Kapitulo 8​—Pannakailasat Agturong ti Baro a Daga

Dagiti Nakalasat kadagiti Amin a Nasnasion

1. Ania a kari a naaramid ken Abraham ti mangipakita a ti pananganamong ti Dios ket posible a maipaay kadagiti “amin a pampamilia” iti sangatauan?

Ni Jehova siaayat nga interesado kadagiti tattao iti amin a nasnasion ken tribo. Nangipaay iti probision tapno amin a pampamilia iti daga mabalinda a tagiragsaken ti anamong ken bendisionna. Ken Abram (Abraham), maysa a kaputotan iti Anak ni Noe a ni Sem, kinuna ni Jehova: “Pumanawka iti dagam, ken kadagiti kakabagiam, ken iti balay ni amam, ket mapanka iti daga nga ipakitakto kenka. Ket aramidenkanto a dakkel a pagarian, ket bendisionankanto, ket padakkelekto ti naganmo, ket sikanto ti maysa a bendision. Ket bendisionakto dagiti mamendision kenka, ket ti mangilunod kenka ilunodkonto, ket benditodanto kenka amin dagiti kaputotan iti daga.” (Genesis 12:1-3; Aramid 7:2-4) “Amin dagiti kaputotan iti daga”​—dayta iramannatayo ita, aniaman ti nasion a nakaipasngayantayo wenno pagsasao a sawentayo.​—Salmo 65:2.

2. (a) Kas ken Abraham, ania a kualidad ti kasapulantayo? (b) Kas naipakita idiay Hebreo 11:8-10, kasano ti panangipakita ni Abraham iti pammaneknek iti daytoy a kualidad?

² Daydiay nangibagaan ni Jehova iti panggepna ket maysa a tao iti pammati, ket kasapulan met a maaddaantayo iti pammati no makiramantayo iti bendision manipud iti Dios isu a naikari ditoy. (Santiago 2:23; Hebreo 11:6) Ti pammati ni Abraham saan laeng a pammati nga awan aramidna no di ket dayta napakuyogan iti panagtignay. Dayta ti nangtignay kenkuana a mapan idiay Mesopotamia iti adayo a daga a saanna pay nakitkita idi. “Babaen iti pammati naggian idiay daga a naikari a kas ganggannaet,” a di nakikadua iti aniaman kadagiti pagpagarian iti siudad sadiay. “Ta inur-urayna ti siudad [Pagarian ti Dios] nga adda pudno a simientona, a ti mangbalabala ken mangipatakder kenkuana isu ti Dios.”​—Hebreo 11:8-10.

3. Ania a makasukisok a panangsubok iti pammati ti linasat ni Abraham maipapan ken Isaac?

³ Idi nakagtengen ni Abraham iti 100 a tawen ket ti asawana a ni Sara nakagtengen iti 90, simimilagro a binendisionan ni Jehova ida iti maysa nga anak a lalaki, ni Isaac. Maipanggep itoy nga anak a lalaki, naglasat ni Abraham iti narikut a pannakasuot iti pammatina ken panagtulnogna iti Dios. Inturong ni Jehova ni Abraham a mangipan ken Isaac, itan maysan nga agkabanuag a lalaki, iti daga ti Moria ket sadiay idatonna kas mapuoran a daton. Gapu iti pammati iti abilidad ti Dios a mangisubli iti anakna iti biag babaen iti panagungar, nagtulnog ni Abraham. (Hebreo 11:17-19) Ni Isaac, a managtulnog ken Amana, ti nareppeten iti rabaw ti altar ket iggemen ni Abraham ti kutsilio a pangpapatay kenkuana idi a bimmallaet ti anghel ni Jehova. Nainget ti panangsubok ta napaneknekan a ni Abraham dina ikedked ti aniaman manipud iti Dios. Ngarud pinatalgedan ti Dios ti tulagna ken Abraham, kas kunaen ti Biblia:

4. Iti dayta nga okasion, ania pay a napateg a kari ti inaramid ti Dios maipapan kadagiti tattao iti amin a nasnasion?

⁴ “‘Gapu kaniak met laeng sinapataak,’ kinuna ni Jehova, ‘a gapu ta inaramidmo daytoy, ket dika inkedked ti anakmo, ti bugbugtong nga anakmo, iti panangbendision, bendisionankanto, ket iti pammaadu, paaduekto ti putotmo kas kadagiti bitbituen ti langit, ken kas iti darat nga adda iti igid ti baybay; ket ti putotmo kukuananto dagiti ruangan dagiti kabusorna. Ket iti putotmo mabendisionanto isuamin dagiti nasnasion ti daga agsipud ta tinungpalmo ti timekko.’”​—Genesis 22:15-18.

