Panangmatmat iti Lubong
Sigun iti bilang nga impakaammo ti Arab Road Safety Organization a nakabase idiay Tunisia, tinawen a nasurok a 500,000 nga aksidente iti kalsada ti mapaspasamak kadagiti lugar dagiti Arabo, a pakatayan ti nasurok a 36,000. —REUTERS NEWS SERVICE, TUNISIA.
“Sigun iti surbey, Internet ti kaaduan a pangalaan dagiti tin-edyer a Tsino iti impormasion maipapan iti seks ta kurang ti maisursuro kadagiti eskuelaan ken pagtaengan.”—CHINA DAILY, CHINA.
Dagiti Agsirsirip a Webcam
Itay nabiit, inaresto dagiti polis iti Germany ti maysa a lalaki nga akusado nga agsirsirip kadagiti kuarto ti adu nga agtutubo a babbai babaen kadagiti Webcam-da. Napugtuan kano dayta a lalaki ti simple a password ti maysa nga Internet account isu a naammuanna dagiti detalye maipapan iti sumagmamano a tao. Inusarna kano ti nastrekna nga account tapno makaipatulod iti malware (malicious software) a kasla screen saver kadagiti babbai a gagayyem ti biktimana. Isu nga uray adayo ti ayanna, nakontrolna ti kompiuter dagita a babbai ken nausarna ti Webcam-da iti aniaman nga oras. Sigun iti Aachener Zeitung, idi sinerrek dagiti imbestigador ti apartmentna, isu ket addaan iti tallo a milion a ladawan ken “aggigiddan a nakakonekta iti kompiuter ti 80 a babbai a di makaammo iti dayta.”
Dagiti Kadisdiskobre a Lenguahe
Dagiti linguista a mangan-analisar kadagiti di unay nalatak a lenguahe nga Aka ken Miji—a maus-usar iti makin-amianan a daya nga estado ti India nga Arunachal Pradesh, iti beddeng ti Bhutan ken China—ket nakadiskobre iti maikatlo a lokal a pagsasao a pagaammo kas Koro. “Daytoy a lenguahe ket saan a dokumentado ken di pulos pagaammo idi,” kinuna ti managsirarak a ni Gregory Anderson a direktor ti Living Tongues Institute for Endangered Languages. Saan a nadiskobre a dagus dayta yantangay 800 laeng ti agsasao iti dayta iti lugar a narigat a madanon. Idi 2009, adda 24 a lenguahe a nadiskobre iti lugar idiay China a maysa la ti dati a pagaammo a lenguahena.
Kontaminado nga Alingo
Impadamag ti Spiegel Online nga idiay Germany, “sipud idi 2007, ngimmato iti 400% ti baybayadan ti gobierno kadagiti mangnganup a napukawan iti pamastrekan gapu kadagiti alingo a kontaminado iti radiasion.” Adu a mangnganup ti agilaklako iti karne ti alingo kas pagtaraon ti tao, ngem iparit ti gobierno ti panangilako iti karne nga addaan iti nangato a level ti cesium-137, maysa a radiasion a nagtaud iti aksidente a napasamak idiay Chernobyl, 25 a tawenen ti napalabas. Nalaka a makontaminar dagiti alingo ta paboritoda dagiti “uong ken truffle, a napigsa a mangagsep iti radiasion,” kuna ti Spiegel. “Siempre, dumakdakkel ti baybayadan ti gobierno ti Germany gapu iti kellaat nga iyaadu dagiti alingo, saan a ti ikakaro ti kontaminasion a gapuanan ti radiasion.” Kuna dagiti eksperto a posible nga agtultuloy pay iti 50 a tawen ti problema mainaig iti radiasion.