Ti Abilidad ti Dung Beetle iti Nabigasion

ADU ti pangusaran ti maysa a kita ti abal-abal a maawagan iti dung beetle iti takki. Kanen ken pagitloganna dayta. Iregalo met dayta ti dadduma a kalakian iti kabaian bareng no maatrakarda ti kabaian. Pagiinnagawanda ti kayib-ibleng a takki. Napaliiw naminsan dagiti managsirarak ti agarup 16,000 a dung beetles a nangarak iti sangabunton a takki ti elepante. Naibusda dayta iti dua laeng nga oras.

Dadduma a kita ti dung beetle ti aglibas iti kaaduan babaen ti panamagtimbukelda iti takki, sada ipatulid nga iyadayo iti sangabunton a takki. Kalpasanna, ikalida dayta iti nalukneng a disso. Diretso nga ipatulidda dayta tapno alistoda a makalibas ken saan a takawen ti dadduma a dung beetle.

Ngem apay a saan a mayaw-awan ti dung beetle nangruna no rabii?

Usigem: Impakita dagiti napalabas a panagadal a makapagdaliasat dagiti dung beetle babaen iti lawag ti init wenno bulan, ngem diretso latta ti panagdaliasatna uray no lenned wenno saan a makita ti bulan. Natakuatan dagiti managsirarak idiay South Africa nga aramiden dayta dagiti dung beetle, saan a babaen ti panangkitada iti tunggal bituen, no di ket manipud iti lawag a patauden ti galaksi a Milky Way. Sigun iti pagiwarnak a Current Biology, “dayta ti kaunaan a naidokumento a pannakausar ti Milky Way a kas kompas kadagiti animal.”

Kuna ti managsirarak a ni Marcus Byrne a dagiti dung beetle ket addaan “iti epektibo a sistema ti nabigasion uray no nakakudkudrep dagiti bituen, babaen ti panangusarda iti limitado a kapasidad ti utekda.” Sigun kenkuana, adda potensialda a mangisuro kadagiti tattao no kasano ti agaramid kadagiti kompiuter [robot wenno camera] a makabael a manganalisar iti nagduduma a bambanag uray no nasipnget. Kas pagarigan, mabalin a maiprograma ti maysa a kita ti robot tapno agsawar iti narba a pasdek babaen ti panangtuladna iti sistema ti nabigasion ti dung beetle.

Ania ti makunam? Babaen kadi iti ebolusion a timmaud ti abilidad ti dung beetle iti nabigasion? Wenno nadisenio dayta?