5. (a) Ania ti inladawan ti panangikagumaan ni Abraham a mangidaton ken Isaac? (b) Kas kaitungpalan iti Genesis 12:3, kasano ti ‘panangilunod’ dagiti tattao iti Dakdakkel nga Abraham, ket ania ti banagna? (c) Kasano ti “panangbenditotayo” kenkuana?

⁵ No maawatantayo a ti Dakdakkel nga Abraham ket ni Jehova ket ni Isaac iladladawanna ni Jesu-Kristo, mabalin a mangrugin nga apresiarentayo no kasano a dagitoy a paspasamak napategda a personal kadatayo. Kinapudnona, ti panagtignaytayo ken Jehova a Dios ti mangikeddeng iti masanguanantayo. Ti namnama iti biag nga agnanayon posible a maipaay kadatayo ta ti Dios pudno nga intedna ti bugbugtong nga Anakna kas daton a maipaay iti basbasoltayo, kas inladawan ti panangikagumaan ni Abraham a mangidaton ken Isaac. (Juan 3:16) Siasinoman a mangitultuloy a ‘mangilunod’ ken Jehova, a manglais kenkuana wenno manglaglag-an iti naayat a panggepna, mailunodto a kaipapananna ti agnanayon a pannakadadaelda. (Idiligyo ti 1 Samuel 3:12-14; 2:12.) Ngem no manangapresiartayo a tattao, “bendituentayonto” ti Dakdakkel nga Abraham. Kasano? Babaen ti siwayawaya a panangbigbig a nagtaud ken Jehova dagiti amin a naimbag a bambanag, agraman ti di kaikarian a sagut ti biag babaen iti Anakna. Kasta met, ipakaammotayo kadagiti dadduma ti maipapan iti kinaimbag ni Jehova ken ti natan-ok a kualidad ti kinaarina. (Santiago 1:17; Salmo 145:7-13) Iti kastoy a pamay-an ilinlineatayo ti bagbagitayo nga umawat kadagiti bendision manipud kenkuana iti agnanayon.

TI NAIKARI A “BIN-I” NI ABRAHAM

6. Siasino ti kangrunaan a “bin-i” ni Abraham? (b) Kasano ti pananggun-odtayo iti bendision nga agtaud kenkuana?

⁶ Kas paset iti urnosna a panangbendision iti sangatauan pinanggep ni Jehova ti maysa a nalinteg a nailangitan a gobierno. Ni Jesu-Kristo naipasngay a kas kaputotan ni Abraham, kas ti kapapatgan a kaputotan, wenno “bin-i,” ket kenkuana inted ni Jehova ti kinaari. (Galacia 3:16; Mateo 1:1) Gapuna, kas naipamatmat iti sapata ti Dios ken Abraham, babaen ken Jesu-Kristo a dagiti tattao iti amin a nasnasion ti daga mabendisionandanto. Ar-aramidenyo kadi ti kasapulan nga aramidenyo tapno makagun-od iti bendision a maipaay kadakayo met laeng? Kas pangarigan, ti kadi kurso ti panagbiagyo idemdemonstrana nga apresiarenyo no kasano kapateg ti pannakaidaton ti biag ni Jesus? Pudno kadi nga agpaspasakopkayo iti autoridadna kas Ari?​—Juan 3:36; Aramid 4:12.

7. (a) Siasino pay ti nairaman iti “bin-i ni Abraham”? (b) Kasano nga ammotayo a saan nga amin a matalek nga agserbi iti Dios mapanda idiay langit?

⁷ Ni apostol Juan naikkan iti naimpadtuan a pangripiripan iti nailangitan a paspasamak a sadiay nakitana dagiti dadduma a nainaig ken Jesu-Kristo iti nailangitan a Bantay Sion. Dagitoy, met, ket paset iti “bin-i ni Abraham.” Kas naibaga idiay Apocalipsis 14:1-5, dagitoy ti “nagatang manipud sangatauan” ket 144,000 ti bilangda. (Galacia 3:26-29) Siasino dagiti mairaman iti dayta? Pinagbalin a nalawag ti Biblia a pulos a saan a pinanggep ti Dios ti panangalana kadagiti amin a nalinteg a tattao idiay langit. (Mateo 11:11; Aramid 2:34; Salmo 37:29) Ti naindaklan a pribilehio a makipaset a kadua ni Kristo iti Pagarian ti langit limitado laeng iti “bassit nga ipastoran” isuda nga agbalinto nga ar-ari ken saserdote a kaduana iti sangaribo a tawen.​—Lucas 12:32; Apocalipsis 5:9, 10; 20:6.

