Kuarta

Ti kadi kuarta ti ramut ti amin a kinadakes?

“Ti ayat iti kuarta isu ti ramut dagiti amin a kita ti makadangran a bambanag.”—1 Timoteo 6:10.

TI KUNA TI DADDUMA

Ti kuarta ti ramut ti amin a kinadakes.

TI KUNA TI BIBLIA

“Ti ayat iti kuarta”—saan a ti mismo a kuarta—ti pagtataudan ti “makadangran a bambanag.” Iti Biblia, dinakamat ti nabaknang a ni Ari Solomon ti tallo a kita ti makadangran a bambanag a masansan a mapasamak kadagidiay managayat iti kuarta. Danag: “Ti aglaplapusanan a kukua daydiay nabaknang saan a mangipalubos kenkuana a maturog.” (Eclesiastes 5:12) Di pannakapnek: “Ti managayat laeng iti pirak saanto a mapnek iti pirak, uray ti asinoman a managayat iti kinabaknang saanto a mapnek iti sapul.” (Eclesiastes 5:10) Pannakasulisog nga agsukir iti linteg: “Daydiay aggangganat a makagun-od iti kinabaknang saanto nga agtalinaed nga awanan basol.”—Proverbio 28:20.

Ania ti usar ti kuarta?

“Ti kuarta agpaay a salaknib.”—Eclesiastes 7:12.

TI KUNA TI DADDUMA

Ti kuarta pagbalinennaka a natalged ken naragsak.

TI KUNA TI BIBLIA

Ti ibagbagada a ti kuarta magatangna ti kinaragsak ken kinatalged ket paset ti “makaallilaw a pannakabalin ti kinabaknang.” (Marcos 4:19) Kaskasdi a ti “kuarta isu ti mangipaay ti sungbat iti amin” a kasapulan. (Eclesiastes 10:19) Kas pagarigan, mabalin a magatang ti kuarta dagiti kasapulam tapno agtultuloyka nga agbiag kas iti taraon ken agas.—2 Tesalonica 3:12.

Makatulong met ti kuarta tapno maaywanam ti pamiliam. Kinapudnona, kuna ti Biblia: “No ti asinoman saanna nga ipaay ti kasapulan dagidiay kukuana, ken nangnangruna dagidiay kameng ti sangakabbalayanna, pinaglikudanna ti pammati.”—1 Timoteo 5:8.

Kasano a mausarmo a nainsiriban ti kuarta?

‘Agtugawka nga umuna ket pattapattaem ti magastos.’—Lucas 14:28.

TI KUNA TI BIBLIA

Usarem ti kuarta iti wagas a kayat ti Dios. (Lucas 16:9) Nainsiriban a responsable ken mapagtalkanka no usarem ti kuarta. (Hebreo 13:18) Tapno maliklikam ti dadagsen ti panagbiag iti labes ti kabaelam, ‘ti wagas ti panagbiagmo siwayawaya koma iti panagayat iti kuarta.’—Hebreo 13:5.

Nupay saan nga iparit ti Biblia ti panagutang, impakdaarna: “Ti nakabulod adipen iti tao nga agpapautang.” (Proverbio 22:7) Liklikam ti agagatgatang wenno nadarasudos a panaggatang gapu ta “tunggal maysa a nadarasudos sigurado nga agturong iti panagkasapulan.” (Proverbio 21:5) Imbes ketdi, mangilasinka iti kuartam ken urnongem tapno addanto igatangmo iti kasapulam.—1 Corinto 16:2.

Iparparegta kadatayo ti Biblia nga ‘iyugalitayo ti mangted.’ (Lucas 6:38) Adda naimbag a rason nga agbalin a naparabur dagidiay mayat a mangparagsak iti Dios ta “ti Dios ayatenna ti naragsak a manangited.” (2 Corinto 9:7) Gapuna, “dikay lipatan ti panagaramid iti naimbag ken ti panangiranud iti bambanag iti sabsabali, ta babaen iti kakasta a sakripisio maay-ayo a naan-anay ti Dios.”—Hebreo 13:16.