Manipud Kadagiti Agbasbasa
Agimtuod Dagiti Agtutubo . . . Kasano a Matagiragsakko ti Panagbasak iti Biblia? (Abril 2009) Agtawenak iti 24. Kas maysa nga asawa ken ina, kanayon nga ikarkarigatak nga iwayaan ti agbasa iti Biblia. Inyaplikarko dagiti singasing iti daytoy nga artikulo, ken inusarko ti naipakuyog nga eskediul. Ita, matagtagiragsakkon ti agbasa iti Biblia. Maawatakon nga agtutunos dagiti libro ti Biblia a mangbukel iti maymaysa a tema a mayarig iti napintas nga inabel a lupot. Ita pay la a nariknak ti kastoy a gagar nga agbasa iti Biblia. Pagyamanan unay!
K. T., United States
Libro a Mapagtalkam—Paset 6 (Abril 2011) Kuna ti artikulo a “Roma iti Salaysay ti Biblia”: “Ania ti napasamak iti Jerusalem? Nagsubli dagiti buyot ti Roma nga agdagupen iti 60,000 a soldado nga indauluan ni Vespasian ken ti anakna a ni Tito.” Ipasimudaag dayta a da Vespasian ken Tito ti nangidaulo iti buyot a nangraut iti Jerusalem. Ngem sigun kadagiti historikal a reperensia, adda idi ni Vespasian idiay Roma bayat dayta a tiempo.
J. O., Australia
Sungbat ti “Agriingkayo!”: Sigun iti “Josephus—The Essential Writings,” ni Paul L. Maier, “nagsubli a dagus ni Tito manipud Alexandria, a kakuyogna ti Maika-15 a lehion, ket kinaduana ti amana idiay Ptolemais. Sadiay nga agur-uray ni Vespasian agraman ti Maika-5 ken Maika-10 a lehion.” Maipapan ken Vespasian, kunaen met ti “Encyclopedia of the Roman Empire,” ni Matthew Bunson: “Kaduana ti anakna a ni Tito a nangparmek iti Panagrebelde Dagiti Judio ken agsagsagana idin a manglakub iti templo ti Jerusalem idi 68 (C.E.) idi naipadamag a natayen ni Nero ken sinuktanen ni Galba. . . . Simmangpet idiay Roma idi otonio (Oktubre-Disiembre) ti 70 (C.E.).” Isu nga idi damo, kasla agkadua da Vespasian ken Tito a nangraut iti Jerusalem. Ngem adda tiempo a nagsubli ni Vespasian idiay Roma ket imbatina ni Tito a mangidaulo.
Addaanka Kadi iti Realistiko a Kalat? (Pebrero 2011) Dinakamat daytoy nga artikulo dagiti pagarigan ti di realistiko a kalat, kas iti “kinalatak, kinabaknang, kasayaatan nga asawa, wenno perpekto a salun-at.” Apay a nairaman iti dayta ti “kasayaatan nga asawa”? Apay a “di realistiko” a kalat ti maaddaan iti tungpal biag nga asawa?
S. K., United States
Sungbat ti “Agriingkayo!”: Saan nga imbaga ti artikulo a di realistiko a kalat ti panagasawa a mismo. Imbes ketdi, dinakamatna ti panagbirok iti “kasayaatan nga asawa.” Iti konteksto ti artikulo, ti tuktukoyen ti “kasayaatan” nga asawa ket daydiay awanan iti pakapilawan ken negatibo a kababalin. Awan serbi ti panagbirok iti kasta nga asawa gapu iti dua a rason: Umuna, awan ti masarakan a kasta a tao. (Roma 3:23) Maikadua, ti agbirbirok iti kasta nga asawa ket naipamaysa iti maalana imbes nga iti maipaayna. Gapuna, uray ti dadduma a naasawaan ket addaan iti di realistiko a kalat a mapagbalinda a “kasayaatan” ti asawada. Iti kasupadina, ti natibker a panagasawa ket buklen ti dua nga indibidual a mangbigbig iti kinaimperpekto ti tunggal maysa ngem kaskasdi nga ‘itultuloyda ti aginnanus ken sibubulos nga agpinnakawan.’—Colosas 3:13.