Kapitulo 55
Adu nga Adalan ti Saanen a Nakikuyog ken Jesus
NI Jesus mangisursuro iti maysa a sinagoga idiay Capernaum maipapan iti pasetna kas ti pudno a tinapay manipud langit. Ti palawagna ket nalawag a maysa a katuloyan iti salaysay a nangrugi kadagiti tattao idi isut’ nasarakanda iti panagsublida manipud iti makindaya a sikigan iti Baybay iti Galilea, a sadiay ti nangananda kadagiti simimilagro ti pannakaipaayna a tinapay ken ikan.
Intuloy ni Jesus dagiti sasaona, a kunkunana: “Ti tinapay nga itdekto a pakabiagan ti lubong isu ti lasagko.” Dua a tawen laeng sakbayna, idi primavera iti 30 K.P., imbaga ni Jesus ken ni Nicodemo a kasta unay ti panagayat ti Dios iti lubong ta impaayna ti Anakna a kas Manangisalakan. Gapuna, ni Jesus ipakpakitanan a siasinoman iti lubong ti sangatauan a mangan a simbolikal iti lasagna, babaen iti panamatida iti daton a mabiiten nga aramidenna, awatennanto ti biag nga agnanayon.
Dagiti tattao, nupay kasta, naitibkolda kadagiti sasao ni Jesus. “Kasano ti pannakabalin daytoy a tao a mangted kadatayo ti lasagna a kanen?” inyimtuodda. Kayat ni Jesus a maawatan dagiti managdengngegna a ti pannangan iti lasagna ket maaramid iti piguratibo a pamay-an. Gapuna, tapno ipaganetget daytoy, imbagana ti maysa a banag nga ad-adda a di maawat no awaten iti literal a pamay-an.
“No saankayo a mangan iti lasag ti Anak ti tao ken uminum iti darana,” kuna ni Jesus, “awanankayo iti biag. Ti mangan iti lasagko, ken uminum iti darak adda biagna nga agnanayon, ket isu pagungarekto iti kamaudianan nga aldaw; ta ti lasagko pudno a pagtaraon, ket ti darak pudno nga inumen. Ti mangan iti lasagko ken uminum iti darak aggian kaniak, ket siak kenkuana.”
Pudno, ti sursuro ni Jesus agbalin a kadadaksan no isut’ nangisingsingasing iti kanibalismo. Ngem, siempre, ni Jesus saanna nga itantandudo a literal ti pannangan iti lasag wenno iyiinum iti dara. Isut’ basta mangipagpaganetget nga amin nga umawat iti biag nga agnanayon ket masapul a maaddaan iti pammati iti daton nga aramidenna no idatonna ti naan-anay a natauan a bagina ken ibukbokna ti biagna. Kaskasdi, adu kadagiti adalanna ti di nangikagumaan a nangawat iti sursurona ket nagkedkedda: “Narikut daytoy a sao; asino ti makabalin a dumngeg iti dayta?”
Gaput’ ammona nga adu kadagiti adalanna ti nagdayamudom, kuna ni Jesus: “Pakaitibkolanyo aya daytoy? Anianto ketdin, no makitayonto ti Anak ti tao nga umuli idiay yanna nga immuna? . . . Dagiti sao nga insaok kadakayo espirituda ken biag. Ngem adda dadduma a saan a mamati.”
Intuloy a kinuna ni Jesus: “Gapuna kinunak kadakayo, Awan ti makabalin nga umay kaniak no saan nga impaay kenkuana ti Ama.” Nanipud idin, adut’ nagsanud kadagiti adalanna ket saanda a nakikuyogen kenkuana. Gapuna nagimtuod ni Jesus kadagiti 12 nga apostoles: “Dakayo pumanawkayo met aya?”
Ket simmungbat kenkuana ni Pedro: “Apo, asinonto ti papananmi? Sika addaanka kadagiti sao ti biag nga agnanayon; ket dakami namatikami ket naammuanmi a sika ti Santo ti Dios.” Anian a nagsayaatan nga ebkas iti kinasungdo, uray pay no ni Pedro ken dagiti dadduma nga apostoles mabalin a saanda a naan-anay a naawatan ti sursuro ni Jesus maipapan iti daytoy a banag!
Nupay no naay-ayo iti sungbat ni Pedro, kinuna ni Jesus: “Dikay aya pinili a sangapulo ket dua? Ket maysa kadakayo isu diablo.” Isut’ agsarsarita maipapan ken Judas Iscariote. Mabalin nga iti daytoy a punto nadlawen ni Jesus ken Judas ti “punganay,” wenno ti pangrugian, iti dakes a dalan.
Kalkalpas pay laeng ni Jesus nga inupay dagiti tattao babaen ti panagkedkedna iti panangikagumaanda a mangaramid kenkuana nga ari, ket mabalin nga agrasrasonda, ‘Kasano ti panagbalin daytoy a Mesias no dina alaen ti nainkalintegan a saad ti Mesias?’ Daytoy, met, ket maysa a banag a malaglagip pay laeng dagiti tattao. Juan 6:51-71; 3:16.
▪ Kadagiti siasino ti pangitedan ni Jesus iti lasagna, ken kasano a dagitoy ‘kanenda ti lasagna’?
▪ Ania pay a sasao ni Jesus ti nangriribuk kadagiti tattao, kaskasdi ania ti ipagpaganetgetna?
▪ Idi adu ti saanen a nakikuyog ken Jesus, ania ti sungbat ni Pedro?