia: “Kabaelanna met nga isalakan a naan-anay dagidiay umadani iti Dios baeten kenkuana, agsipud ta isu kankanayon a sibibiag tapno agdawat maipaay kadakuada.”​—Hebreo 7:25.

No situtulok ni Jesus a mangibabaet kadatayo, apay a dagiti agdaydayaw a kameng ti Kakristianuan masansan a pagkararaganda dagiti “sasanto”? Iti librona a The Age of Faith, sinukimat ni historiador Will Durant ti namunganayan daytoy nga aramid. Nupay napaliiwna nga adda panagbuteng iti Mannakabalin-amin a Dios ken agparang a nalaklaka nga asitgan ni Jesus, kuna ni Durant: “Bumdeng ti maysa a makisao a direkta [ken ni Jesus] kalpasan a naan-anay a di naikankano ti Sermonna iti Bantay. Agparang nga ad-adda a nainsiriban ti umararaw iti maysa a santo a naideklara a mapan idiay langit, ken mangkiddaw iti ibaballaetna tapno makaadani ken Kristo.” Nainkalintegan kadi daytoy?

Isursuro kadatayo ti Biblia a babaen ken Jesus, mabalintayo ti maaddaan iti “wayawaya nga agsao ken iyaadani buyogen ti panagtalek” no agkararagtayo iti Dios. (Efeso 3:11, 12) Saan nga adayo iti sangatauan ti Mannakabalin-amin a Dios tapno dina mangngeg dagiti kararagtayo. Sikokompiansa nga inkararag ni salmista a David: “O Managdengngeg iti kararag, kenka a mismo umayto dagiti tattao iti isuamin a lasag.” (Salmo 65:2) Imbes nga usarenna dagiti relikia dagiti pimmusay a “sasanto” tapno mangted iti bileg, iparukpok ni Jehova ti nasantuan nga espirituna kadagidiay mangkidkiddaw iti dayta buyogen ti pammati. Inrason ni Jesus: “No dakayo, nupay nadangkeskayo, ammoyo no kasano ti mangted iti naimbag a sagsagut iti annakyo, anian a nangnangruna pay a ti Ama sadi langit mangtedto iti nasantuan nga espiritu kadagidiay agdawdawat kenkuana!”​—Lucas 11:13.

Ti Akem Dagiti Sasanto

Sinigsiglon ti naglabas sipud idi natay dagiti sasanto a sinuratan ni Pablo, ket idi agangay, inawatda ti “korona ti biag,” ti pannakapagungar idiay langit. (Apocalipsis 2:10) Ammo dagiti agdaydayaw ken ni Jehova a Dios a saan a nainkasuratan ti panagdayaw kadagitoy a pudno a sasanto ken saan a mangyeg iti pannalaknib kadagiti sakit, natural a didigra, rigat ti panagbiag, panaglakay, wenno ipapatay. Gapuna, mabalin nga iyimtuodyo, ‘Talaga kadi a maseknan kadatayo dagiti sasanto ti Dios? Namnamaentayo kadi nga agtignayda maipaay kadatayo?’

Agminar dagiti sasanto iti padto nga inrekord ni Daniel. Idi maikanem a siglo K.K.P., nakitana ti makatukay a sirmata, a dumanon iti kaaldawantayo ti kaitungpalanna. Manipud iti baybay, rimkuas ti uppat a nakabutbuteng nga animal a mangisimbolo kadagiti gobierno ti tao, a saan a makabael a mangpennek kadagiti pudno a kasapulan ti sangatauan. Kalpasanna, impadto ni Daniel: “Ngem dagiti sasanto Daydiay Katan-okan awatendanto ti pagarian, ket tagikuaendanto ti pagarian iti tiempo a di nakedngan, iti mismo a tiempo a di nakedngan kadagiti tiempo a di nakedngan.”​—Daniel 7:17, 18.

Pinasingkedan ni Pablo daytoy “tawid nga agpaay kadagiti sasanto,” ti pannakipagtawid ken ni Kristo idiay langit. (Efeso 1:18-21) Ti dara ni Jesus linuktanna ti dalan maipaay kadagiti 144,000 a sasanto tapno mapagungarda iti nailangitan a dayag. Impakaammo ni apostol Juan: “Naragsak ken nasantuan ti asinoman nga addaan paset iti umuna a panagungar; kadagitoy awan autoridad ti maikadua nga ipapatay, no di ket isudanto ti papadi ti Dios ken ni Kristo, ket makipagturaydanto kenkuana kas ar-ari iti sangaribu a tawen.” (Apocalipsis 20:4, 6; 14:1, 3) Iti sirmatana, nangngeg ni Juan ti buyot dagiti nailangitan a parsua nga agkankanta iti sango ni naipadayag a Jesus: “Babaen iti daram nanggatangka iti tattao maipaay iti Dios manipud iti tunggal tribu ken pagsasao ken ili ken nasion, ket pinagbalinmo ida a kas pagarian ken papadi iti Diostayo, ket agturayda a kas ar-ari iti daga.” (Apocalipsis 5:9, 10) Anian a makaliwliwa! Dagitoy a lallaki ken babbai ket siaannad a pinili a mismo ni Jehova a Dios. Kanayonanna, simamatalek a nagserbida ditoy daga, a napasaranda ti nganngani amin a parikut dagiti tattao. (1 Corinto 10:13) No kasta, makapagtalektayo a dagitoy napagungar a sasanto ket agbalin a naasi ken mannakipagrikna nga agturay, nga ikabilanganda dagiti pagkapuyan ken limitasiontayo.

