SUHETO ITI AKKUB | APAY A DIKA SUMUKSUKO?
2 Gapu ta Adda Makatulong
“Iyallatiwyo [iti Dios] ti isuamin a pakaringgoranyo, agsipud ta isu maseknan kadakayo.”—1 PEDRO 5:7.
Mabalin a kasla kaykayatmon ti matay no mariknam nga awanen ti maaramidam a mangpasayaat iti situasionmo. Ngem adda dagiti makatulong kenka.
Panagkararag. Ti kararag ket saan laeng a pangpasayaat iti rikna; wenno maudin a solusion dagidiay desperadon. Dayta ket aktual a pannakisarita ken Jehova a Dios a mangipatpateg kenka. Kayat ni Jehova nga ibagam kenkuana ti amin a problemam. Kinapudnona, parparegtaennatayo ti Biblia: “Ipalladawmo ti dadagsenmo ken Jehova a mismo, ket isu saranayennakanto.”—Salmo 55:22.
Agkararagka koma itan iti Dios. Usarem ti naganna a Jehova, ken naimpusuan a makisaritaka. (Salmo 62:8) Kayat ni Jehova a maam-ammom isuna kas maysa a gayyem. (Isaias 55:6; Santiago 2:23) Ti kararag ket maysa a pamay-an ti pannakisarita a mabalinmo nga aramiden iti uray ania nga oras ken lugar.
Sigun iti American Foundation for Suicide Prevention, “agpapada a naammuan kadagiti panagadal a ti kaaduan kadagiti nagpakamatay—90% wenno ad-adu pay—ti addaan iti sakit iti isip idi matayda. Ngem masansan a dagita a sakit ket saan a naammuan, nadayagnos, wenno naagasan a naimbag”
Dagiti tattao a mangipatpateg. Ti biagmo ket napateg iti sabsabali—agraman kadagiti kapamilia ken gagayyemmo a mabalin a mangipakpakitan a maseknanda kenka. Karaman kadakuada ti dadduma a mabalin a dimo pay pulos naam-ammo. Kas pagarigan, iti panangasaba dagiti Saksi ni Jehova, adda dagiti makasaritada a maburburiboran. Inamin ti dadduma a kasapulanda unay ti tulong ken napanunotda pay idin a gibusan ti biagda. Gapu iti panangasabada iti binalaybalay, adda naisangsangayan a gundaway dagiti Saksi ni Jehova a tumulong kadagiti kasta a tattao. Kas ken Jesus, ipatpateg dagiti Saksi ni Jehova dagiti padada a tattao. Ipatpategdaka met.—Juan 13:35.
Tulong dagiti propesional. Ti panangpanunot nga agpakamatay ket masansan a pagilasinan ti mood disorder, kas iti clinical depression. Dimo koma ibain no adda sakitmo iti emosion—no kasano a dimo ibain no adda sakitmo iti pisikal. Kinapudnona, ti depression ket naawagan a “kadawyan a panateng ti isip.” Uray asino ket mabalin a makaptan iti dayta—ken maagasan dayta.a
LAGLAGIPEM DAYTOY: Kadawyanna nga imposible a makaaonka iti nauneg nga abut no maymaysam. Ngem no adda tumulong kenka, kabaelam dayta.
TI MABALINMON NGA ARAMIDEN: Agbirokka iti nalaing a doktor a mangag-agas kadagiti mood disorder kas iti depression.
a No sangkapanunotmo latta a gibusan ti biagmo, ammuem no sadino ti pagpatulongam—nalabit iti maysa a suicide-prevention hotline wenno mental-health center. Dagita ket addaan kadagiti staff a na-train a tumulong.