8. Kaano ti panangrugi ti pannakapili ti “bassit nga ipastoran,” ken kasano kapaut ti panagtultuloyna?

⁸ Kasano a naaramid ti pannakapili dayta a “bassit nga ipastoran”? Ti naparaburan nga awis a makiraman iti nailangitan a Pagarian ti umuna a naipaay kadagiti natural nga Isrelitas. Ngem gapu iti kinakurang iti pammatida, saanda a nakaipaay iti naan-anay a bilang a 144,000. Gapuna dagiti Samaritano ken, kalpasanna, dagiti tattao manipud kadagiti nasnasion ti naawis. (Aramid 1:8) Ti umuna kadagiti makipagtawid ken Kristo ti napulotan iti nasantuan nga espiritu idi Pentecostes 33 K.P. Ti pannakapili daytoy a grupo nagtultuloy agingga a ti 144,000 ti naselioan nga inanamongan ti Dios. Kalpasanna ti atension naiturong iti panangurnong kadagiti tattao nga agbiagto ditoy daga kas manangapresiar nga iturayan ti nailangitan a gobierno.

9. (a) Aniada nga ebkas idiay Biblia ti agaplikar iti nailangitan a klase? (b) Siasinoda ti inladawan dagiti natural nga Israelitas?

⁹ Dagidiay nga agtawid iti nailangitan a Pagarian a kadua ni Kristo ti tuktukoyen ti Kasuratan a kas “napili,” “sasanto,” tattao a “pinulotan . . . [ti] Dios.” (2 Timoteo 2:10; 1 Corinto 6:1, 2; 2 Corinto 1:21) Dagitoy ti nagkaykaysa a nadeskribir met kas ti “nobia” ni Kristo. (Apocalipsis 21:2, 9; Efeso 5:22-32) Manipud kadagiti dadduma a panangmatmat, dagitoy ti maawagan “kakabsat” ni Kristo, “makipagtawid ken Kristo” ken “annak” iti Dios. (Hebreo 2:10, 11; Roma 8:15-17; Efeso 1:5) Aniaman ti nasionalidadda, dagitoy, iti naespirituan a panagsao, “ti Israel ti Dios.” (Galacia 6:16; Roma 2:28, 29; 9:6-8) Idi impatingga ni Jehova ti Linteg ti tulag iti nainlasagan nga Israel, inyegna ti naespirituan nga Israel iti maysa a baro a pannakitulag kenkuana met laeng. Ngem ti pannakilangenna iti nainlasagan nga Israel bayat nga addada iti sidong ti Linteg ti nangipaay iti padron dagiti bambanag nga umayto. (Hebreo 10:1) Siasino, ngarud, ti iladladawan ti nasion iti nainlasagan nga Israel, isu a pinili ti Dios a “naisangsangayan a kukuana”? Dagiti kinapudno itudoda ti naespirituan nga Israel a pinili ti Dios a mangituray a kadua ni Kristo idiay langit. (Idiligyo iti Exodo 19:5, 6 iti 1 Pedro 1:3, 4 ken 2:9.) Kadua ni Kristo buklenda ti ahensia a babaen iti dayta ti bendision maipaayto kadagiti amin a natulnog iti sangatauan. Ti panangapresiar iti daytoy isu ti sekreto iti pannakaawat iti Biblia.

DAGIDIAY MABENDISIONAN BABAEN ITI “BIN-I”

10. Sino ti inladawan dagiti saan nga Israelitas a managdaydayaw ken Jehova?

¹⁰ Bayat ti pannakilanglangen ti Dios iti naisangsangayan a pamay-an iti nasion ti Israel, nangaramid met iti naayat a probision a maipaay kadagiti tattao a saan a kameng dayta a nasion ngem dagiti puspusoda ti mangtignay kadakuada a makiraman iti pudno a panagdayaw a maikadua kadagiti Israelitas. Nagsayaatan ti panangdakamat ti rekord ti Biblia kadakuada. Dagitoy kadi, addaanda met, iti moderno-aldaw a katupag? Pudno nga adda. Dagitoy iladawanda iti adu a pamay-an dagidiay a saan a naespirituan nga Israelitas ngem ipatpategda ti nakaskasdaaw a namnama iti agnanayon a biag kas ti naindagaan nga iturayan ti Pagarian ti Dios. Dagitoy dagiti sinarita ti Dios ken Abraham, a kunkunana a dagiti tattao manipud kadagiti “amin a nasnasion iti daga” a mabendisionanto babaen iti “bin-ina.”​—Genesis 22:18; Deuteronomio 32:43.