Dagiti Bendision nga Iyeg ti Turay ti Pagarian

Asidegen nga agtignay ti gobierno a Pagarian a mangikkat iti amin a kinadakes ken panagsagaba ditoy daga. Iti dayta a tiempo a matagiragsak dagiti tattao ti awan kaaspingna a kinasinged iti Dios. Insurat ni Juan: “Idin nangngegko ti maysa a natbag a timek manipud iti trono a kunana: ‘Adtoy! Ti tolda ti Dios adda iti sangatauan, ket isu makipagnaedto kadakuada, ket isudanto dagiti ilina. Ket ti Dios a mismo addanto kadakuada.’” Mangyeg daytoy iti aglaplapusanan a bendision iti sangatauan, agsipud ta kuna pay ti padto: “Punasennanto ti amin a lua kadagiti matada, ket awanton ni patay, awanto metten ti panagleddaang wenno panagsangit wenno ut-ot. Ti immuna a bambanag naglabasdan.”​—Apocalipsis 21:3, 4.

Anian ti kinaragsak iti dayta a tiempo! Dagiti resulta ti perpekto a panangituray ni Kristo Jesus ken dagiti 144,000 a sasanto ket nadeskribir pay kadagitoy a sasao a nailanad iti Mikias 4:3, 4: “[Ni Jehova] pudno unay a mangukomto iti tengnga ti adu nga ili, ket ilintegna ti bambanag maipapan kadagiti nabileg a nasion iti adayo. Ket kasapulanto a pitpitenda dagiti kampilanda a pagbalinen a subsob ti arado ken dagiti pikada a pagbalinen a pangarbas a getgetteng. Saandanto a mangitag-ay iti kampilan, nasion maibusor iti nasion, saandanto met a sursuruenen ti pannakigubat. Ket pudno nga agtugawdanto, tunggal maysa iti sirok ti puon ti ubasna ken iti sirok ti kayona a higos, ket awanto ti asinoman a mamagpigerger kadakuada; ta ti mismo a ngiwat ni Jehova ti buybuyot sinaona dayta.”

Iyaw-awis dagiti sasanto ti pananggun-od kadagita a bendision. Naisimbolo dagiti pudno a sasanto kas nobia, nga agtultuloy a kunkunada: “Umayka!” Ituloy ti teksto: “Ket ti asinoman a dumdumngeg kunaenna koma: ‘Umayka!’ Ket ti asinoman a mawaw umay koma; ti asinoman a mayat awatenna koma ti danum ti biag nga awan bayadna.” (Apocalipsis 22:17) Ania ti nairaman iti “danum ti biag”? Malaksid iti sabsabali, karaman iti dayta ti umiso a pannakaammo kadagiti panggep ti Dios. Inkararag ni Jesus iti Dios: “Daytoy kaipapananna ti agnanayon a biag, ti pananggun-odda iti pannakaammo maipapan kenka, ti maymaysa a pudno a Dios, ken iti daydiay imbaonmo, ni Jesu-Kristo.” (Juan 17:3) Magun-od daytoy a pannakaammo babaen ti regular a panagadal iti Biblia. Anian a ragsaktayo a babaen ti Sao ti Dios, matarusantayo ti pudno a kinasiasino dagiti sasanto ken maammuan no kasano ti panangusar ti Dios kadakuada maipaay iti agnanayon a pagimbagan ti sangatauan!

[Ladawan iti panid 4]

Napaltiingan ni Pablo nga agsurat kadagiti pudno a sasanto

[Ladawan iti panid 4, 5]

Dagiti matalek nga apostol ni Jesus nagbalinda a pudno a sasanto

[Ladawan iti panid 6]

Sikokompiansa a makapagkararagtayo iti Dios babaen ken ni Jesu-Kristo

[Ladawan iti panid 7]

Dagiti napagungar a sasanto naasidanto nga agturay ditoy daga