Librot’ Biblia Numero 64​—3 Juan

Mannurat: Apostol Juan

Lugar a Nakaisuratanna: Efeso, wenno kaparangetna

Nalpas a Naisurat: c. 98 K.P.

1. Asinot’ nakaiturongan ti Maikatlo a Juan, ket aniat’ impormasion maipapan kenkuana?

NAISURAT daytoy ken Gayo, matalek a Kristiano nga inay-ayat ni Juan. Komon ti nagan a Gayo idi nagkauna a kongregasion. Namimpat a nagparang kadagiti dadduma a paset ti Nakristianuan a Griego a Kasuratan, a siguro tallo wenno uppat a nagduduma a lallaki ti natukoy. (Ara. 19:29; 20:4; Roma 16:23; 1 Cor. 1:14) Awan impormasion a mangipiho a daytoy Gayo a sinuratan ni Juan ket maysa kadagiti nainaganan a Gayo ditoy. Ti laeng ammotayo a ta ni Gayo ket kameng ti kongregasion Kristiano, nga isu ket naisangayan a gayyem ni Juan, ket naiturong a personal kenkuana ti surat, isu a nausar a kanayon ti sao a “sika.”

2. Kasanotay a maammuan ti nagsurat, ti tiempo, ken lugar a nakaisuratan ti Maikatlo a Juan?

² Idinto ta pareho ti panglukat ken pangserra a kablaawna iti Maikadua a Juan sa ti mannurat inawaganna manen ti bagina a “ti panglakayen,” awan duadua nga insurat met ni apostol Juan daytoy. (2 Juan 1) Gapu ta ti linaonna ken ti lenguahe a nausar ket umarngi kadagidiay immuna a dua a surat, isingasingna met a naisurat daytoy idiay Efeso wenno iti kaparangetna, idi agarup 98 K.P. Gapu ta nakaab-ababa, mammano nga inadaw daytoy dagidi nagkauna a mannurat, ngem isuda iti Maikadua a Juan, agparangda a paset dagiti nagkauna a katalogo ti naipaltiing a Kasuratan.a

3. Aniat’ inyebkas ni Juan baeten ti Maikatlo a Juan, ket ania a makapainteres a pangripiripan ti magun-odtay maipapan iti panagkikinnabsatan dagidi nagkauna a Kristiano?

³ Sigun iti suratna inyebkas ni Juan ti apresasionna iti kinamanagpadagus ni Gayo kadagiti agbambaniaga a kakabsat, ket nadakamatna ti rimsua a problema gapu ken ambisioso a Diotrefes. Ti nadakamat a Demetrio nalabit isut’ nangitulod ti surat ken Gayo, ket posible nga isut’ imbaon ni Juan ket masapul a padagusen ni Gayo gaput’ panagbaniagana, nga isut’ kiddawen ti surat. Kas met la ken Gayo, awan impormasiontay ken Diotrefes ken ni Demetrio malaksid iti mabasatay ditoy. Ngem, iparipirip ti surat kadatayo ti nasinged nga internasional a panagkakabsatan dagidi nagkauna a Kristiano. Malaksid kadagiti dadduma, sinaklaw daytoy ti ugali a panangpadagus kadagiti agbambaniaga ‘gaput’ pateg ti nagan,’ nupay saan nga am-ammo a personal ti bumalay dagitoy a sumangbay.​—3Ju Bs. 7.

LINAON TI MAIKATLO A JUAN

4. Aniat’ gapu a kinomendaran ni Juan ni Gayo, ania a nasubeg a kababalin ti kinondenarna, ket aniat’ praktikal a balakad ti intedna?

⁴ Imbalakad ti apostol ti kinamanagpadagus ken dagiti naimbag nga aramid (bs. 1-14). Nagragsakan ni Juan ti pannakadamagna a ni Gayo itultuloyna ti “pannagna[na] iti kinapudno.” Kinomendaranna gaput’ matalek nga aramidna, ken naayat a panangtamingna kadagiti sumarsarungkar a kakabsat. “Rebbengtayo,” kuna ni Juan, “a pasangbayen dagiti kakasta, tapno datayo koma ti katulongan iti kinapudno.” Sinuratan a dati ni Juan dayta a kongregasion, ngem ni natangsit a Diotrefes dina raemen ti asinoman nga ibaon ni Juan wenno dagidiay addaan rebbengen. Ni Juan, inton umay, singirennanto gapu ti ‘panagtartarabitabna kadagiti dakes a sao.’ Nabalakadan ni dungdunguenna a Gayo a dina “tuladen ti dakes, no di ket ti naimbag.” Nadakamat a ni Demetrio nagsayaat nga ulidan. Imbes nga adut’ insuratna, inyebkas ni Juan ti namnamana a makitananto ni Gayo a rupan-rupa iti mabiiten.​—Bs. 4, 8, 10, 11.

NO APAY NAIMBAG

5. (a) Kasano nga impakita ni Juan nga isu ket mapagulidanan a manangaywan, ket ania nga espiritu ti nesesita a taginayonenda? (b) Apay a diretsa ti panagsao ni Juan maibusor ken Diotrefes? (c) Ania komat’ regtaantay ita, mayataday iti ania a prinsipio a sinao ni Juan?

⁵ Impakita ni apostol Juan nga isu ket mapagulidanan a manangaywan no iti regtana a mangsaluad iti kongregasion maibusor kadagiti makatulaw nga impluensia. Nakaay-ayat ti espiritut’ ayat ken kinamanagpadagus ti kongregasion, ket talaga nga obligasionda a taginayonen ti naragsak a kasasaad, tapno dagiti lokal a kakabsat agraman dagiti “ganggannaet” (dati a di am-ammo dagiti bumalay a Kristiano) a simmangbay kadakuada ket agserbida amin kas “katulongan iti kinapudno.” (Bs. 5, 8) Ngem, napalangguad dagiti mata ni Diotrefes, banag a guraen ni Jehova, sa dina rinaem ti nateokratikuan a turay, a nagtartarabitab ti dakes maipapan ken apostol Juan. (Prov. 6:16, 17) Tinubenannat’ dana ti Nakristianuan a panagpadagus ti kongregasion. Isu met la a diretsa a tininggar ni Juan dayta a kinadakes ket pinaboranna ti napudno a Nakristianuan nga ayat ti kongregasion. Kasta met komat’ kinaregtatay ita a mangtaginayon iti kinapakumbaba, a magnatay a mayalubog iti kinapudno, ket ipakattay ti nadiosan nga ayat ken kinaparabur, kas mayataday iti prinsipio a sinao ni Juan: “Ti agaramid iti naimbag agtaud iti Dios. Ti agaramid iti dakes saanna a nakita ti Dios.”​—3 Juan 11.

[Footnote]