11. (a) Ania a panangdakamat iti daytoy a grupo ti naaramid idi dedikasion ti templo ni Salomon? (b) Kasano a dagiti “ganggannaet” ‘makikallaysada ken Jehova’ iti kaaldawantayo, kas naipadto idiay Isaias 56:6, 7?

¹¹ Kankanayon a ti panggep ti Dios a maipaay kadagiti amin a sangatauan isu ti panagkaykaysa iti pudno a panagdayaw. Mainugot unay, iti dedikasion ti templo nga imbangon ni Salomon idiay Jerusalem, nagkararag ti ari a denggen koma ni Jehova ti kararag dagiti ganggannaet a mangsapul iti panangipaay iti maanamongan a panagdayaw a kadua ti Israel. (2 Cronicas 6:32, 33) Ket, idiay Isaias 56:6, 7, inkari ti Dios: “Kasta met dagiti ganggannaet a makikallaysa ken ni Jehova, tapno agserbi kenkuana, ken agayatda iti nagan ni Jehova, tapno agbalinda nga ad-adipenna, . . . isuda iyegkonto ida iti nasantuan a bantayko, ken paragsakekto ida iti balayko a pagkarkararagan. . . . Ta ti balayko managananto ti balay ti kararag a maipaay kadagiti amin nga il-ili.” No pampanunoten ti espiritu a naipanayag ditoy, ti moderno-aldaw a “ganggannaet” maur-urnongdan manipud kadagiti amin a nasnasion, saan laeng a kas managpaliiw, no di ket kas tattao a ‘makikallaysa ken Jehova.’ Aramidenda daytoy babaen ti panangidedikarda iti biagda kenkuana, nga isimboloda dayta babaen ti pannakaitaneb iti danum ken kalpasanna agserbida iti pamay-an a mangidemonstra iti ayatda “iti nagan ni Jehova” ken dagiti amin nga irepresentarna.​—Mateo 28:19, 20.

12. Kasano ti panangipamatmat ti Linteg ni Moises no dagidiay a manginanama nga agbalin nga iturayan ti Pagarian ti Dios masapul a makitunosda iti nangato a pagalagadan nga agaplikar iti naespirituan nga Israel?

¹² Saan a basbassit a kinamatalek ti kasapulan kadakuada ngem kadagiti napulotan-espiritu a Kristiano. Iti sidong ti Linteg ni Moises, kinalikaguman ni Jehova dagiti “gangannaet” a mangaramid iti pudno a panagdayaw a mangalagad iti isu met laeng a bilin ken alagaden kas ti Israel. (Numeros 15:15, 16) Ti relasionda ket saan laeng a basta makipagtaeng no di ket addaan napudno nga ayat. (Levitico 19:34) Kasta met, dagidiay iladladawan dagiti ganggannaet sapulenda met ti panangitunosda iti panagbiagda kadagiti kalikaguman ni Jehova ken agserbi a buyogen ti naayat a pannakikaykaysa kadagiti natda iti naespirituan nga Israel.​—Isaias 61:5.

13. Aniada dagiti detalye idiay Isaias 2:1-4 nga ipapusotayo koma no tarigagayantayo ti makalasat a sumrek iti “baro a daga”?

¹³ Babaen ken mammadtona nga Isaias, dineskribir ni Jehova ti nagagar a bunggoy dagiti tattao manipud kadagiti “amin a nasnasion” nga um-umay ita iti sapasap a balay iti panagdayaw ken Jehova. Impadtona: “Ket adu dagiti inilin-ili a mapanto ken agkuna: ‘Umaykayo, ket sumang-attayo iti bantay ni Jehova, iti balay ti Dios ni Jacob; ket isuronatayonto kadagiti daldalanna, ket magnatayonto kadagiti danana.’” Kas banagna, dagitoy ‘pinandaydan dagiti kampilanda a pinagbalin a dingding ti arado’ ket, uray pay iti tengnga daytoy nasinasina iti gubat a lubong, dagitoy ‘saandan a sursuruen ti gubat.’ (Isaias 2:1-4) Makitayo kadi ti bagiyo a kadua dayta naragsak a bunggoy? Makiramankayo kadi kadagiti tarigagayda a mangammo kadagiti kalikaguman ni Jehova, nga iyaplikar daytoy iti panagbiagyo ken agsardeng nga agtalek kadagiti ig-igam iti gubat? Inkari ti Dios a ti maysa a dakkel a bunggoy a mangsurot iti daytoy a kurso “rummuardanto iti dakkel a rigat” kas nakalasat a sumrek iti natalna a “baro a daga.”​—Apocalipsis 7:9, 10, 14; Salmo 46:8, 9.