ALINGO

[Heb., chazirʹ].

Daytoy nga animal ket nadakamat iti Kasuratan iti Salmo 80:13, a sadiay naiparipirip ti panangsibana kadagiti di nasaluadan a kaubasan. Patien a ti matuktukoy ket atap nga alingo (saan koma a pagarupen a kapada ti kalakian a naamo a baboy, a nakainaigan ti alingo). Daytoy nga animal (Sus scrofa) masarakan pay laeng kadagiti lutulot iti Palestina.

Ti dakkel nga atap nga alingo mabalin nga agdagsen iti agarup 160 kg (350 lb), a gistay 1.5 m (5 pie) ti kaatiddogna, ken mabalin nga agtayag iti 1 m (3 pie) agingga iti abagana. Ti subsob ti atap nga alingo ket nangnangruna a maibagay iti panagsubsob iti taraon kadagiti kasamekan iti kabakiran. Dagiti saw-ing, nangnangruna kadagiti saw-ing ti kalakian, ket maibilang a nakaam-amak nga igam, a babaen iti dayta nalakana laeng a gisaygisayen ti maysa a kabalio. Saan laeng a napeggad daytoy nga animal no di ket nadawel pay, yantangay maikunkuna a ti maysa a bunggoy dagitoy kabaelanda a dadaelen ti intero a kaubasan iti maysa a rabii. Nupay kadawyanna a mangmangan iti mulmula, ti pagtaraonna ramanenna ti adu a kita ti taraon kas iti bagas ti mulmula, bukbukel, alinta, biruruko, babassit nga animal, itlog dagiti tumatayab, ken iti umarngi kadagita.